ନୂଆଦିଲ୍ଲୀ, ୧।୪: ୟୁକ୍ରେନ୍ ସହ ରୁଷିଆର ଯୁଦ୍ଧକୁ ଆମେରିକା ସମେତ ପାଶ୍ଚାତ୍ୟ ରାଷ୍ଟ୍ରଗୁଡ଼ିକ ଦୃଢ଼ ନିନ୍ଦା କରିଆସୁଛନ୍ତି। ଏପରିକି ଦେଶ ଉପରେ ଚାପ ବଢ଼ାଇବା ଲାଗି ବିଭିନ୍ନ କଟକଣା ଲଗାଉଛନ୍ତି। ଏଭଳି ସମୟରେ ଭାରତ ଗସ୍ତରେ ଆସିଛନ୍ତି ରୁଷିଆର ବହିର୍ବ୍ୟାପାର ମନ୍ତ୍ରୀ ସେରଗି ଲାଭ୍ରୋଭ। ଏହାକୁ ନେଇ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି ଭାରତ। ଗୋଟିଏ ପଟେ ଆମେରିକା ଭାରତକୁ ଚେତାବନୀ ଦେଇଥିବା ବେଳେ ରୁଷିଆ ଭାରତର ନିରପେକ୍ଷ ତଥା ସ୍ବାଧୀନ ବୈଦେଶିକ ନୀତିକୁ ପ୍ରଶଂସା କରିଛି।
ଲାର୍ଭୋଭ କହିଛନ୍ତି, ରୁଷିଆ ସର୍ବଦା ଭାରତ ସହ ରହିଛି। ଭାରତ ସରକାର ରୁଷିଆଠାରୁ ଯାହା କିଣିବାକୁ ଚାହାନ୍ତି, ସେ ବିଷୟରେ ଆଲୋଚନା କରିବାକୁ ମସ୍କୋ ରାଜି। ଆମେରିକା ଅନ୍ୟମାନଙ୍କୁ ନିଜ ରାଜନୀତିକୁ ଅନୁସରଣ କରିବାକୁ ବାଧ୍ୟ କରୁଛି। କିନ୍ତୁ ଭାରତର ବୈଦେଶିକ ନୀତି ସ୍ବତନ୍ତ୍ର। ଏହାଛଡ଼ା କୌଣସି ଚାପ ଉଭୟ ଦେଶର ଭାଗିଦାରୀ ଉପରେ ପ୍ରଭାବ ପକାଇବ ନାହିଁ ବୋଲି ସେ ସର୍ବସମ୍ମୁଖରେ ଘୋଷଣା କରିଛନ୍ତି।
ଏହାଛଡ଼ା ୟୁକ୍ରେନ ସହ ବିବାଦରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟସ୍ଥି ଭୂମିକା ଗ୍ରହଣ ନେଇ ସେ କହିଛନ୍ତି, ଭାରତ ଏକ ଗୁରୁତ୍ୱପୂର୍ଣ୍ଣ ଦେଶ। ଯଦି ଭାରତ ଅନ୍ତର୍ଜାତୀୟ ସମସ୍ୟାର ନ୍ୟାୟସଂଗତ ଏବଂ ଯୁକ୍ତିଯୁକ୍ତ ଆଭିମୁଖ୍ୟ ଗ୍ରହଣ କରେ ତେବେ ଏହି ପ୍ରକ୍ରିୟାକୁ ସମର୍ଥନ କରିପାରିବ ବୋଲି ସେ କହିଛନ୍ତି।
ପ୍ରକାଶ ଯେ, ରୁଷିଆ ଉପରେ ଆମେରିକା ଓ ଏହାର ସହଯୋଗୀ ରାଷ୍ଟ୍ରଗୁଡ଼ିକ ମସ୍କୋ ଉପରେ କଟକଣା ଜାରି କରିଥିବା ବେଳେ ଲାଭ୍ରୋଭ ସମର୍ଥନ ଆଶାରେ ନୂଆଦିଲ୍ଲୀ ଆସିଛନ୍ତି। ତେବେ ମସ୍କୋର ପ୍ରସ୍ତାବ ଉପରେ ଭାରତ ବିଚାର କରୁଥିବା ନେଇ ଆମେରିକା ଏବଂ ଅଷ୍ଟ୍ରେଲିଆ ନୂଆଦିଲ୍ଲୀକୁ ସମାଲୋଚନା କରିଛନ୍ତି। ଏପରିକି ଭାରତ ସମେତ କୌଣସି ଦେଶ ରୁଷିଆର କେନ୍ଦ୍ରୀୟ ବ୍ୟାଙ୍କ ଜରିଆରେ ମସ୍କୋଠାରୁ ରୁବଲ ବିନିମୟରେ କାରବାର କଲେ କିମ୍ବା ଆମେରିକାର କଟକଣାକୁ ନ୍ୟୁନ କଲା ଭଳି ନିଜସ୍ବ ଦେୟ ବ୍ୟବସ୍ଥା ଆପଣାଇଲେ ପରିଣାମ ଭଲ ହେବ ନାହିଁ ବୋଲି ଜାତୀୟ ସୁରକ୍ଷା ପରାମର୍ଶଦାତା(ଡେପୁଟି ଏନ୍ଏସ୍ଏ) ଦଲୀପ ସିଂ ଚେତାବନୀ ଦେଇଥିଲେ।