କୋରାପୁଟ,୧୬ା୩(ଅମିତାଭ ବେହେରା): ହୋଲି ସାରାଦେଶରେ ମହାଆଡ଼ମ୍ବରରେ ପାଳିତ ହୋଇଥିବା ବେଳେ ଅବକାରୀ ବିଭାଗ ଓ ମଦ ବ୍ୟବସାୟୀମାନଙ୍କ ମଧୁଚନ୍ଦ୍ରିକା ଯୋଗୁ ସରକାରୀ ନିୟମକୁ ଫୁ’ କରି ଦେଇ ସହରର ସମସ୍ତ ମଦ ଦୋକାନ ଖୋଲାରହିବା ନେଇ ସାଧାରଣରେ ଘୋର ଅସନ୍ତୋଷ ପ୍ରକାଶ ପାଇଛି। ହୋଲି ପର୍ବ ଏକ ମହାନ ପର୍ବ ହୋଇଥିବା ବେଳେ ଏହି ପର୍ବ ସାରାଦେଶରେ ଆନନ୍ଦ ଉଲ୍ଲାସର ସହ ପାଳନ କରାଯାଉଥିବା ବେଳେ କୋରାପୁଟ ସହର ମଧ୍ୟ ଏହିରୁ ବାଦ୍ ପଡ଼ିନାହିଁ , କିନ୍ତୁ ଏହ ପର୍ବକୁ ଶାନ୍ତିଶୃଙ୍ଖଳାର ସହ ପାଳନ କରାଯିବା ନିମନ୍ତେ ସବୁସ୍ତରରେ ଉଦ୍ୟମ ଜାରି ରହିଥାଏ , ତେବେ ଏହି ଉତ୍ସବ ଶିଶୁଠାରୁ ବୃଦ୍ଧ, ବୃଦ୍ଧା, ବାଳିକା, ମହିଳା ଏମିତିକି ଜାତିଧର୍ମ ନିର୍ବିଶେଷରେ ସମସ୍ତେ ସାମିଲ ହୋଇ ଏହାକୁ ପାଳନ କରନ୍ତ। ଏହି ଦିବସରେ ମଦ୍ୟପାନ ଜନିତ କୌଣସି ଅପ୍ରୀତିକର ପରିସ୍ଥିତି ସୃଷ୍ଟି ନ ହେବା ପାଇଁ ସରକାରଙ୍କ ପକ୍ଷରୁ ଆଜି ଦିନକ ପାଇଁ ମଦ ଦୋକାନ ବନ୍ଦ କରିବା ନିମନ୍ତେ ନିର୍ଦେଶ ଥିବା କୁହାଯାଉଛି। ହେଲେ ଅସାଧୁ ବ୍ୟବସାୟୀ ଓ ଅବକାରୀ ବିଭାଗର ସଲାସୁତୁରାରେ ସହରର ସମସ୍ତ ମଦ ଦୋକାନ ବନ୍ଦ ପରିବର୍ତ୍ତେ ଖୋଲା ରଖା ଯାଇଥିବା ଦେଖିବାକୁ ମିଳିଥିଲା। ସେହିଭଳି ବସ୍ଷ୍ଟାଣ୍ଡରେ ଥିବା ଠିପି ବନ୍ଦ ମଦଦୋକାନ ପାଖରେ ଯିଏ ଖୋଲି ପିଇବ ତାକୁ ୫ ହଜାର ଟଙ୍କା ଜରିମାନା ଦେବା ପାଇଁ ଲେଖାଥିଲେ ବି ମଦ ଦୋକାନ ଆଗରେ ମଦ ପିଉଥିବା ଏବଂ ନିୟମ ଉଲଂଘନ କରି ମଦ ବିକ୍ରି କରିବା ଘଟଣା ସାଧାରଣରେ ଅସନ୍ତୋଷ ଦେଖାଦେଇଛି। ବସ୍ଷ୍ଟାଣ୍ଡ ଉପରେ ଏହି ଦୋକାନ ରହିଥିବାରୁ ଦିନ ଦ୍ୱିପ୍ରହରରେ ଖୋଲା ଖୋଲି ମଦ୍ୟ ପାନ କରାଯାଉଥିବାରୁ ଯାତ୍ରୀମାନେ ନିଜକୁ ସୁରକ୍ଷିତ ମଣୁନାହାନ୍ତି। ଏ ସମ୍ପର୍କରେ ଟାଉନ ଥାନା ଅଧିକାରୀଙ୍କୁ ଜଣାଇବାର ଅଧଘଣ୍ଟା ପରେ ବସ୍ଷ୍ଟାଣ୍ଡ ମଦ ଦୋକାନ ବନ୍ଦ ହୋଇଥିବା ବେଳେ ଅନ୍ୟ ଠିପି ବନ୍ଦ ମଦ ଦୋକାନଗୁଡ଼ିକ ଖୋଲା ରହିଥିଲା। ଜିଲାପାଳ ଏଦିଗରେ ଦୃଷ୍ଟି ଦେଇ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ବୁଦ୍ଧିଜୀବୀ ମହଲାରେ ଦାବି ହେଉଛି।
