ଦୁବାଇ,୧୯।୧: ଗତ(୨୦୨୧)ବର୍ଷ ଲାଗି ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ପକ୍ଷରୁ ଶ୍ରେଷ୍ଠ ଟି୨୦ ଦଳ ଘୋଷଣା କରାଯାଇଛି। ଏହି ଦଳରେ ଗୋଟିଏ ହେଲେ ଭାରତୀୟ ଖେଳାଳିଙ୍କୁ ସ୍ଥାନ ମିଳିନାହିଁ। ପାକିସ୍ତାନ ଦଳର ଅଧିନାୟକ ବାବର ଆଜାମଙ୍କୁ ଏହି ଦଳର ନେତୃତ୍ୱ ଭାର ଦିଆଯାଇଛି।
ପାକିସ୍ତାନ ଅଧିନାୟକ ଗତବର୍ଷ ଟି୨୦ ଫର୍ମାଟରେ ଜବରଦସ୍ତ ଫର୍ମରେ ଥିଲେ। ମୋଟ ଉପରେ ସେ ୧୯ ମ୍ୟାଚ୍ ଖେଳି ୩୭.୫୬ ହାରରେ ଏକ ଶତକ ଓ ୯ ଅର୍ଦ୍ଧଶତକ ସହ ୯୩୯ ରନ୍ କରିଥିଲେ। ତାଙ୍କ ନେତୃତ୍ୱରେ ପାକିସ୍ତାନ ଟି୨୦ ବିଶ୍ୱକପ୍ ସେମିଫାଇନାଲରେ ପହଞ୍ଚିଥିଲା। ଏହା ବ୍ୟତୀତ ୨୦୨୧ ବର୍ଷର ଆଇସିସି ଟି୨୦ ଦଳରେ ଅଷ୍ଟ୍ରେଲିଆ ଦୁଇ (ମିଚେଲ ମାର୍ଶ ଓ ଜୋଶ୍ ହାଜେଲଉଡ୍) ଓ ପାକିସ୍ତାନ (ବାବର, ମହମ୍ମଦ ରିଜଓ୍ବାନ ଓ ଶାହୀନ ଆଫ୍ରିଦୀ) ଏବଂ ଦକ୍ଷିଣ ଆଫ୍ରିକାର (ଏଡେନ ମାରକ୍ରାମ, ଡେଭିଡ୍ ମିଲର, ତାବ୍ରେଜ ଶାମସି) ୩ ଲେଖାଏ ଖେଳାଳି ସ୍ଥାନ ପାଇଛନ୍ତି।
୨୦୨୧ର ଆଇସିସି ପୁରୁଷ ଟି୨୦ ଦଳ: ମହମ୍ମଦ ରିଜଓ୍ବାନ, ବାବର ଆଜାମ, ଏଡେନ ମାରକ୍ରାମ, ମିଚେଲ ମାର୍ଶ, ଡେଭିଡ୍ ମିଲର, ତାବ୍ରେଜ ଶାମସି, ଜୋଶ୍ ହାଜେଲଉଡ୍, ଓ୍ବାନିନ୍ଦୁ ହାସରଙ୍ଗା, ମୁସ୍ତାଫିଜୁର ରେହମାନ, ଶାହୀନ ଶାହା ଆଫ୍ରିଦୀ।
