ଓ୍ବାଶିଂଟନ,୧୫।୯:ଅଜଣା ଉଡ଼ନ୍ତା ବସ୍ତୁ(ଏଲିଏନ୍) ସମ୍ପର୍କିତ ଅଧ୍ୟୟନ ପାଇଁ ନୂଆ ବୈଜ୍ଞାନିକ କୌଶଳର ଆବଶ୍ୟକତା ରହିଛି। ଅତ୍ୟାଧୁନିକ ସାଟେଲାଇଟ୍ ବ୍ୟବହାର କରି ୟୁଏଫ୍ଓ ସମ୍ପର୍କରେ ଅଧିକ ଗବେଷଣା କରାଯିବା ଜରୁରୀ ବୋଲି ଗୁରୁବାର ଆମେରିକୀୟ ମହାକାଶ ଗବେଷଣା ସଂସ୍ଥା ନାସା ସ୍ପଷ୍ଟ କରିଛି। ବର୍ଷାଧିକ କାଳର ଗବେଷଣା ପରେ ଜାରି କରାଯାଇଥିବା ୩୩ ପୃଷ୍ଠା ସମ୍ବଳିତ ବହୁ ପ୍ରତୀକ୍ଷିତ ରିପୋର୍ଟରେ ମହାକାଶ ସଂସ୍ଥା ପକ୍ଷରୁ ଦର୍ଶାଯାଇଛି ଯେ ଆକାଶରେ ବିଭିନ୍ନ ସମୟରେ ଦେଖାଯାଉଥିବା ଅସ୍ବାଭାବିକ ଘଟଣାମାନ ପଛରେ ଏଲିଏନ୍ସଙ୍କ ଭୂମିକା ନେଇ କୌଣସି ପ୍ରମାଣ ମିଳିନାହିଁ। ତେବେ ପୃଥିବୀରେ ଏଲିଏନ୍ସଙ୍କ ଅସ୍ତିତ୍ୱକୁ ମଧ୍ୟ ଏଥିରେ ଅସ୍ବୀକାର କରାଯାଇନାହିଁ। କିନ୍ତୁ ଅନ୍ଆଇଡେନ୍ଟିଫାଏଡ୍ ଏନମାଲସ୍ ଫେନୋମେନା(ୟୁଏପି) ଗୁଡ଼ିକୁ ନେଇ କିଭଳି ଅଧିକ ତଦନ୍ତ କରାଯିବ ତାହା ମଧ୍ୟ ନାସାର ୧୬ ସଦସ୍ୟ ବିଶିଷ୍ଟ ପ୍ୟାନେଲ ସ୍ପଷ୍ଟ କରିନାହିଁ।
