ପଦ୍ମପୁର,୨୧।୧୧(ଡି.ଏନ.ଏ.): ପଦ୍ମପୁର ନିର୍ବାଚନ ମଣ୍ଡଳୀର ପଲସାପାଲିଠାରେ ବିଜେଡିର ଏକ ମିଶ୍ରଣ ପର୍ବ ଅନୁଷ୍ଠିତ ହୋଇଥିଲା। ବିଜେଡି ପ୍ରାର୍ଥିନୀ ବର୍ଷା ସିଂ ବରିହାଙ୍କ ସମେତ ପୂର୍ବତନ ଏମ୍ପି ପ୍ରଦୀପ ମାଝୀ, ମନ୍ତ୍ରୀ ରୀତା ସାହୁ ଉପସ୍ଥିତ ଥିଲେ। ଏଥିରେ ପଲସାପାଲି ସରପଞ୍ଚ ଭାସ୍କର ଭୁଏ ନିଜ ସମର୍ଥକମାନଙ୍କ ସହିତ ବିଧିବଦ୍ଧ ଭାବେ ବିଜେଡିରେ ଯୋଗଦାନ କରିଥିଲେ। ଏହାସହ ଦଳ ତରଫରୁ ଘନାମାଲ, ଦକ୍ଷିଣ ନୂଆଁପାଲି, ସାରଙ୍କପୁର, ଅମାମୁଣ୍ଡା ଗାଁରେ ସଭାମାନ ଆୟୋଜନ କରାଯାଇଥିଲା। ସେହିପରି ପଦ୍ମପୁର ନିର୍ବାଚନ ମଣ୍ଡଳୀର ୨ ନମ୍ବର ଜିଲା ପରିଷଦ ଜୋନ୍ ଅଧୀନ ୮ଟି ପଞ୍ଚାୟତରେ ରବିବାର ବିଜେଡି ପ୍ରାର୍ଥତ୍ନୀ ବର୍ଷା ସିଂ ବରିହା ମାରାଥନ ପ୍ରଚାର କରିଛନ୍ତି। ପଦ୍ମପୁର ନିର୍ବାଚନ ମଣ୍ଡଳୀର ବିକାଶଧାରାକୁ କେହି ରୋକି ପାରିବେନାହିଁ। ଏଥିପାଇଁ ଜନସାଧାରଣ ଏବଂ ମୋର ସ୍ବର୍ଗତ ପିତାଙ୍କ ଆଶୀର୍ବାଦ ମୋ ଉପରେ ରହିଛି ବୋଲି ବର୍ଷା କହିଛନ୍ତି। ଏହି ଅବସରରେ ବିଧାୟକ ପ୍ରତାପ ଜେନା, ଦେବେଶ ଆଚାର୍ଯ୍ୟ, ମହେନ୍ଦ୍ର ବଢେଇ, ଶ୍ରୀମୟୀ ମିଶ୍ର, ସଂଗ୍ରାମ ପାଇକରାୟ, ଏନ୍ଏସି ଉପାଧ୍ୟକ୍ଷା ଭାରତୀ ପଟ୍ଟନାୟକ, ପୂର୍ବତନ ସରପଞ୍ଚ ସୁଦାମ ପଧାନ ପ୍ରମୁଖ ପ୍ରଚାରରେ ସାମିଲ ହୋଇଥିଲେ।
