ଆଳି,୧୩ା୫ (ଡି.ଏନ.ଏ.): ରାଜ୍ୟ ସରକାର ଆବାସ ଯୋଜନା ମାଧ୍ୟମରେ ଗରିବ ଅସହାୟ ପରିବାରକୁ ପକ୍କାଘର ଯୋଗାଇ ଦେଉଛନ୍ତି। ଚାଳ ଘର ରହିବ ନାହିଁ, ସମସ୍ତଙ୍କୁ ମିଳିବ ଆବାସ ଗୃହ। ଏହି ଯୋଜନାର ସଫଳ ରୂପାୟନ ଦେବା ନିମନ୍ତେ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ମାତ୍ର ଏହି ଯୋଜନାରୁ ଜଣେ ହିତାଧିକାରୀଙ୍କ ନାମରେ ଆସିଥିବା ଆବାସ ଗୃହକୁ ହଡ଼ପ କରାଯାଇଛି। ପ୍ରଶାସନ ତାଲିକାରେ ତାଙ୍କୁ ଗୃହ ମିଳିଥିବା ଜଣାପଡିଥିବା ବେଳେ ସେ ଚାଳଘରେ ଜୀବନ ଅତିବାହିତ କରୁଛନ୍ତି। ଆବାସ ଖଣ୍ଡେ ପାଇଁ ଦୀର୍ଘବର୍ଷ ହେବ ଆଳି ବିଡିଓ, ଜିଲାପାଳଙ୍କ ନିକଟକୁ ଧାଉଁଥିବା ହିତାଧିକାରୀଙ୍କ କୋଠାଘର ଥିବା ତଥ୍ୟ ମିଳିଛି। ଏହାକୁ ନେଇ ହିତାଧିକାରୀ ଏବେ ଚିନ୍ତାରେ ପଡିଛନ୍ତି। ଏଭଳି ଦେଖିବାକୁ ମିଳିଛି, କେନ୍ଦ୍ରାପଡ଼ା ଜିଲା ଆଳି ବ୍ଲକ କଳସପୁର ପଞ୍ଚାୟତ ଆୟତପୁର ଗଁାରେ। ଗଁାର ଶିବରାମ ସୂତାରଙ୍କ ୩ ଝିଅପୁଅ ଓ ସ୍ତ୍ରୀଙ୍କୁ ନେଇ ପରିବାର। ସେ କାଠ କାମ କରି ପରିବାର ପ୍ରତିପୋଷଣ କରିଥାନ୍ତି। ସେ ରହୁଥିବା ଘରଟିର ବିଭିନ୍ନ ପାର୍ଶ୍ୱ ମାଟିକାନ୍ଥ ଖଣ୍ଡ ଖଣ୍ଡ ଖସୁଛି। ବିପଦସଂକୁଳ ଅବସ୍ଥାରେ ସେହି ଘରେ ସେ ପରିବାର ସହ ଆଶ୍ରୟ ନେଇଛନ୍ତି। ସରକାରଙ୍କ ପକ୍ଷରୁ ଯୋଗାଇ ଦିଆଯାଇଥିବା ଆବାସ ଖଣ୍ଡେ ପାଇବା ନିମନ୍ତେ ପଞ୍ଚାୟତଠାରୁ ଆରମ୍ଭ କରି ବ୍ଲକ କାର୍ଯ୍ୟାଳୟର ଦ୍ୱାରସ୍ଥ ହୋଇ ନିରାଶ ହେବା ପରେ ଆବାସ ନିମନ୍ତେ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠକୁ ଇ ମେଲ ଯୋଗେ ଅଭିଯୋଗ କରିଥିଲେ। ମୁଖ୍ୟମନ୍ତ୍ରୀ ଅଭିଯୋଗ ପ୍ରକୋଷ୍ଠରୁ ଏହାର ତଦନ୍ତ ନିମନ୍ତେ ଆସିଥିବା ରିପୋର୍ଟରେ ଆଳି ବିଡିଓ ଜିଲାପାଳଙ୍କୁ ଦେଇଥିବା ଦସ୍ତାବିଜରେ ଉଲ୍ଲେଖ ରହିଛି ଯେ ଶିବରାମଙ୍କ ପକ୍କାଘର ରହିଛି। ଏହି ଦସ୍ତାବିଜଟି ଶିବରାମଙ୍କ ନିକଟରେ ପହଞ୍ଚତ୍ବା ପରେ ତାଙ୍କ ମୁଣ୍ଡରେ ଚଡକ ପଡିଛି, କିନ୍ତୁ ବାସ୍ତବ ଚିତ୍ର ସମ୍ପୂର୍ଣ୍ଣ ଅଲଗା।
ଶିବରାମ ଦୀର୍ଘବର୍ଷ ଧରି ଚାଳଘରେ ବସବାସ କରୁଥିବା ବେଳେ ବିଡିଓ କେଉଁ ଆଧାରରେ ଏହି ତଦନ୍ତ କରି ରିପୋର୍ଟ ଦେଲେ ତାହା ଏବେ ତଦନ୍ତସାପେକ୍ଷ। ଏ ନେଇ ଶିବରାମ କହିଛନ୍ତି, ଦୀର୍ଘବର୍ଷ ହେବ ଆବାସ ଖଣ୍ଡେ ପାଇଁ ପ୍ରଶାସନର ଦ୍ୱାରସ୍ଥ ହେବା ପରେ ଏହି ଚିଠି ନିଶ୍ଚିତ ଭାବେ ସୂଚାଇ ଦେଉଛି ଯେ ତାଙ୍କ ନାମରେ ଆସିଥିବା ଆବାସକୁ ସ୍ଥାନୀୟ ଲୋକ ପ୍ରତିନିଧି ଓ ବ୍ଲକ ପ୍ରଶାସନ ମିଳିତ ଭାବେ ହଡ଼ପ କରିଛନ୍ତି। ଏହି ଘଟଣାର ଉଚ୍ଚସ୍ତରୀୟ ତଦନ୍ତ ନିମନ୍ତେ ସେ ଦାବି କରିଛନ୍ତି। ଏ ସମ୍ପର୍କରେ ବିଡିଓ ଦ୍ୱିବେନ୍ଦୁ ଦାସଙ୍କୁ ପଚାରିବାରୁ ଏବେ ନୂତନ ଘରର ଟାର୍ଗେଟ ଆସିନି। ଉକ୍ତ ରିପୋର୍ଟ ସମ୍ପର୍କରେ ସେ ଅବଗତ ନାହାନ୍ତି। ଏହାର ତଦନ୍ତ କରିବେ ବୋଲି କହିଛନ୍ତି। ଦେଖିବାକୁ ବାକି ରହିଲା ଶିବରାମ ଆବାସ ଆସିଛି, ଯଦି ଆସିଛି କାହାକୁ ମିଳିଛି ନା ଏହାକୁ ହଡ଼ପ କରାଯାଇଛି, ତାହା ତଦନ୍ତ ଘେରରେ ରହିଛି।