ଡେରାବିଶ, ୬।୧୧(ସ୍ବ.ପ୍ର.): କଚ୍ଚାଘର ଥିବା ପରିବାରକୁ ବାସଗୃହ ଯୋଜନାରେ ସାମିଲ କରିବାକୁ ରାଜ୍ୟ ଓ କେନ୍ଦ୍ର ସରକାର ବହୁ ଯୋଜନା କରିଛନ୍ତି। ଅର୍ଥାଭାବରୁ ନିଜର ଘର ଖଣ୍ଡିଏ କରି ନ ପାରି ନିଜର ପରିବାରକୁ ଧରି ବିଦ୍ୟାଳୟ ଗୃହରେ ମୁଣ୍ଡ ଗୁଞ୍ଜିଛନ୍ତି ପରିବାରର ୪ ସଦସ୍ୟ। ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି କେନ୍ଦ୍ରାପଡ଼ା ବ୍ଲକ ଅଧୀନ ଭାଗବତପୁର ପଞ୍ଚାୟତ ମେଳକସାହି ଛାଡ଼ିଥିଲେ ଗାଁରେ। ଗାଁର ପଦ୍ମ ଚରଣ ରାଉତ ନିଜର ଘର ଖଣ୍ଡିଏ ନ ଥିବାରୁ ପକ୍ଷାଘାତରେ ପୀଡ଼ିତ ସ୍ତ୍ରୀ ଓ ଦୁଇ ଝିଅଙ୍କୁ ଧରି ମେଳକସାହି ପ୍ରାଥମିକ ବିଦ୍ୟାଳୟରେ ଦୀର୍ଘଦିନ ହେବ ଆଶ୍ରୟ ନେଇଛନ୍ତି। ନିଜେ ଅସୁସ୍ଥ ଥିବାରୁ ପଦ୍ମଚରଣ କୌଣସି କାର୍ଯ୍ୟ କରିବାକୁ ସକ୍ଷମ ନୁହନ୍ତି। ପେଟକୁ ମୁଠାଏ ଦାନା ଓ ମୁଣ୍ଡ ଗୁଞ୍ଜିବାକୁ ବାସସ୍ଥାନ ଚିନ୍ତାରେ ଥିବା ପଦ୍ମଚରଣଙ୍କର ଦୁଃଖ ଏତିକିରେ ସରିନାହିଁ। ସ୍ତ୍ରୀ ପ୍ରମିଳା (୬୨) ଏହି ସମୟ ମଧ୍ୟରେ ଅର୍ଥାଭାବ ଚିନ୍ତାରେ ହଠାତ୍ ପକ୍ଷାଘାତ ରୋଗରେ ଆକ୍ରାନ୍ତ ହୋଇପଡ଼ିଥିଲେ। ପ୍ରମିଳାଙ୍କୁ ସ୍ବାସ୍ଥ୍ୟସେବା ଯୋଗାଇବା ଭଳି ପରିସ୍ଥିତିରେ ନ ଥିବା ପଦ୍ମଚରଣଙ୍କ ପରିବାରରେ ୫ ଝିଅ। ବହୁ କଷ୍ଟରେ ତିନୋଟି ଝିଅଙ୍କୁ ବିବାହ ଦେଇଥିବା ବେଳେ ସାନ ଦୁଇ ଝିଅ ପ୍ରଣତି, ପ୍ରଗତି, ପଦ୍ମଚରଣ ଓ ପ୍ରମିଳାଙ୍କ ସାହାରା ପାଲଟିଛନ୍ତି। ବିଦ୍ୟାଳୟ ବାରଣ୍ଡାରେ ରୋଷେଇ କରିବା ସହ ବିଦ୍ୟାଳୟର ଏକ ଗୃହରେ ଅଚଳ ଅବସ୍ଥାରେ ଥିବା ପ୍ରମିଳାଙ୍କ ସେବା କରୁଛନ୍ତି ଏହି ଦୁଇ ଝିଅ। ଡାକ୍ତରଖାନାରେ ଯାଇ ଚିକିତ୍ସିତ ହେବାକୁ ଅର୍ଥ ବାଧକ ସାଜିଛି ବୋଲି ଝିଅ ପ୍ରଣତି କହିଛନ୍ତି। ଗୋଟିଏ ସ୍ଥାନରେ କେବଳ ଏକ ଚେୟାର ଉପରେ ବସି ରହିଛନ୍ତି ପ୍ରମିଳା। ସ୍ଥାନୀୟ ସରପଞ୍ଚ ଧରଣୀଧର ଦାସ ନିଜେ ବିଦ୍ୟାଳୟକୁ ଆସି ପଦ୍ମଚରଣଙ୍କୁ ସହାୟତାର ହାତ ବଢ଼ାଇଛନ୍ତି। ଧରଣୀଧରଙ୍କ ସୂଚନା ଅନୁଯାୟୀ, ତହସିଲ କାର୍ଯ୍ୟାଳୟରୁ ଏହି ବିପନ୍ନ ପରିବାରଙ୍କୁ ପଲିଥିନ୍ ଯୋଗାଇ ଦିଆଯିବା ସହ ବ୍ଲକ ପ୍ରଶାସନ ପକ୍ଷରୁ ପଦ୍ମଚରଣଙ୍କୁ ତୁରନ୍ତ ବାସଗୃହ ଯୋଜନାରେ ସାମିଲ କରିବାକୁ ବିଡିଓଙ୍କୁ ଅନୁରୋଧ କରାଯାଇଛି। ତେବେ ବିଡିଓ ଅଶ୍ୱିନୀ କୁମାର ଦାସ କୁହନ୍ତି, ବାସଗୃହ ଯୋଜନାରେ ଥିବା ଯୋଗ୍ୟ ତାଲିକାରେ ପଦ୍ମଚରଣଙ୍କ ନାମ ଅନ୍ତର୍ଭୁକ୍ତ କରାଯାଇଛି। ଏଥିସହ ସେ ନିଜେ ଘଟଣା ସ୍ଥଳକୁ ଯାଇ ପଦ୍ମଚରଣ ଓ ତାଙ୍କ ପରିବାରର ସମସ୍ୟା ବିଷୟରେ ଆଲୋଚନା କରିଛନ୍ତି। ଏଥିସହ ଭାଙ୍ଗି ଯାଇଥିବା ଘରକୁ ମରାମତି କରିବା ପାଇଁ ପଦ୍ମଚରଣଙ୍କୁ ସହାୟତା କରିଥିବା ବିଡିଓ ଦାସ ସୂଚନା ଦେଇଛନ୍ତି। ତେବେ ନିଜ ପକ୍କା ଘର ଖଣ୍ଡିଏ କରି ସେହି ଛାତ ତଳେ ପରିବାର ସହ କେବେ ମୁଣ୍ଡ ଗୁଞ୍ଜିବେ ସେହି ଚିନ୍ତାରେ ପଦ୍ମଚରଣ ରହିଛନ୍ତି।