ଆଳି,୨୪ା୮(ଡି.ଏନ.ଏ.): ଚଳିତବର୍ଷ ମାଟ୍ରିକ ପାସ କରିଥିବା ଛାତ୍ରୀଛାତ୍ରମାନଙ୍କୁ ସାର୍ଟିଫିକେଟ ଦେବା ନିମନ୍ତେ ଜୋରଜବରଦସ୍ତ ବିଦ୍ୟାଳୟର ଶିକ୍ଷୟତ୍ରୀଶିକ୍ଷକ ୨୦୦ରୁ ୪୦୦ଟଙ୍କା ମାଗୁଛନ୍ତି। ଯେଉଁ ଛାତ୍ରୀଛାତ୍ର ଟଙ୍କା ଦେଉଛନ୍ତି ତାଙ୍କୁ ସାର୍ଟିଫିକେଟ ମିଳୁଛି। ଯିଏ ଟଙ୍କା ଦେଉନି ତାକୁ ସାର୍ଟିଫିକେଟ ଦିଆଯାଉନି। ଏପରିକି ସେମାନଙ୍କୁ ଟଙ୍କା ପାଇଁ ଦୁର୍ବ୍ୟବହାର କରା ଯାଉଥିବା ନେଇ ଅଭିଯୋଗ ଆଣିଛନ୍ତି ପାସ୍ କରିଥିବା ଛାତ୍ରୀଛାତ୍ର। ଏଭଳି ଏକ ସଙ୍ଗୀନ ଅଭିଯୋଗ ଆସିଛି କେନ୍ଦ୍ରପଡ଼ା ଜିଲା ଆଳି ବ୍ଲକ ଶେଷ ସୀମା ପାଳିମୀ ପଞ୍ଚାୟତରେ ଥିବା ଜନତା ନୋଡାଲ ସରକାରୀ ଉଚ୍ଚ ବିଦ୍ୟାଳୟରୁ। ଚଳିତଥର ବିଦ୍ୟାଳୟରୁ ମାଟ୍ରିକ ପାସ କରିଥିବା କିରଣ କୁମାର ସେଠୀ, ଅବିନାଶ ଧଳ, ରୋମାଲି ବେହେରା, ସାଗର ସାହୁ, ଜ୍ଞାନ ରଞ୍ଜନ ସାହୁ, ସରୋଜ ବେହେରା, ସୁବ୍ରତ ବେହେରା, ଦୁର୍ଗା ପ୍ରସାଦ ପଣ୍ଡା ଓ ଅବିନାଶ ଦାସ ପ୍ରମୁଖ ଛାତ୍ରୀଛାତ୍ରମାନେ ଏଭଳି ଅଭିଯୋଗ କରିଛନ୍ତି। ସେମାନେ ଚଳିତ ଥର ମାଟ୍ରିକ ପାସ କରିଛନ୍ତି। କଲେଜରେ ଆଡ଼ମିଶନ ନିମନ୍ତେ ମାଟ୍ରିକ ସାର୍ଟିଫିକେଟ ଦରକାର। ସ୍କୁଲକୁ ସାର୍ଟିଫିକେଟ ଆସିବା ପରେ ସେମାନେ ନେବାକୁ ଯାଇଥିଲେ। ହେଲେ ବିଦ୍ୟାଳୟ ପକ୍ଷରୁ ସାର୍ଟିଫକେଟ ବାବଦକୁ ୨୦୦ ଟଙ୍କା ଆଣିବାକୁ କୁହାଯାଇଥିଲା। ମାତ୍ର ସେମାନେ ସାର୍ଟିଫିକେଟ ବାବଦରେ କୌଣସି ଦେୟ ଦେବାକୁ ପଡ଼େନାହିଁ ବୋଲି କହିବା ସହ ୨୦୦ ଟଙ୍କା ଦେବାକୁ ମନା କରିବାରୁ ବିଦ୍ୟାଳୟର କେତେଜଣ ଶିକ୍ଷୟିତ୍ରୀଶିକ୍ଷକ ଦୁର୍ବ୍ୟବହାର କରିଛନ୍ତି ବୋଲି ଛାତ୍ରୀଛାତ୍ର ଅଭିଯୋଗ କରିଛନ୍ତି। କେତେଜଣ ଛାତ୍ରୀଛାତ୍ର କଲେଜରେ ଆଡମିଶନ କରିବା ଲାଗି ବାଧ୍ୟ ହୋଇ ଧାରକରଜ କରି ୨୦୦ ଟଙ୍କା ଦେଇ ସାର୍ଟିଫିକେଟ ନେଇଛନ୍ତି। ଯେଉଁମାନେ ଟଙ୍କା ଦେଲେ ନାହିଁ ସେମାନଙ୍କୁ ସାର୍ଟିଫିକେଟ ନ ଦେଇ ଫେରାଇ ଦିଆଯାଇଛି। ଏହାକୁ ନେଇ ଛାତ୍ରୀଛାତ୍ର ଓ ଅଭିଭାବକମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଅବିଭାବକ ସେବତୀ ବେହେରାଙ୍କୁ ପଚାରିବାରେ ମୋ ଝିଅ ରିଆଶ୍ରୀ ଚଳିତ ବର୍ଷ ମାଟ୍ରିକ ପାସ୍ କରିଛି। କଲେଜରେ ଆଡମିଶନ କରିବା ପାଇଁ ସେ ସ୍କୁଲ ମଙ୍ଗଳବାର ସାର୍ଟିଫିକେଟ ଆଣିବାକୁ ଯାଇଥିଲା। ହେଲେ ସ୍କୁଲରେ ୨ଶହ ଯଙ୍କା ନ ଦେଲେ ସାର୍ଟିଫିକେଟ ଦେବେ ନାହିଁ କହି ଫେରାଇ ଦେଲେ। ମୋର ଅଭାବୀ ସଂସାର, ବହୁ କଷ୍ଟରେ ୨ ଶହ ଟଙ୍କା ଯୋଗାଡ କରି ସାର୍ଟିଫିକେଟ ଆଣିଲି। ଏହା ଶିକ୍ଷକମାନଙ୍କ ଠିକ୍ କାର୍ଯ୍ୟ ନୁହେଁ। ଏ ସଂକ୍ରାନ୍ତରେ ପ୍ରଧାନ ଶିକ୍ଷକ ମନ୍ମଥ କୁମାର ଶିଅଳଙ୍କୁ ମୋବାଇଲ ଫୋନ ନଂ. ୭୯୭୮୭୬୨୬୫୬କୁ ବାରମ୍ବାର କଲ କରିବା ସତ୍ତ୍ୱେ ସେ ଉଠାଇ ନ ଥିଲେ। ଏ ସମ୍ପର୍କରେ ଆଳି ଶିକ୍ଷା ମଣ୍ଡଳ ଅଧିକାରୀ ସରୋଜକାନ୍ତ ବିହାରୀଙ୍କୁ ପଚାରିବାରୁ ସେ ଏ ନେଇ ଜିଲା ଶିକ୍ଷା ଅଧିକାରୀଙ୍କ ସହ ଯୋଗାଯୋଗ କରିବାକୁ କହି ଫୋନ କାଟି ଦେଇଥିଲେ। ସରକାର ଶିକ୍ଷାନୁଷ୍ଠାନରେ ଛାତ୍ରୀଛାତ୍ରଙ୍କୁ ଉତ୍ତମ ଶିକ୍ଷା ଦେବାକୁ ବିଦ୍ୟାଳୟକୁ ୫-ଟିରେ ଅନ୍ତର୍ଭୁକ୍ତ କରି ରୂପାନ୍ତୀକରଣ କରୁଛନ୍ତି। ହେଲେ ଛାତ୍ରୀଛାତ୍ରଙ୍କ ନିକଟରୁ ଜୋର ଜବରଦସ୍ତ ମାଟ୍ରିକ ସାର୍ଟିଫିକେଟ ବାବଦରେ ଟଙ୍କା ଆଦାୟ କରିବା କେତେ ଯୁକ୍ତିଯୁକ୍ତ ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି।