ବରଗଡ଼ ଅଫିସ୍,୭ା୧୦:ବିକାଶର ସ୍ଲୋଗାନ ଦେଇ ଉଭୟ ରାଜ୍ୟ ଓ କେନ୍ଦ୍ର ସରକାର ବିଭିନ୍ନ ଯୋଜନା ହାତକୁ ନେଇଛନ୍ତି। କିନ୍ତୁ ଏଭଳି ଅନେକ ଗ୍ରାମ ଆଜି ବି ବିକାଶଠାରୁ ବହୁ ଦୂରରେ ରହିଛି। ଏଭଳି ଏକ ଗ୍ରାମ ହେଲା ବରଗଡ଼ ଜିଲା ପାଇକମାଳ ବ୍ଲକ ଭେଙ୍ଗରାଜପୁର ପଞ୍ଚାୟତ ଝେଙ୍ଗନାଡିହି ଗ୍ରାମର ଡ୍ୟାମପଡ଼ା। ଏପର୍ଯ୍ୟନ୍ତ ଏହି ପଡ଼ାବାସୀ ଆଲୁଅ ଦେଖି ନ ପାରି ଅନ୍ଧାରରେ ଜୀବନ ବିତାଉଛନ୍ତି ।
ପ୍ରାୟ ୩୦ବର୍ଷ ତଳେ ଏହି ପଡ଼ା ଗଢ଼ି ଉଠିଥିଲା। ଏଠାରେ ୮ଟି ଆଦିବାସୀ ପରିବାର ରହିଆସୁଛନ୍ତି। ବିଦ୍ୟୁତ୍ ନ ଥିବାରୁ ଡିବିରି ଆଲୁଅରେ ପିଲାମାନେ ପଢ଼ିବାକୁ ବାଧ୍ୟ ହେଉଛନ୍ତି। ବିଦ୍ୟୁତ୍ ସଂଯୋଗୀକରଣ ପାଇଁ ସରପଞ୍ଚଙ୍କଠାରୁ ଆରମ୍ଭ କରି ବିଡ଼ିଓ ତଥା ବିଦ୍ୟୁତ ବିଭାଗୀୟ ଅଧିକାରୀଙ୍କୁ ଅନୁରୋଧ କରି ଥକି ଗଲେଣି ଗାଁ ଲୋକେ। ହେଲେ କେହି ସେମାନଙ୍କ ସମସ୍ୟାର ସମାଧାନ ପାଇଁ ପଦକ୍ଷେପ ଗ୍ରହଣ କରି ନ ଥିବା ପଡ଼ାବାସୀ ଅଭିଯୋଗ କରିଛନ୍ତି। ଗ୍ରାମର ବଳଦେବ ବରିହା କୁହନ୍ତି, ଆଖପାଖ ଗ୍ରାମରେ ବିଦ୍ୟୁତ ସଂଯୋଗ ହୋଇଛି। ମାତ୍ର ତାଙ୍କ ପଡ଼ାକୁ ଏପର୍ଯ୍ୟନ୍ତ ବିଦ୍ୟୁତ ପହଞ୍ଚି ପାରିନାହିଁ। ଫଳରେ ସେମାନେ ଅସୁବିଧାର ସମ୍ମୁଖୀନ ହେଉଛନ୍ତି। ସେହିପରି ସରକାର ବିଦ୍ୟୁତ ସଂଯୋଗ ପାଇଁ ଅନେକ ଯୋଜନା କରିଛନ୍ତି। କିନ୍ତୁ କୌଣସି ଯୋଜନାରେ ତାଙ୍କ ପଡ଼ାକୁ ବିଦ୍ୟୁତ ସଂଯୋଗ ହୋଇ ନ ପାରିବା ବିଡ଼ମ୍ବନାର ବିଷୟ ବୋଲି କହିଛନ୍ତି ପଡାର ଅନ୍ୟ ଜଣେ ବାସୀନ୍ଦା ଗୋବିନ୍ଦ ବରିହା । ପଡ଼ାର ଶାବନ କଅଁର, ନବୀନ ଭୋଇ, ବାଳମୁକୁନ୍ଦ ଭୋଇ ମଧ୍ୟ ଅନୁରୂପ ମନ୍ତବ୍ୟ ଦେଇଛନ୍ତି। ଅନ୍ୟପକ୍ଷେ ତୁରନ୍ତ ଏହି ସମସ୍ୟାର ସ୍ଥାୟୀ ସମାଧାନ କରିବା ପାଇଁ ପାଇକମାଳ ବ୍ଲକର ସାମାଜିକ କର୍ମୀ ଦୀପା ବାରିକ ଟୁଇଟ ମାଧ୍ୟମରେ ମୁଖ୍ୟମନ୍ତ୍ରୀଙ୍କୁ ନିବେଦନ କରିଛନ୍ତି । ଏ ସମ୍ପର୍କରେ ମତାମତ ପାଇଁ ସ୍ଥାନୀୟ ସରପଞ୍ଚ ଭୀଷ୍ମଦେବ ସାହୁଙ୍କୁ ତାଙ୍କ ମୋବାଇଲ ନମ୍ବର ୭୬୦୮୯୧୮୪୮୫ରେ ଯୋଗାଯୋଗ କରାଯାଇଥିଲା। ହେଲେ ଯୋଗାଯୋଗ ସମ୍ଭବ ହୋଇପାରି ନ ଥିଲା ।
