ନୂଆଦିଲ୍ଲୀ,୧୩।୬: ଦେଶରେ କରୋନା ମହାମାରୀ ସଂକ୍ରମଣ ଯୋଗୁ ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି ହୋଇଛି। ରାଜଧାନୀ ଦିଲ୍ଲୀରେ କରୋନା ଯୋଗୁ ଭୟଙ୍କର ସ୍ଥିତି ଦେଖାଦେଇଛି। ତେବେ ରାଜଧାନୀରେ ପାଣିର ଅଭାବ ଯୋଗୁ ଲୋକେ କରୋନା ମାର୍ଗଦର୍ଶିକାକୁ ଭୁଲିଯାଇ ପାଣି ପାଇଁ ଭିଡ଼ ଜମାଇବାରେ ଲାଗିଛନ୍ତି। ପ୍ରଥମେ ଶୋଷ ମେଣ୍ଟାଇବାକୁ ଲୋକେ ଗୁରୁତ୍ୱ ଦେଉଛନ୍ତି। ଶୋଷ ଆଗରେ ସଂକ୍ରମଣ ତଥା ମୃତ୍ୟୁ ଭୟ ଫିକା ପଡ଼ିଯାଉଛି। ପାଣି ଲାଗି ଲୋକେ ରାସ୍ତାରେ ଧାଡ଼ିବାନ୍ଧି ୮ ଘଣ୍ଟା ପର୍ଯ୍ୟନ୍ତ ଅପେକ୍ଷା କରୁଛନ୍ତି। ପାଣି ଟ୍ୟାଙ୍କର ସକାଳ ୭ରୁ ମଧ୍ୟାହ୍ନ ୧ଟା ମଧ୍ୟରେ ଆସିଥାଏ। ଲୋକେ ପାଣି ଟ୍ୟାଙ୍କରକୁ ଅପେକ୍ଷା କରି ଭୋର୍ ୫ଟା ୩୦ ଅବା ୬ଟାରୁ ଧାଡ଼ିରେ ଠିଆ ହୋଇ ରହୁଛନ୍ତି। ପାଣି ନେବା ପାଇଁ ଲୋକେ ବିନା ମାସ୍କ୍ରେ ସାମାଜିକ ଦୂରତା ବଜାୟ ରଖିବା ମାର୍ଗଦର୍ଶିକାକୁ ଫୁ କରୁଥିବା ଦେଖିବାକୁ ମିଳୁଛି।