ନୂଆଦିଲ୍ଲୀ,୩୧ା୧୨: କଂଗ୍ରେସ ଛାଡ଼ି ନୂଆ ଦଳ ଗଢ଼ିଥିବା ବରିଷ୍ଠ ନେତା ଗୁଲାମ ନବୀ ଆଜାଦ ପୁଣି ପୁରୁଣା ଦଳକୁ ଫେରିବା ନେଇ ଚର୍ଚ୍ଚା ଜୋର୍ ଧରିଛି। ତାଙ୍କୁ ଦଳକୁ ଫେରାଇ ଆଣିବା ଲାଗି କେତେଜଣ କଂଗ୍ରେସ ନେତା ପରଦା ଆଢ଼ୁଆଳରେ କାମ କରୁଥିବା କୁହାଯାଇଛି। ଦଳରେ ନେତୃତ୍ୱ ପରିବର୍ତ୍ତନ ଏବଂ ହିମାଚଳପ୍ରଦେଶ ବିଧାନସଭା ନିର୍ବାଚନରେ କଂଗ୍ରେସର ବିଜୟ ଉଭୟ ଗୋଷ୍ଠୀଙ୍କୁ ସେମାନଙ୍କ ଆଭିମୁଖ୍ୟକୁ ନେଇ ପୁଣିଥରେ ଚିନ୍ତା କରିବାକୁ ବାଧ୍ୟ କରିଥିବା ଆଲୋଚନା ହେଉଛି। ତେବେ ଆଜାଦ କଂଗ୍ରେସ ଫେରିବା ଖବରକୁ ଖଣ୍ଡନ କରିଛନ୍ତି। ଘରବାହୁଡ଼ା ଯୋଜନା ନାହିଁ ବୋଲି ଡେମୋକ୍ରାଟିକ୍ ପ୍ରୋଗ୍ରେସିଭ୍ ଆଜାଦ ପାର୍ଟି ମୁଖ୍ୟ ଶୁକ୍ରବାର କହିଛନ୍ତି। ତାଙ୍କ ଦଳରେ ଅନିଶ୍ଚିତତା ସୃଷ୍ଟି କରାଇ ଦଳୀୟ କ୍ୟାଡରମାନଙ୍କ ମନୋବଳ ଭାଙ୍ଗିବା ପାଇଁ କଂଗ୍ରେସର କେତେଜଣ ନେତା ଉଦ୍ୟମ ଚଳାଇଥିବା ସେ ଅଭିଯୋଗ କରିଛନ୍ତି। ସେ କୌଣସି କଂଗ୍ରେସ ନେତାଙ୍କ ସହ କଥା ହୋଇନାହାନ୍ତି କିମ୍ବା କେହି ତାଙ୍କୁ ଫୋନ୍ କରିନାହାନ୍ତି। ଗଣମାଧ୍ୟମରେ ଏଭଳି ମନଗଢ଼ା କାହାଣୀ ପ୍ରସାରକୁ ନେଇ ସେ ବିସ୍ମୟ ପ୍ରକାଶ କରିଛନ୍ତି। ସେ କଂଗ୍ରେସ ଛାଡ଼ିବା ବେଳେ ଇସ୍ତଫାପତ୍ରରେ ସବୁକିଛି କହିଦେଇଛନ୍ତି। ଏହା ପରେ ତାଙ୍କ ମାର୍ଗ ଅଲଗା। ତାଙ୍କୁ ବିଶ୍ୱାସ କରୁଥିବା ଲୋକଙ୍କର ସେବା କରିବାକୁ ସେ ଚାହାନ୍ତି ବୋଲି ଆଜାଦ କହିଛନ୍ତି। ରାହୁଲ ଗାନ୍ଧୀଙ୍କ ଭାରତ ଯୋଡ଼ୋ ଯାତ୍ରା ଜମ୍ମୁ-କଶ୍ମୀରରେ ପ୍ରବେଶ କରିବା ପରେ ସେଥିରେ ଯୋଗଦେବେ କି ବୋଲି ପ୍ରଶ୍ନ ହେବାରୁ ସେଭଳି ଯୋଜନା ନାହିଁ ବୋଲି ଡେମୋକ୍ରାଟିକ୍ ପ୍ରୋଗ୍ରେସିଭ୍ ଆଜାଦ ପାର୍ଟି ମୁଖ୍ୟ କହିଛନ୍ତି।
