କେନ୍ଦୁଝର/ପାଟଣା, ୧୧।୧ (ସ୍ବ.ପ୍ର.): କେନ୍ଦୁଝର ଜିଲାରେ ବନ ବିଭାଗ ପକ୍ଷରୁ ମଙ୍ଗଳବାର ପକ୍ଷୀ ଗଣନା କରାଯାଇଛି। କେନ୍ଦୁଝର ଡିଭିଜନର ବିଭିନ୍ନ ଜଳାଶୟରେ ଗଣନା କରାଯାଇଥିଲା। କେନ୍ଦୁଝର ରେଞ୍ଜ୍ର ନଳପଙ୍ଗା ଡ୍ୟାମ୍, ବଡ଼ଶାସନ ପୋଖରୀ, ମାଧପୁର ଫାର୍ମ ପୋଖରୀ, ଟିକରପଡା ଡ୍ୟାମ, ଚାନ୍ଦିନୀ ପୋଖରୀ, ସାପୁଆ ଡ୍ୟାମ୍, କୋଡିପଶା ଡ୍ୟାମ, କାଂଜାରୀ ଡ୍ୟାମ୍, ଜଗଦଳା ଡ୍ୟାମ୍, ଧୂଳିଆବେଡା ଡ୍ୟାମ୍, ଘଟଗଁା ରେଞ୍ଜ୍ର ମାନପୁର ଡ୍ୟାମ୍, କାଳିମାଟି ଡ୍ୟାମ, କାଣ୍ଡସର ଡ୍ୟାମ୍, ଭୂୟଁା ଜୁଆଙ୍ଗ ପୀଢ ରେଞ୍ଜ୍ର ବଡଘାଗରା ଜଳଭଣ୍ଡାର, ତେଲକୋଇ ରେଞ୍ଜ୍ର ଖଜୁରଆ, ଦଣ୍ଡାଧର, ଖୁଣ୍ଟାପଡା, ସଲେଇକେନା ଡ୍ୟାମ୍, କାକୁଡିଅମ୍ବା, ଚମ୍ପୁଆ ରେଞ୍ଜ୍ର ସ୍ଲିମ ଡ୍ୟାମ୍ ଓ ପାଟଣା ରେଞ୍ଜ୍ର ଖିରେଇଟାଙ୍ଗିରୀ ବଡ଼ପୋଖରୀ ଆଦିରେ ସକାଳ ୬ଟାରୁ ୧୦ଟା ପର୍ଯ୍ୟନ୍ତ ପକ୍ଷୀ ଗଣନା ହୋଇଥିଲା। ୨୦୨୦ରେ ୪୪୨୬ ଏବଂ ୨୦୨୧ରେ ୫୮୯୨ ଏବଂ ୨୦୨୨ରେ ୬୯୦୦ ବହିରାଗତ ପକ୍ଷୀ ଗଣନା ହୋଇଥିଲା। ଜଳବାୟୁ ପରିବର୍ତ୍ତନ, ଜଙ୍ଗଲ ଓ ଜଳାଶୟ ପରିମାଣ ହ୍ରାସ, ପକ୍ଷୀ ଶିକାର ଆଦି କାରଣରୁ ଚଳିତବର୍ଷ କମ୍ ପକ୍ଷୀ ଆସିଥିବା କୁହାଯାଇଛି। ଚଳିତବର୍ଷ ୨୦ ଟିମ୍ ପକ୍ଷୀ ଗଣନାରେ ନିୟୋଜିତ ଥିଲେ। ଏଥର କେତେ ସଂଖ୍ୟାରେ ଏବଂ କେଉଁ କେଉଁ ପ୍ରଜାତିର ବିଦେଶାଗତ ପକ୍ଷୀ ଆସିଛନ୍ତି, ଗଣନା ସଂଖ୍ୟା ମିଳିବା ପରେ ପ୍ରକୃତ ସଂଖ୍ୟା ଜଣାପଡ଼ିବ ବୋଲି ଡିଏଫ୍ଓ ଧନରାଜ ଏଚ୍.ଡି. କହିଛନ୍ତି। ଚଳିତବର୍ଷ କେନ୍ଦୁଝର ସହରର ମାଧପୁରସ୍ଥିତ ୧୫ ନମ୍ବର ୱାର୍ଡର ଫାର୍ମ ପୋଖରୀରେ ବିରଳ ହଂସ ଲେସର ହୁଇସଲିଂ ପକ୍ଷୀ ଆଗମନ ହେବା ପରେ ଏହି ପୋଖରୀରେ ପ୍ରଥମଥର ପାଇଁ ଗଣନା କରାଯାଇଛି। ପାଟଣା ରେଞ୍ଜ୍ରେ କ୍ଷୀରେଇଟାଙ୍ଗିରୀ ସେକ୍ସନ କ୍ଷୀରେଇଟାଙ୍ଗିରୀ ବଡ଼ବନ୍ଧକୁ ମୋଟ ୧୩ଟି ପକ୍ଷୀଙ୍କ ଆଗମନ ହୋଇଛି। ଚଳିତବର୍ଷ ବିଦେଶୀ ପକ୍ଷୀ ଏଠାକୁ ଆସି ନ ଥିବା ରେଞ୍ଜର ଘାସିନାଥ ପାତ୍ର କହିଛନ୍ତି। ମାତ୍ରାଧିକ ପ୍ରଦୂଷଣ ଏବଂ ଏହି ବନ୍ଧ ନିକଟ ଦେଇ ୪୯ ନମ୍ବର ଜାତୀୟ ରାଜପଥରେ ହଜାର ହଜାର ଗାଡ଼ି ମୋଟର ଚଳାଚଳ କରୁଥିବାରୁ ଏଥର ଏହି ରେଞ୍ଜ୍କୁ ଖୁବ୍ କମ୍ ସଂଖ୍ୟକ ପକ୍ଷୀଙ୍କ ଆଗମନ ହୋଇଥିବା ସେ ଅନୁମାନ କରିଛନ୍ତି। ରେଞ୍ଜର ପାତ୍ରଙ୍କ ସହ କ୍ଷୀରେଇଟାଙ୍ଗିରୀ ବନପାଳ ସୁନିତା ବଘେଲ ଏବଂ ପାରାଷ୍ଟାଫ ପକ୍ଷୀ ଗଣନା କାର୍ଯ୍ୟରେ ନିୟୋଜିତ ଥିଲେ।