ଅନୁଗୋଳ ଅଫିସ, ୧୪।୪ – ମହା ବିଷୁବ ସଂକ୍ରାନ୍ତି ବା ପଣା ସଂକ୍ରାନ୍ତି ପାଇଁ ଅନୁଗୋଳ ଜିଲାବାସୀଙ୍କ ମଧ୍ୟରେ ବେଶ୍ ଉତ୍ସାହ ରହିଛି। ଏହି ଓଡ଼ିଆ ନବବର୍ଷରେ ଈଶ୍ୱରଙ୍କଠାରୁ ଆଶୀର୍ବାଦ ନେବାକୁ ସକାଳୁ ହିଁ ବିଭିନ୍ନ ଦେବଦେବୀ ମନ୍ଦିରରେ ଭକ୍ତଙ୍କ ଧାଡ଼ି ଲମ୍ବିବ। ତେବେ ଜିଲାରେ କରୋନା ସଂକ୍ରମଣ ଉପରମୁହଁା ଥିବାରୁ ଏଥିପାଇଁ ପ୍ରଶାସନ ପକ୍ଷରୁ କୋଭିଡ୍ କଟକଣାକୁ କଡ଼ାକଡ଼ି ପାଳନ କରିବାକୁ ନିର୍ଦ୍ଦେଶ ଦିଆଯାଇଛି। ପ୍ରତି ମନ୍ଦିରରେ ସାମାଜିକ ଦୂରତ୍ୱକୁ ପ୍ରାଧାନ୍ୟ ଦିଆଯାଇଥିବାବେଳେ ମାସ୍କ ପରିଧାନକୁ ବାଧ୍ୟତାମୂଳକ କରାଯାଇଛି। ଏଥିସହ ଅମାନିଆ ଲୋକଙ୍କ ନିକଟରୁ ଜରିମାନା ଆଦାୟ କରିବାକୁ ପ୍ରଶାସନ ଓ ପୋଲିସ ପକ୍ଷରୁ ସମସ୍ତ ବ୍ୟବସ୍ଥା କରାଯାଇଛି।
ଗତବର୍ଷ ଲକ୍ଡାଉନ୍ କାରଣରୁ ସବୁ ମନ୍ଦିରରେ ତାଲା ପକାଯାଇଥିଲା। ତେଣୁ ମହାବିଷୁବ ସଂକ୍ରାନ୍ତି ସହ ଅନ୍ୟ ପର୍ବପର୍ବାଣୀ କେବଳ ରୀତିନୀତିରେ ରହିଯାଇଥିଲା। ଭକ୍ତମାନେ ମନ୍ଦିର ଯାଇ ଦିଅଁ ଦର୍ଶନ କରିବାର ସୌଭାଗ୍ୟ ପାଇପାରି ନ ଥିଲେ। ହେଲେ ଚଳିତବର୍ଷ କୋଭିଡ୍ର ଦ୍ୱିତୀୟ ଲହର ଚାଲିଥିଲେ ମଧ୍ୟ ଅନୁଗୋଳ ଜିଲାରେ କୌଣସି ମନ୍ଦିର ବନ୍ଦ କରାଯାଇ ନାହିଁ। ତେବେ ମନ୍ଦିରଗୁଡ଼ିକରେ ଯେପରି ଭିଡ଼ ନିୟନ୍ତ୍ରଣ କରାଯାଇପାରିବ ସେ ଦିଗରେ ପ୍ରଶାସନ ପକ୍ଷରୁ କମିଟିଗୁଡ଼ିକୁ ନିର୍ଦ୍ଦେଶ ଦିଆଯାଇଛି। ପ୍ରତି ମନ୍ଦିରରେ ସାମାଜିକ ଦୂରତ୍ୱ ଓ ମାସ୍କ ଯାଞ୍ଚକୁ କଡ଼ାକଡ଼ି କରାଯିବାକୁ ଜିଲା ପ୍ରଶାସନ ପକ୍ଷରୁ ଚେତାଇ ଦିଆଯାଇଛି। ସମସ୍ତ ମନ୍ଦିରରେ ପୋଲିସ ଓ ପ୍ରଶାସନିକ ଅଧିକାରୀଙ୍କୁ ମୁତୟନ କରିବା ସମ୍ଭବ ହୋଇ ନ ଥିବାରୁ ଜନଗହଳିପୂର୍ଣ୍ଣ ସ୍ଥାନରେ କଟକଣା ଯାଞ୍ଚ କରାଯିବ ବୋଲି କୁହାଯାଇଛି। ବିଶେଷକରି ଅନୁଗୋଳର ଶୈଳଶ୍ରୀକ୍ଷେତ୍ର ଜଗନ୍ନାଥ ମନ୍ଦିର, ମା’ ବୁଢ଼ୀ ଠାକୁରାଣୀ ମନ୍ଦିର, ଛେଣ୍ଡିପଦାର ତୁକୁଡ଼ା, ପୁରୁଣାଗଡ଼, ଖମାର ବାଣେଶ୍ୱର, ଝିଣ୍ଟିପାଳ ଅଷ୍ଟଶମ୍ଭୁ, ଜରପଡ଼ା ଧବଳେଶ୍ୱର, ବଇଣ୍ଡାର ବଡ଼ହୁଲା, ଗାଁ ବଇଣ୍ଡା, ଅଙ୍ଗପଡ଼ା, ଧଉରାପାଲି, ବୟେଜା, ଆଠମଲ୍ଲିକର ବିନିକେଇ, ଦେଉଳଝରୀ, ତାଳଚେରର ମା’ ହିଙ୍ଗୁଳା, ପାଲଲହଡ଼ାର ଖୁଲୁଡୀ ଗିରିଶ୍ୱେର, କୁଣ୍ଢେଇବୀରା, ବଅଁରପାଳ କାଙ୍ଗୁଲା କାଳୀପିଠ, କୁଲାଡ ହନୁମାନ, ନାଲ୍କୋ ତାରିଣୀ ମନ୍ଦିର ଆଦିରେ ଜନସମାଗମ ହେବାର ସମ୍ଭାବନା ରହିଛି। ତେଣୁ ସେଠାରେ କୋଭିଡ୍ କଟକଣା କଡ଼ାକଡ଼ି କରାଯିବାକୁ ମନ୍ଦିର ପରିଚାଳନା କମିଟି ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି।
କଟକଣା ନ ମାନିଲେ କାର୍ଯ୍ୟାନୁଷ୍ଠାନ
କରୋନା ପାଇଁ ମନ୍ଦିର ବନ୍ଦ ନିଷ୍ପତ୍ତି ହୋଇନାହିଁ। କେବଳ କଟକଣାକୁ କଡ଼ାକଡ଼ି କରାଯାଇଛି। ନିୟମ ଉଲ୍ଲଘଂନ ହେଲେ ଜରିମାନା ଆଦାୟ କରାଯିବ। ସାମାଜିକ ଦୂରତ୍ୱ ଓ ମାସ୍କ ପିନ୍ଧି ସମସ୍ତେ ପର୍ବ ପର୍ବାଣି ପାଳନ କଲେ ସଂକ୍ରମଣ ବଢ଼ିବ ନାହିଁ।
-ସିଦ୍ଧାର୍ଥ ଶଙ୍କର ସ୍ବାଇଁ, ଜିଲାପାଳ
ସବୁ ନିୟମ ପାଳନ କରାଯିବ
ଶୈଳଶ୍ରୀକ୍ଷେତ୍ର ମନ୍ଦିର ପରିଚାଳନା କମିଟି ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଛି। ମନ୍ଦିର ସାନିଟାଇଜ ବ୍ୟବସ୍ଥା ହୋଇଛି। ମାସ୍କ ପରିଧାନକୁ ବାଧ୍ୟତାମୂଳକ କରାଯାଇଛି। ପ୍ରଶାସନର ସମସ୍ତ ନିୟମ ପାଳନ କରାଯିବ।
-ହେମନ୍ତ ଦାସ, ସମ୍ପାଦକ, ପରିଚାଳନା କମିଟି
ଉଲ୍ଲଂଘନକାରୀଙ୍କୁ ବାରଣ
ବଡ଼ହୁଲା ମନ୍ଦିରରେ କୋଭିଡ୍ କଟକଣାକୁ କଡ଼ାକଡ଼ି ପାଳନ କରାଯିବ। ମନ୍ଦିର ପରିଚାଳନା କମିଟି ଓ ଯୁବଗୋଷ୍ଠୀ ପ୍ରସ୍ତୁତ ରହିଛନ୍ତି। ମାସ୍କ ପିନ୍ଧି ନ ଥିଲେ ଭକ୍ତମାନଙ୍କୁ ମନ୍ଦିର ପ୍ରବେଶ ବାରଣ କରାଯାଇଛି। ସାମାଜିକ ଦୂରତ୍ୱକୁ ଗୁରୁତ୍ୱ ଦିଆଯାଇଛି।
-ସର୍ବେଶ୍ୱର ମହାପାତ୍ର, ବଡ଼ହୁଲା ମନ୍ଦିର ପୂଜକ
ନ ମାନିଲେ ଆଗକୁ ଅଡ଼ୁଆ
ଗତବର୍ଷ ସଂକ୍ରାନ୍ତିରେ ମନ୍ଦିର ଯାଇପାରି ନ ଥିଲୁ। ଚଳିତବର୍ଷ କିଛି ପର୍ବପର୍ବାଣୀରେ ଭଗବାନଙ୍କ ଦର୍ଶନ ମିଳୁଛି। ତେଣୁ ଲୋକମାନେ କଟକଣା ମାନି ଧାର୍ମିକ ଅନୁଷ୍ଠାନକୁ ଯାଆନ୍ତୁ। ଏହାକୁ ଅଣଦେଖା କଲେ ଆଗକୁ ଅଡ଼ୁଆ ପରିସ୍ଥିତି ସୃଷ୍ଟି ହେବ।
-କୁହୁକ ଚନ୍ଦ୍ର ମହାରଣା, ଭକ୍ତ