ଧରାକୋଟ,୪।୯(ଡି.ଏନ୍.ଏ.): କୋମଳମତି ଶିଶୁମାନଙ୍କର ଶାରୀରିକ ଓ ବୌଦ୍ଧିକ ବିକାଶ ପାଇଁ ସରକାର ଅଙ୍ଗନୱାଡି କେନ୍ଦ୍ର ଖୋଲିଛନ୍ତି। ତିନିରୁ ପାଞ୍ଚ ବର୍ଷ ବୟସର ପିଲାମାନଙ୍କର ଏହା ହେଉଛି ପ୍ରାକ ଶୈଖିକ କେନ୍ଦ୍ର । ଏଣୁ ଅଭିଭାବକମାନେ ବହୁ ଆଶା ଓ ଭରସା କରି କେନ୍ଦ୍ରକୁ ନିଜ ପିଲାଙ୍କୁ ପଠାନ୍ତି । ହେଲେ ନିଜସ୍ବ ଗୃହ ବଦଳରେ ମନ୍ଦିର ପିଣ୍ଢାରେ ବସି ପିଲା ପାଠ ପଢୁଛନ୍ତି। ଗଛ ତଳେ ଅବା ମନ୍ଦିର ରୋଷଶାଳା ବାରଣ୍ଡାରେ ଖାଦ୍ୟ ଖାଉଛନ୍ତି । ପିଲାଙ୍କ ଖାଇବା ଉପରେ ସତର୍କ ଦୃଷ୍ଟି ପକାଉଛନ୍ତି କୁଆ,ମାଙ୍କଡ ଓ କୁକୁର । ସେମାନଙ୍କ ଉପରେ ସତର୍କ ଦୃଷ୍ଟି ରଖୁଛନ୍ତି କର୍ମୀ ଓ ଦୁଇଜଣ ସହାୟିକା। ଏହା ଦେଖିବାକୁ ମିଳିଛି ଧରାକୋଟ ବ୍ଲକ ଜଗମୋହନ ୨ ଓ ୩ ନମ୍ବର ଅଙ୍ଗନୱାଡି କେନ୍ଦ୍ରରେ। ଦୁଇଟି କେନ୍ଦ୍ରରେ ପ୍ରାୟ ୪୦ ଜଣ ପିଲା ପଢୁଛନ୍ତି। ଘର ନାହିଁ, ବିଦ୍ୟୁତ୍ ନାହିଁ, ପାଣି ନାହିଁ, କଳାପଟା ନାହିଁ, ଖାଦ୍ୟ ଖାଇବା ପାଇଁ ଜାଗା ନାହିଁ। ପ୍ରକାଶ ଯେ, ୨୦୧୯-୨୦୨୦ରେ ଅଙ୍ଗନୱାଡି ଗୃହ ନିର୍ମାଣ ପାଇଁ ସରକାର ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା ପାଣ୍ଠିରୁ ୮ ଲକ୍ଷ ୨୦ ହଜାର ଟଙ୍କା ମଞ୍ଜୁର କରିଥିଲେ। କାମ ଆରମ୍ଭ ହୋଇଥିଲା। ଛାତ ନ ପକାଇ ଅଧପନ୍ତରିଆ ଭାବେ ଏହାକୁ ଛାଡ଼ି ଦିଆଗଲା । କାର୍ଯ୍ୟନିର୍ବାହୀ ସଂସ୍ଥା ବ୍ଲକ ପ୍ରଶାସନ ତରଫରୁ ସହକାରୀ ନିର୍ବାହୀ ଯନ୍ତ୍ରୀ ସୁବାସ ଚନ୍ଦ୍ର ସ୍ବାଇଁ ଏ ସମ୍ପର୍କରେ ସୂଚନା ଦେଇଛନ୍ତି ଯେ, ସଂପୃକ୍ତ ଯନ୍ତ୍ରୀଙ୍କ ବଦଳି ହୋଇଯାଇଛି, ନୂତନ ଯନ୍ତ୍ରୀ ଦାୟିତ୍ୱ ନେବା ପରେ କାମ ଆରମ୍ଭ ହେବ। ପିଲାଙ୍କ ପାଇଁ ଗୃହ ନିର୍ମାଣ କରିବାକୁ ପ୍ରଶାସନକୁ ଦୁଇବର୍ଷ ଲାଗିଲାଣି। ତଥାପି କାମ ସରିନାହିଁ। ବର୍ତ୍ତମାନ ଏହା ଛେଳି ଗୁହାଳ ପାଲଟିଲାଣି। ସଂପ୍ରତି ନିର୍ବାଚିତ ସରପଞ୍ଚ ଲିନା କୁମାରୀ ମହାରଣା କହିଛନ୍ତି ଅର୍ଦ୍ଧ ନିର୍ମିତ ଅଙ୍ଗନୱାଡି କେନ୍ଦ୍ର ସମ୍ପୂର୍ଣ୍ଣ କରାଯିବା ସହ ପ୍ରସ୍ତାବିତ ନୂତନ କେନ୍ଦ୍ରର ଗୃହ ନିର୍ମାଣ ଓ ସରକାରଙ୍କ ଅନ୍ୟାନ୍ୟ ବିଭାଗର ପ୍ରସ୍ତାବିତ କାର୍ଯ୍ୟାଳୟ ସଦର ମହକୁମାରେ ତ୍ୱରିତ ନିର୍ମାଣ ପାଇଁ ପଦକ୍ଷେପ ନିଆଯିବ। ସେହିପରି ୨ ନମ୍ବର କେନ୍ଦ୍ରର କର୍ମୀ ଗତ ୨୫ା୧୨ା୨୦୨୧ରେ ମୃତ୍ୟୁ ବରଣ କରିଥିଲେ ମଧ୍ୟ ତାହା ପରଠାରୁ ଏହା ଖାଲି ପଡ଼ିଛି। କର୍ମୀ ନିଯୁକ୍ତି ପାଇଁ ସାକ୍ଷାତକାର ସରିଛି ହେଲେ ନିଯୁକ୍ତି ଦିଆଯାଉନାହିଁ । ଏଣୁ ଦୁଇ ଓ ତିନି ନମ୍ବର କେନ୍ଦ୍ରର ଠିକଣା ବଳା ମଣି ଠାକୁରାଣୀ ମନ୍ଦିର ପିଣ୍ଡା। କର୍ମୀଙ୍କ ସହ ଦୁଇଜଣ ସହାୟିକା ପିଲାଙ୍କ ତଦାରଖ କରୁଛନ୍ତି । କର୍ମୀଙ୍କ ଘରେ ରୋଷେଇ ହୋଇ ପିଲାଙ୍କ ନିମନ୍ତେ ଖାଦ୍ୟ ଆସୁଛି । ବର୍ଷା, ଶୀତ ଦିନରେ ପିଲାଙ୍କ କଥା ନ କହିବା ଭଲ। ଘଟଣା ସମ୍ପର୍କରେ ଶିଶୁ ବିକାଶ ପ୍ରକଳ୍ପ ଅଧିକାରୀ କହିଛନ୍ତି ସେ ଏ ନେଇ ଉଚ୍ଚ ପଦାଧିକାରୀଙ୍କ ଦୃଷ୍ଟି ଆକର୍ଷଣ କରିଛନ୍ତି ।