ଢାକା, ୨୬।୧୦: କରୋନା ମହାମାରୀ ସଂକ୍ରମଣକୁ ରୋକିବା ଲାଗି ବାଂଲାଦେଶ ସରକାର ନୂଆ ଆଇନ ପ୍ରଣୟନ କରିଛନ୍ତି। ଏଣିକି ମାସ୍କ ପିନ୍ଧି ନ ଥିବା ଲୋକଙ୍କୁ କୌଣସି ସରକାରୀ ସୁବିଧା ସୁଯୋଗ ମିଳିବନି ବୋଲି ସରକାରଙ୍କ ପକ୍ଷରୁ ଘୋଷଣା କରାଯାଇଛି। ପ୍ରଧାନମନ୍ତ୍ରୀ ଶେଖ୍ ହାସିନାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା କ୍ୟାବିନେଟ୍ ବୈଠକରେ ଏଭଳି ନିଷ୍ପତ୍ତି ଗ୍ରହଣ କରାଯାଇଛି। ମାସ୍କ ନ ପିନ୍ଧି କୌଣସି ବ୍ୟକ୍ତି ସରକାରୀ କାର୍ଯ୍ୟାଳୟରେ ପ୍ରବେଶ କରି ପାରିବେ ନାହିଁ। ଏସମ୍ପର୍କରେ କ୍ୟାବିନେଟ୍ ସଚିବ ଖଣ୍ଡେକର ଅନଓ୍ବାରୁଲ୍ ଇସ୍ଲାମ୍ ସୂଚନା ଦେଇଛନ୍ତି। ସମସ୍ତ ସର୍ବସାଧାରଣ ସ୍ଥଳ, ଧାର୍ମିକ ଅନୁଷ୍ଠାନ, ଶପିଂ ମଲ୍, ଶିକ୍ଷାନୁଷ୍ଠାନ ଆଦିରେ ବିନା ମାସ୍କରେ କାହାକୁ ପ୍ରବେଶ କରିବାକୁ ଅନୁମତି ମିଳିବ ନାହିଁ ବୋଲି ସେ କହିଛନ୍ତି।
