ପୁଣେ,୨୬।୩ : ଇଂଲଣ୍ଡ ବିପକ୍ଷ ଦ୍ୱିତୀୟ ଦିନିକିଆ ମ୍ୟାଚ୍ରେ ଭାରତକୁ ଏଭଳି ପରାଜୟ ମିଳିଛି, ଯାହା କେହି ଆଶା କରି ନ ଥିଲେ। ଭାରତ ପକ୍ଷରୁ ଧାର୍ଯ୍ୟ ୩୩୭ ରନ୍ର ବିଶାଳ ବିଜୟ ଲକ୍ଷ୍ୟକୁ ଇଂଲଣ୍ଡ ୬.୪ ଓଭର ପୂର୍ବରୁ ୪ ଉଇକେଟ ହରାଇ ହାସଲ କରି ନେଇଛି ଭ୍ରମଣକାରୀ ଇଂଲଣ୍ଡ। ଟିମ୍ ଇଣ୍ଡିଆର ଏହି ଶୋଚନୀୟ ପରାଜୟ ଯୋଗୁ ୩ ମ୍ୟାଚ୍ ବିଶିଷ୍ଟ ସିରିଜ୍ ଏବେ ୧-୧’ର ବରାବର ସ୍ଥିତିରେ ପହଞ୍ଚିଛି। ସିରିଜ୍ର ଅନ୍ତିମ ତଥା ଫାଇନାଲ ମ୍ୟାଚ୍ ରବିବାର ସମାନ ଭେନ୍ୟୁରେ ଖେଳାଯିବ।
୩୩୭ ରନ୍ର ବିଜୟ ଲକ୍ଷ୍ୟକୁ ପିଛା କରୁଥିବା ଇଂଲଣ୍ଡକୁ ଧୂଆଁଧାର ଆରମ୍ଭ ଦେଇଥିଲେ ଜାସନ ରୟ ଓ ଜନ୍ନି ବେଆରଷ୍ଟୋଙ୍କ ଓପନିଂ ଯୋଡ଼ି। ଦୁହେଁ ୧୧୦ ରନ୍ ଯୋଡ଼ିଥିଲେ। ରନ୍ ଆଉଟ୍ ହୋଇ ରୟ (୫୫) ପ୍ୟାଭେଲିଅନ ଫେରିବା ପରେ ବେନ ଷ୍ଟୋକ୍ସଙ୍କୁ ନିୟନ୍ତ୍ରଣରେ ରଖି ପାରି ନ ଥିଲେ କୌଣସି ଭାରତୀୟ ବୋଲର। ଷ୍ଟୋକ୍ସ ଓ ବେଆରଷ୍ଟୋ ଦ୍ୱିତୀୟ ଉଇକେଟ ପାଇଁ ଦଳୀୟ ସ୍କୋରରେ ଯୋଡ଼ି ଥିଲେ ୧୭୫ ରନ୍। ଶତକ ହାସଲ କରିଥିବା ବେଆରଷ୍ଟୋ(୧୨୪)ଙ୍କୁ ପ୍ରସିଦ୍ଧ କ୍ରିଷ୍ଣା ଓ ଶତକରୁ ୧ ରନ୍ ଦୂରରେ ଥିବା ଷ୍ଟୋକ୍ସ(୯୯)ଙ୍କୁ ଭୁବନେଶ୍ୱର କୁମାର ନେଇଥିଲେ। ହେଲେ ସେତେବେଳକୁ ଭାରତର ଜିତିବା ଆଶା ଆଉ ନ ଥିଲା। ଲିଆମ ଲିଭିଙ୍ଗଷ୍ଟୋନ ଓ ଦାଓ୍ବିଦ ମଲାନ ବାକି ରନ୍ କରି ଦଳକୁ ବିଜୟ ଭେଟି ଦେଇଥିଲେ। ଇଂଲଣ୍ଡ ୪୩.୨ ଓଭରରେ ୪ ଉଇକେଟ ହରାଇ ୩୩୮ ରନ୍ କରି ମ୍ୟାଚ୍ ଜିତି ନେଇଥିଲା।
ପୂର୍ବରୁ ଆମନ୍ତ୍ରଣ ପାଇ ବ୍ୟାଟିଂ କରିଥିବା ଭାରତ ପୂରା ୫୦ ଓଭରରେ ୬ ଉଇକେଟ ହରାଇ ୩୩୬ ରନ୍ କରିଥିଲା। ଦଳ ପାଇଁ ଲୋକେଶ ରାହୁଲ ୧୦୮, ରିଷଭ ପନ୍ତ ୭୭ ଓ ଅଧିନାୟକ ବିରାଟ କୋହଲି ୬୬ ରନ୍ କରିଥିଲେ।
