ଗୋପ,୯।୫(ଡି.ଏନ୍.ଏ.): ରାଜ୍ୟ ସରକାର ସାଧାରଣ ଲୋକଙ୍କ ମୌଳିକ ସୁବିଧାକୁ ଅଧିକ ଗୁରୁତ୍ୱ ଦେଉଥିବାବେଳେ ଗୋପ ବ୍ଲକ କୁଆଁପଡା ପଞ୍ଚାୟତ ଦଳିତ ନାୟକ ସାହି ଗ୍ରାମକୁ ଏପର୍ଯ୍ୟନ୍ତ ରାସ୍ତା ନାହିଁ। ଏହି ଗ୍ରାମରେ ୨୦ରୁ ଊଦ୍ଧର୍ବ ପରିବାର ବାସ କରୁଥିବାବେଳେ ବ୍ଲକ ପ୍ରଶାସନ ଏଥିପ୍ରତି ଗୁରୁତ୍ୱ ଦେଉ ନ ଥିବା ଅଭିଯୋଗ ହୋଇଛି। ଏନେଇ ସୋମବାର ଗ୍ରାମବାସୀ ପୁରୀ ଜିଲାପାଳଙ୍କୁ ଏକ ଅଭିଯୋଗପତ୍ର ଦେଇଛନ୍ତି। ପ୍ରକାଶ ଯେ, ଏହି ଗ୍ରାମକୁ ଯିବା ଆସିବା ପାଇଁ ନିକଟସ୍ଥ ଚଢ଼େଇ ଗଁା ନିକଟରେ ଏକ ସରକାରୀ ରାସ୍ତା ରହିଛି। ମାତ୍ର ବ୍ଲକ ପ୍ରଶାସନ ଓ ପଞ୍ଚାୟତ ପକ୍ଷରୁ ସେହି ରାସ୍ତାର କୌଣସି କାମ କରାଯାଉନାହିଁ। ଫଳରେ ସେହି ରାସ୍ତାରେ ଯିବାଆସିବା ସମ୍ଭବ ହୋଇନାହିଁ। ଗ୍ରାମର ସମସ୍ତ ପରିବାରର ୧୦୦ରୁ ଅଧିକ ଜନସାଧାରଣ ଦୈନିକ ନିକଟସ୍ଥ ବେସରକାରୀ ରାସ୍ତାରେ ଯିବାଆସିବା କରୁଛନ୍ତି। ଗ୍ରାମବାସୀ ଦୀର୍ଘବର୍ଷ ଧରି ଜିଲା ପ୍ରଶାସନ, ବ୍ଲକ ପ୍ରଶାସନ ସହିତ ସ୍ଥାନୀୟ ରାଜନେତାଙ୍କୁ ଏନେଇ ଅଭିଯୋଗ କରିଥିଲେ ମଧ୍ୟ ଏପର୍ଯ୍ୟନ୍ତ କୌଣସି ସୁଫଳ ମିଳିପାରିନାହିଁ। ସରକାର ଏମ୍ଜିଏନ୍ଆର୍ଇଜିଏସ୍ ଯୋଜନାରେ ଗଁା ରାସ୍ତା, ଖେଳପଡ଼ିଆ ସହିତ ଆଉ କେତେକ ଯୋଜନାରେ ଅନ୍ତର୍ଭୁକ୍ତ କରିବାକୁ ନିୟମ ରହିଥିବାବେଳେ ଏହି ଗଁା ପ୍ରତି ବୈମାତୃକ ମନୋଭାବ କରାଯାଇଥିବା ଭଳି ଅଭିଯୋଗ ହୋଇଛି। ବ୍ଲକରେ ଆୟୋଜିତ ଜନଶୁଣାଣି ଶିବିରରେ ଗ୍ରାମବାସୀ ବାରମ୍ବାର ଅଭିଯୋଗ କରିଥିଲେ ମଧ୍ୟ ଏନେଇ କୌଣସି କାର୍ଯ୍ୟାନୁଷ୍ଠାନ ନିଆଯାଉନାହିଁ। ଏପରି ଅଭିଯୋଗ ପ୍ରତି ଗୋପ ବ୍ଲକ ବିଡିଓ ଦୀପ୍ତିରାଣୀ ଦାସଙ୍କୁ ପଚାରିବାରେ, ତାଙ୍କ ପାଖରେ ସେପରି ଅଭିଯୋଗ ନାହିଁ। ତଥାପି ନିଶ୍ଚିତ ଏ ପ୍ରସଙ୍ଗରେ ଦୃଷ୍ଟି ଦେବେ ବୋଲି କହିଛନ୍ତି।