ମାଥିଲି,୨୫ା୨ (ଡି.ଏନ.ଏ.): ମାଲକାନଗିରି ଜିଲା ମାଥିଲି ବ୍ଲକ ସଦର ମହକୁମାସ୍ଥିତ ସରକାରୀ ଚିକିତ୍ସାଳୟକୁ ସରକାର ଉପଖଣ୍ଡ ଚିକିତ୍ସାଳୟ ମାନ୍ୟତା ଦେଇଥିଲେ। ୨୦୨୧ରୁ ଏହି ମାନ୍ୟତା ମିଳିଥିଲେ ମଧ୍ୟ ଏଯାଏ ଚିକିତ୍ସାଳୟରେ ମୃତଦେହ ବ୍ୟବଚ୍ଛେଦ ଲାଗି ଗୃହଟିଏନାହିଁ। ବ୍ଲକର ୨୦ ପଞ୍ଚାୟତର ୧ଲକ୍ଷ ୧୧ ହଜାର ୧୪୫ ଲୋକ ସ୍ବାସ୍ଥ୍ୟସେବା ପାଇଁ ଏହି ଚିକିତ୍ସାଳୟ ଉପରେ ନିର୍ଭର କରନ୍ତି। ପଡୋଶୀ ଖଇରପୁଟ ବ୍ଲକର ୮୦ ହଜାର ୮୭୩ ଲୋକ ମଧ୍ୟ ଏହା ଉପରେ ନିର୍ଭର କରିଥାନ୍ତି। ମାତ୍ର ଏଠାରେ ସ୍ବାସ୍ଥ୍ୟସେବା ପାଇଁ ଅନୁସାଙ୍ଗିକ ବ୍ୟବସ୍ଥା ନାହିଁ। ଡାକ୍ତର ଓ କର୍ମଚାରୀଙ୍କ ଅଭାବ ଲାଗିରହିଛି। ସାମାନ୍ୟ ରୋଗ ପାଇଁ ରୋଗୀ ମାଲକାନଗିରି ଜିଲା ମୁଖ୍ୟ ଚିକିତ୍ସାଳୟ ଓ କୋରାପୁଟ ଶହୀଦ ଲକ୍ଷ୍ମଣ ନାୟକ ମେଡିକାଲ କଲେଜ ଉପରେ ନିର୍ଭର କରିଥାନ୍ତି। ଏନେଇ ବିଭିନ୍ନ ସମୟରେ ଜନଅସନ୍ତୋଷ ପ୍ରକାଶ ପାଇଛି। ମାତ୍ର ବ୍ୟବସ୍ଥାରେ କୌଣସି ସୁଧାର ଆସିନାହିଁ। କୌଣସି ଦୁର୍ଘଟଣାଜନିତ ମୃତ୍ୟୁ ଘଟିଲେ ଏଠାରେ ମୃତଦେହ ବ୍ୟବଚ୍ଛେଦ ଲାଗି ଗୃହଟିଏ ନାହିଁ। ପ୍ରତେହ ୧୦ରୁ ୧୫ଟି ମୃତଦେହ ବ୍ୟବଚ୍ଛେଦ ପାଇଁ ଏହି ଡାକ୍ତରଖାନାକୁ ଆସିଥାଏ। ମାତ୍ର ମୃତଦେହ ବ୍ୟବଚ୍ଛେଦ ଗୃହ ନ ଥିବାରୁ ଜଙ୍ଗଲରେ ଖୋଲା ଆକାଶତଳେ ମୃତଦେହ ବ୍ୟବଚ୍ଛେଦ ହେଉଥିବା ଦେଖିବାକୁ ମିଳୁଛି। ଏନେଇ ସ୍ଥାନୀୟ ଲୋକେ ଅନେକଥର ଜିଲା ଓ ବ୍ଲକ ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ ମଧ୍ୟ କିଛି ସୁଫଳ ମିଳିନାହିଁ। ଚଳିତ ମାସ ୧୪ ତାରିଖରେ କୋରାପୁଟ ଜିଲା ବୈପାରିଗୁଡା ଥାନା ରାମଗିରି ପଞ୍ଚାଯତ ଅନ୍ତର୍ଗତ ପୂଜାରୀପୁଟ ଗ୍ରାମର ନରସିଂହ ପୂଜାରୀ ଓ ଲଇଖନ ଭୂମିଆ ତେନ୍ତୁଳିଗୁମ୍ମା ଓ ଲୁଲେରରେ ଥିବା ନିଜ ସମ୍ପର୍କୀୟଙ୍କ ଘରକୁ ଦଶାହ ଖବର ଦେବାକୁ ଯାଇ ଉଦୟଗିରିଠାରେ ଦୁର୍ଘଟଣାର ସମ୍ମୁଖୀନ ହୋଇଥିଲେ। ଏଥିରେ ଉଭୟଙ୍କ ମୃତ୍ୟୁ ହୋଇଥିଲା। ଅନ୍ୟଜଣେ କମାରପାଲି ପଞ୍ଚାୟତ ମୁଣ୍ଡାଗୁଡା ଗ୍ରାମର ରତନ ଭୂମିଆଙ୍କ ମଧ୍ୟ ପୋଖରୀରେ ବୁଡି ମୃତ୍ୟୁ ହୋଇଥିଲା। ଗୋଟିଏ ଦିନରେ ମାଥିଲି ଉପଖଣ୍ଡ ଚିକିତ୍ସାଳୟରେ ତିନିଟା ମୃତଦେହ ବ୍ୟବଚ୍ଛେଦ ଲାଗି ପହଞ୍ଚତ୍ଥିଲା। ଚିକିତ୍ସାଳୟରେ ମୃତଦେହ ବ୍ୟବଚ୍ଛେଦ ଗୃହ ନ ଥିବାରୁ ଡାକ୍ତରମାନେ ନିକଟସ୍ଥ ଜଙ୍ଗଲରେ ଖୋଲା ଆକାଶ ତଳେ ମୃତଦେହ ବ୍ୟବଚ୍ଛେଦ କରିଥିଲେ। ମୃତଦେହ ବ୍ୟବଚ୍ଛେଦ ପାଇଁ ଭିତ୍ତିଭୂମି ନ ଥିବାରୁ ଡାକ୍ତରମାନଙ୍କୁ ଅଯଥା ଅନେକ ସମୟ ନଷ୍ଟ କରିବାକୁ ପଡୁଛି। ଚିକିତ୍ସାଳୟରେ ରୋଗୀ ସେବା ମଧ୍ୟ ଏଥିପାଇଁ ବାଧାପ୍ରାପ୍ତ ହେଉଛି। ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେଇ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି।