ନୟାଗଡ଼ ଅଫିସ,୨୧ା୨:ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟରେ ମାଗଣାରେ ଇନ୍ସୁଲିନ୍ ମିଳୁନି। ରୋଗୀ ୧୫ ଦିନ ହେଲା ନିରାମୟ କାଉଣ୍ଟର ସମ୍ମୁଖରେ ଧାଡିରେ ଛିଡା ହୋଇ ଅପେକ୍ଷା କରି କରି ଫେରୁଛନ୍ତି। ଏଭଳି ଅସୁବିଧାକୁ ସମାଧାନ କରାଯାଉ ନ ଥିବାରୁ ଅସନ୍ତୋଷ ବଢ଼ି ଚାଲିଛି। ରୋଗୀଙ୍କୁ କାଲି ଆସ, ପରଦିନ ଆସ କହି ବାରମ୍ବାର ଚିକିତ୍ସାଳୟକୁ ଦୌଡାଇ ହଇରାଣ କରାଯାଉଛି। ଚିକିତ୍ସାଳୟରେ ଇନ୍ସୁଲିନ୍ ମିଳୁ ନ ଥିବାବେଳେ ଡେପ୍ଲୟଡ ହୋଇଥିବା ଜଣେ ଫାର୍ମାସିଷ୍ଟ ଇନ୍ସୁଲିନ୍ ବିକ୍ରି କରୁଥିବା ଅଭିଯୋଗ ହେଉଛି। ଏପରିକି କିଛି ସରକାରୀ ଔଷଧକୁ ମଧ୍ୟ ବିକ୍ରି କରୁଥିବା ଅଭିଯୋଗ ରହିଛି। ଅଭିଯୋଗ ସତ୍ୟ ହେଲେ ଫାମାସିଷ୍ଟ କେଉଁଠୁ, କିପରି ଇନ୍ସୁଲିନ୍ ଓ ସରକାରୀ ଔଷଧ ପାଉଛନ୍ତି ତା’ର ତଦନ୍ତ ହେବା ଦରକାର। ନିରାମୟ କାଉଣ୍ଟରରେ ଇନ୍ସୁଲିନ ନ ମିଳିବା ଓ ରୋଗୀଙ୍କୁ ଫାର୍ମାସିଷ୍ଟ ଇନ୍ସୁଲିନ୍ ବିକ୍ରି କରିବା ଘଟଣା ସରକାରଙ୍କ ମାଗଣା ଔଷଧ ଯୋଗାଣକୁ ପ୍ରହସନରେ ପରିଣତ କରିଛି। ପ୍ରଶ୍ନ ଉଠୁଛି ୧୫ ଦିନ ହେଲା ଇନ୍ସୁଲିନ୍ କାହିଁକି ରୋଗୀଙ୍କୁ ଦିଆଯାଉନି। ଯଦି ଷ୍ଟକ ଆସିନି ବଜାରରୁ କିଣି କରି ଦିଆଯିବାର କାହିଁକି ବ୍ୟବସ୍ଥା କରାଯାଉନି। ୧୫ଦିନ ହେଲା ରୋଗୀ ଇନ୍ସୁଲିନ୍ ନେବା ପାଇଁ ଚିକିତ୍ସାଳୟକୁ କାହିଁକି ଦୌଡୁଛନ୍ତି। ଅନ୍ୟପକ୍ଷେ ଜଣେ ଡେପ୍ଲୟଡ ଫାମସିଷ୍ଟ ଇନ୍ସୁଲିନ୍ ବିକ୍ରିି କରୁଥିଲେ ମଧ୍ୟ ତାଙ୍କ ଉପରେ କାହିଁକି କାର୍ଯ୍ୟାନୁଷ୍ଠାନ ହେଉନି ବୋଲି ରୋଗୀମାନେ ଅଭିଯୋଗ କରିଛନ୍ତି। ନୟାଗଡ଼ର ସିତା ସ୍ବାଇଁ କୁହନ୍ତି, ମୋ ଶ୍ୱଶୁରଙ୍କର ଇନ୍ସୁଲିନ୍ ଦରକାର। ଜିଲା ମୁଖ୍ୟ ଚିକିତ୍ସାଳୟକୁ ବାରମ୍ବାର ଦୌଡି ଫେରିବାକୁ ପଡୁଛି। ଗୋଡିପଡ଼ାର ମାନସ ମିଶ୍ର କୁହନ୍ତି, ମୋ ନନାଙ୍କର ଡାଇବେଟିସ୍ ଅଛି। ସେ ଇନ୍ସୁଲିନ୍ ନେଉଛନ୍ତି। ହେଲେ ଜିଲା ମୁଖ୍ୟ ଚିକିତ୍ସାଳୟରେ ଇନ୍ସୁଲିନ୍ ମିଳୁନାହିଁ। ଇନ୍ସୁଲିନ୍ ପାଇଁ ନୟାଗଡ଼ ବାରମ୍ବାର ଦୌଡିବାକୁ ପଡୁଥିଲେ ମଧ୍ୟ ହଇରାଣ ହେବାକୁ ପଡୁଛି। ଜିଲା ମୁଖ୍ୟ ଚିକିତ୍ସାଳୟର ଜଣେ କର୍ମଚାରୀ ନଁା ଗୋପନ ରଖି କହିଛନ୍ତି ଇନ୍ସୁଲିନ୍ ବିକ୍ରି କରିବା ଠିକ୍ ନୁହେଁ। ନିଜର ଖାସ୍ ଲୋକଙ୍କୁ ଇନ୍ସୁଲିନ୍ ମାଗଣାରେ ଦିଆଯାଉଛି। କେତେଜଣ ଲୋକଙ୍କୁ ମଧ୍ୟ ବିକ୍ରି ହେଉଛି। ଜଣେ ଫାମସିଷ୍ଟ ବେଆଇନ କାର୍ଯ୍ୟ କରୁଥିଲେ ମଧ୍ୟ ପଦକ୍ଷେପ ନିଆଯାଉ ନ ଥିବା କହିଛନ୍ତି। ସିଡିଏମ୍ଓ ମକରନ୍ଦ ବେଉରାଙ୍କୁ ପଚାରିବାରେ ଇନ୍ସୁଲିନ୍ ମିଳୁନି ବୋଲି ମୋ ପାଖରେ ଖବର ନାହିଁ। ତୁରନ୍ତ ଏହାର ପ୍ରତିକାର କରାଯିବ। ଅନ୍ୟପକ୍ଷେ ଫାମସିଷ୍ଟ ଇନ୍ସୁଲିନ୍ ବିକ୍ରି କରୁଥିବା ଅଭିଯୋଗ ମିଳିନାହିଁ। ତେବେ ଏହାର ତଦନ୍ତ କରାଯାଇ ପଦକ୍ଷେପ ନିଆଯିବ ବୋଲି ସେ କହିଛନ୍ତି। ଜିଲାପାଳ ରବୀନ୍ଦ୍ର ନାଥ ସାହୁଙ୍କୁ ପଚାରିବାରେ ଏ ସମ୍ପର୍କରେ ସିଡିଏମ୍ଓଙ୍କ ସହ କଥା ହୋଇ ପଦକ୍ଷେପ ନିଆଯିବ ବୋଲି ସେ କହିଛନ୍ତି।