ନୂଆଦିଲ୍ଲୀ, ୧୬।୯: ଗତ ୬ ମାସ ମଧ୍ୟରେ ଏଲ୍ଏସି କୌଣସି ଅନୁପ୍ରବେଶ ଘଟଣା ଘଟିନାହିଁ। ଏସମ୍ପର୍କରେ ସ୍ବରାଷ୍ଟ୍ର ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ ବୁଧବାରରେ ଏକ ପ୍ରଶ୍ନର ଉତ୍ତରରେ ରାଜ୍ୟ ସଭାରେ ଏଭଳି ସୂଚନା ଦେଇଛନ୍ତି। ଭାରତ ଚାଇନା ସୀମାରେ ଉତ୍ତେଜନା ଲାଗି ରହିଥିଲେ ମଧ୍ୟ କୌଣସି ଅନୁପ୍ରବେଶ ହୋଇ ନ ଥିବା ସେ କହିଛନ୍ତି। ପୂର୍ବ ଲଦାଖ ଅଞ୍ଚଳରେ ଭାରତ ଚାଇନା ମୁହାଁମୁହିଁ ହୋଇଛନ୍ତି। ଉଭୟ ପକ୍ଷ ସୀମାରେ ଅଧିକ ସୈନ୍ୟ ମୁତୟନ କରିଛନ୍ତି। ମାତ୍ର ଅନୁପ୍ରବେଶ ଘଟଣା ଘଟି ନ ଥିବା ସେ କହିଛନ୍ତି। ଅପର ପକ୍ଷରେ ଭାରତ ପାକିସ୍ତାନ ମଧ୍ୟରେ ଜମ୍ମୁ-କଶ୍ମୀରର ଏଲ୍ଓସିରେ ୨୦୨୦ ଫେବୃୟାରୀରୁ ଜୁନ୍ ମଧ୍ୟରେ ୪୭ ଥର ଅନୁପ୍ରବେଶ ଉଦ୍ୟମ ହୋଇଛି। ସେଥିମଧ୍ୟରୁ ଫେବୃୟାରୀରେ କୌଣସି ଘଟଣା ଘଟି ନାହିଁ। ମାର୍ଚ୍ଚରେ ୪ ଥର, ଏପ୍ରିଲ୍ରେ ୨୪ ଥର, ମେ’ରେ ୮ଥର ଏବଂ ଜୁନ୍ରେ ୧୧ ଥର ଅନୁପ୍ରବେଶ ଉଦ୍ୟମ ହୋଇଥିଲା ବୋଲି ନିତ୍ୟାନନ୍ଦ ରାୟ କହିଛନ୍ତି। ତେବେ ଭାରତୀୟ ଯବାନଙ୍କ ପାଲଟା ଜବାବରେ ଏହା ପଣ୍ଡ ହୋଇଥିବା ସେ କହିଛନ୍ତି। ଭାରତ ପାକିସ୍ତାନ ଏବଂ ଭାରତ ଚାଇନା ସୀମାରେ କେତେ ଥର ଅନୁପ୍ରବେଶ ଘଟଣା ଘଟିଥିବା ପ୍ରଶ୍ନରେ ସ୍ବରାଷ୍ଟ୍ର ରାଷ୍ଟ୍ରମନ୍ତ୍ରୀ ଏଭଳି ଉତ୍ତର ଦେଇଛନ୍ତି।