ମୁମ୍ବାଇ,୮।୭: ଆହତ ସମସ୍ୟା କାରଣରୁ ଇଂଲଣ୍ଡ ବିପକ୍ଷ ଟେଷ୍ଟ ସିରିଜ୍ରୁ ବାଦ୍ ପଡ଼ିଥିବା ଶୁବମାନ ଗିଲଙ୍କ ବଦଳରେ କୌଣସି ଖେଳାଳିଙ୍କୁ ୟୁକେ ପଠାଯିବ ନାହିଁ। ଫଳରେ ଟିମ୍ ଇଣ୍ଡିଆ ପାଖରେ ଉପଲବ୍ଧ ଥିବା ୨୩ ଖେଳାଳିଙ୍କ ମଧ୍ୟରୁ ଚୂଡ଼ାନ୍ତ ଏକାଦଶ ବାଛିବାକୁ ପଡ଼ିବ।
ତେବେ ଏହି ଦ୍ୱନ୍ଦ୍ୱ ଆରମ୍ଭ ହୋଇଥିଲା ଟିମ୍ ଇଣ୍ଡିଆ ମ୍ୟାନେଜରଙ୍କ ଏକ ମେଲ୍ରୁ। ଗିଲ ଆହତ ହୋଇ ଆସନ୍ତା ମାସରୁ ଆରମ୍ଭ ହେବାକୁ ଥିବା ସିରିଜ୍ରୁ ବାଦ୍ ପଡ଼ିବା ପରେ ବିସିସିଆଇର ମୁଖ୍ୟ ଚୟନକର୍ତ୍ତାଙ୍କୁ ଏ ନେଇ ମେଲ୍ କରିଥିଲେ ଟିମ୍ ଇଣ୍ଡିଆ ମ୍ୟାନେଜର। ସେଥିରେ ଗିଲଙ୍କ ବଦଳ ଖେଳାଳି ଆବଶ୍ୟକ ଥିବା ଦର୍ଶାଯାଇଥିଲା। ଏହି ମେଲ୍ ମୁଖ୍ୟ ଚୟନକର୍ତ୍ତା ଚେତନ ଶର୍ମାଙ୍କ ନିକଟକୁ ଗତ ୨୮ ତାରିଖରେ ଆସିଥିଲା। କିନ୍ତୁ ଗଣମାଧ୍ୟମରେ ରିପୋର୍ଟ ପ୍ରକାଶ ନ ପାଇବା ପର୍ଯ୍ୟନ୍ତ ସେ ଏସମ୍ପର୍କରେ ବିସିସିଆଇ ଅଧିକାରୀଙ୍କ ସହ ଯୋଗାଯୋଗ କରି ନ ଥିଲେ।
ତେବେ ଗିଲଙ୍କ ଅନୁପସ୍ଥିତିରେ ରୋହିତ ଶର୍ମାଙ୍କ ସହ ମୟଙ୍କ ଅଗ୍ରଓ୍ବାଲ ଓପନିଂ କରିବେ। ଯଦି ପରବର୍ତ୍ତୀ ସମୟରେ ଆବଶ୍ୟକ ପଡ଼େ ବେଙ୍ଗଲର ୨୫ ବର୍ଷୀୟ ଓପନିଂ ବ୍ୟାଟ୍ସମ୍ୟାନ ଅଭିମନ୍ୟୁ ଇଶ୍ୱରନଙ୍କୁ ସୁଯୋଗ ମିଳିପାରେ।
