ବେଙ୍ଗାଲୁରୁ,୧୩ା୧୧: ନ୍ୟୁଜିଲାଣ୍ଡ ବିପକ୍ଷ ସେମିଫାଇନାଲ ମ୍ୟାଚ୍ ପୂର୍ବରୁ ଟିମ୍ ଇଣ୍ଡିଆ ଉପରେ ଚାପ ରହିବ ବୋଲି କହିଛନ୍ତି ମୁଖ୍ୟ କୋଚ୍ ରାହୁଲ ଡ୍ରାଭିଡ୍। ବୁଧବାର ମ୍ୟାଚ୍ ଉଭୟ ଦଳ ପାଇଁ ଚାପ ସୃଷ୍ଟି କରିବ ତେଣୁ ଏହାକୁ ସ୍ବୀକାର କରିବାରେ କୌଣସି ଅସୁବିଧା ନାହିଁ ବୋଲି ଡ୍ରାଭିଡ କହିଛନ୍ତି।
କ୍ରିକେଟରେ କୌଣସି ମ୍ୟାଚ ଆପଣଙ୍କୁ ଶତ ପ୍ରତିଶତ ଗ୍ୟାରେଣ୍ଟି ପ୍ରଦାନ କରି ନ ଥାଏ। ତେଣୁ ଆମକୁ ଶ୍ରେଷ୍ଠ ପ୍ରସ୍ତୁତି ସହ ପଡ଼ିଆକୁ ଓହ୍ଲାଇବାକୁ ପଡ଼ିବ। ନିରନ୍ତର ଭାବେ ଆମେ ଏହା କରିବା ସହିତ ୯ଟି ଲିଗ୍ ମ୍ୟାଚ୍ରେ ବିଜୟୀ ହୋଇଛୁ। ଆଉ ଥରେ ଏଭଳି କରିବା ଦ୍ୱାରା ଆମେ ଫାଇନାଲରେ ପହଞ୍ଚି ପାରିବୁ।
ବର୍ତ୍ତମାନ ସମସ୍ତେ ଭାରତୀୟ ଦଳର ପ୍ରଶଂସା କରୁଥିବା ବେଳେ ଗୋଟିଏ ଖରାପ ମ୍ୟାଚ୍ ହିଁ ସମସ୍ତଙ୍କ ମତାମତ ପରିବର୍ତ୍ତନ କରିବା ପାଇଁ ଯଥେଷ୍ଟ। ତେବେ ଟୁର୍ନାମେଣ୍ଟର ଶେଷ ଆଡକୁ ଶ୍ରେୟସ ଆୟର ଫର୍ମକୁ ଫେରିବା ଆମ ଶୁଭ ସଙ୍କେତ ବୋଲି ଡ୍ରାଭିଡ୍ କହିଛନ୍ତି।