ଭୁବନେଶ୍ୱର(ବ୍ୟୁରୋ)/ଯାଁଳା, ୬।୬(ଡି.ଏନ୍.ଏ.): ରାଜଧାନୀ ଉପକଣ୍ଠ ଇନ୍ଫୋଭ୍ୟାଲି ଥାନା ଅଞ୍ଚଳରେ ଦିନକୁ ଦିନ ଜନବସତି ବୃଦ୍ଧି ପାଇବାରେ ଲାଗିଛି। ଏଥିସହ ବେଆଇନ ନିଶା କାରବାର, ହତ୍ୟା, ଚୋରି, ଲୁଟ୍ ଆଦି ଅପରାଧ ବଢ଼ି ଚାଲିଛି। ନାନା ଅବ୍ୟବସ୍ଥା ଘେରରେ ଥିବା ଏହି ଥାନା ଅପରାଧ ରୋକିବା ଓ ଅପରାଧୀଙ୍କୁ ସାବାଡ୍ କରିବାରେ ବିଫଳ ହେଉଛି। ଭୁବନେଶ୍ୱର ପୋଲିସ ଜିଲା ଅନ୍ତର୍ଗତ କମିଶନରେଟ ପୋଲିସ ଅଧୀନରେ ଏହି ଥାନା ରହିଥିଲେ ମଧ୍ୟ ଥାନା ଅଧିକାରୀ ନାହାନ୍ତି। ବହୁ ପଦବୀ ଖାଲି ପଡିଛି। ଫଳରେ ଅଭିଯୋଗର ତ୍ୱରିତ ପଦକ୍ଷେପ ନିଆଯାଇ ପାରୁ ନ ଥିବା ଅଭିଯୋଗ ହେଉଛି। ଏଥିସହ ପାଟ୍ରୋଲିଂ ଠିକ୍ ଭାବେ ହେଉ ନ ଥିବାରୁ ରାତିରେ ଅପରାଧୀମାନେ ଉତ୍ପାତ କରୁଛନ୍ତି। ଫଳରେ ଲୋକଙ୍କ ଧନଜୀବନ ଅସୁରକ୍ଷିତ ହୋଇପଡୁଛି।
ପରିସୀମା ଓ ଜନସଂଖ୍ୟା ବୃଦ୍ଧିକୁ ଦୃଷ୍ଟିରେ ରଖି ଲୋକଙ୍କ ସୁରକ୍ଷା ଓ ଆଇନଶୃଙ୍ଖଳା ରକ୍ଷା ପାଇଁ ଗତ ଡିସେମ୍ବର ୨୯ରେ ଇନ୍ଫୋଭ୍ୟାଲି ଥାନା ପ୍ରତିଷ୍ଠା କରାଯାଇଥିଲା। ଏହା ଅଧୀନରେ ଯାଁଳା ଫାଣ୍ଡିକୁ ମଧ୍ୟ ରଖାଯାଇଥିଲା। ଫଳରେ ଲୋକେ ନିଜକୁ ସୁରକ୍ଷିତ ମଣିବା ସହ ଅପରାଧ ନିୟନ୍ତ୍ରଣ ହୋଇପାରିବ ବୋଲି ଆଶା କରାଯାଉଥିଲା। କିନ୍ତୁ ଅବ୍ୟବସ୍ଥାକୁ ନେଇ ଏବେ ନାନା ପ୍ରଶ୍ନ ଉଠୁଛି। ଏହି ଥାନା ପାଇଁ ଜଣେ ଇନ୍ସପେକ୍ଟର, ୫ଜଣ ଏସ୍ଆଇ, ୫ଜଣ ଏଏସଆଇ, ଜଣେ ହେଡ୍ କନ୍ଷ୍ଟେବଳ ଓ ୧୫ ଜଣ କନ୍ଷ୍ଟେବଳ ନିଯୁକ୍ତି ପାଇଁ ଅନୁମୋଦନ ଥିବା କମିଶନରେଟ ପୋଲିସ ୱେବ୍ସାଇଟ୍ରେ ଉଲ୍ଲେଖ ରହିଛି। ପରିତାପର ବିଷୟ ଯେ, ଏବେ ମାତ୍ର ଜଣେ ଏସ୍ଆଇ, ୩ଜଣ ଏଏସଆଇଙ୍କ ସମେତ ଅଳ୍ପ କେତେଜଣ କର୍ମଚାରୀଙ୍କୁ ନେଇ ଏହି ଥାନା ଓ ଫାଣ୍ଡି କାର୍ଯ୍ୟ କରୁଛି। ସବୁଠୁ ଗୁରୁତ୍ୱ ପୂର୍ଣ୍ଣ କଥା ହେଲା, ପ୍ରଥମ ଥାନା ଅଧିକାରୀ ଥିବା ବିଭୁଦତ୍ତ ରାଉତରାୟଙ୍କୁ ପୌର ନିର୍ବାଚନ ପୂର୍ବରୁ ଭରତପୁର ଥାନାକୁ ବଦଳି କରାଯାଇଛି। ସେବେଠାରୁ ଇନ୍ଫୋଭ୍ୟାଲି ଥାନାର ଥାନା ଅଧିକାରୀ ପଦ ଖାଲି ପଡିଛି। ଏଥିସହ ଥାନାରେ ଜଣେ ହେଲେ ବି ମହିଳା ପୋଲିସ କର୍ମଚାରୀ ନ ଥିବାରୁ ବିଭିନ୍ନ ଅଭିଯୋଗ ନେଇ ଆସୁଥିବା ମହିଳାମାନେ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି। ଏହାକୁ ନେଇ ସ୍ଥାନୀୟ ଅଞ୍ଚଳବାସୀ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ଥାନାରେ କର୍ମଚାରୀ ସଂଖ୍ୟା ବୃଦ୍ଧି ସହ ପାଟ୍ରୋଲିଂ ଓ ଅଭିଯୋଗର ତ୍ୱରିତ ପଦକ୍ଷେପ ନେବାକୁ ସେମାନେ ଦାବି କରିଛନ୍ତି। ଏ ସମ୍ପର୍କରେ ଭୁବନେଶ୍ୱର ଡିସିପି ପ୍ରତୀକ ଗୀତା ସିଂହଙ୍କୁ ପଚାରିବାରୁ ଆଗକୁ ଥାନାରେ ଅଧିକାରୀ ନିଯୁକ୍ତ କରାଯିବ ବୋଲି କହିଛନ୍ତି।