କେନ୍ଦ୍ରାପଡ଼ା ଅଫିସ,୨୬ା୯: ଆସନ୍ତା ଅକ୍ଟୋବରଠାରୁ ରାସ୍ତାରେ ହାଇ ସିକ୍ୟୁରିଟି ନମ୍ବର ପ୍ଲେଟ୍ର ତନଖି ହେବ। ଅନୁମୋଦିତ ନମ୍ବର ପ୍ଲେଟ ନ ଥିଲେ ଗାଡି ମାଲିକ ମୋଟା ଅଙ୍କରେ ଜରିମାନା ଗଣିବେ। ହାତଗଣତି ଦିନ ଅବଧି ଥିବାରୁ ଗାଡି ମାଲିକ ଜରିମାନାରୁ ମୁକୁଳିବା ପାଇଁ ପ୍ଲେଟ ଲଗାଇବାକୁ ବ୍ୟସ୍ତବିବ୍ରତ ସହ ବିଚଳିତ ହେଉଛନ୍ତି। ତେବେ ପ୍ଲେଟ ପାଇଁ ସ୍ଲଟ ମିଳୁନି। ଏହାକୁ ଦେଖି ଡିଲରଙ୍କ ମନମାନି ଆରମ୍ଭ ହୋଇଯାଇଛି। ଅନୁମୋଦିତ ଦରଠାରୁ ଅଧିକ ଟଙ୍କା ଆଦାୟ କରାଯିବା ଘଟଣା ଜିଲାରେ ଏବେ ନଜରକୁ ଆସିଛି। ଏହାକୁ ଦୃଷ୍ଟିରେ ରଖି ଆସନ୍ତା ୨୦୨୩ ମାର୍ଚ୍ଚ ଶେଷ ଯାଏ ହାଇ ସିକ୍ୟୁରିଟି ପ୍ଲେଟ ଲଗାଇବାକୁ ସମୟ ଦେବାଲାଗି ଜନଶକ୍ତି ପାର୍ଟି ପକ୍ଷରୁ ଦାବି ହୋଇଛି। ପାର୍ଟିର ଅଧ୍ୟକ୍ଷ ପ୍ରଦୀପ କୁମାର ଦାଶ ଏ ସମ୍ପର୍କରେ ଲିଖିତ ଦାବିପତ୍ର ମୁଖ୍ୟମନ୍ତ୍ରୀଙ୍କ ନିକଟକୁ ପଠାଇ କାର୍ଯ୍ୟାନୁଷ୍ଠାନ ପାଇଁ ନିବେଦନ କରିଛନ୍ତି।
କେନ୍ଦ୍ରାପଡ଼ା ଜିଲାର ବୁଦ୍ଧିଜୀବୀ ଆଶିଷ କୁମାର ସେନାପତି, ସାମାଜିକ କର୍ମୀ ହରେକୃଷ୍ଣ ପାତ୍ର, ଗାଡି ମାଲିକ ଅଶୋକ କୁମାର ସାମଲ ପ୍ରମୁଖ କହିଛନ୍ତି, ପରିବହନ ବିଭାଗ ପକ୍ଷରୁ ଗାଡିରେ ହାଇ ସିକ୍ୟୁରିଟି ନମ୍ବର ପ୍ଲେଟ ଲଗାଇବା ପାଇଁ ବିଜ୍ଞପ୍ତି ପ୍ରକାଶ ପାଇଛି। ପଞ୍ଜୀକରଣର ଶେଷ ଅଙ୍କ ୧ ଓ ୨ ନଂ. ଥିବା ଗାଡିଗୁଡିକ ଗତ ଅଗଷ୍ଟ ଶେଷ ସୁଦ୍ଧା ଏହି ପ୍ଲେଟ ଲଗାଇବାକୁ ସମୟ ଅବଧି ଦିଆଯାଇଥିଲା। ସେହିପରି ୩ ଓ ୪ ନଂ. ଚଳିତ ମାସ ୩୦ ତାରିଖ ପର୍ଯ୍ୟନ୍ତ ସମୟ ଥିବାବେଳେ ୫ ଓ ୬ ନଂ. ଅକ୍ଟୋବର ୩୧, ୭ ଓ ୮ ନଂ. ନଭେମ୍ବର ୩୦, ୯ ଓ ୦ ନଂ. ଆସନ୍ତା ଡିସେମ୍ବର ଶେଷ ସୁଦ୍ଧା ଗାଡିରେ ହାଇ ସିକ୍ୟୁରିଟି ନମ୍ବର ପ୍ଲେଟ ଲଗାଇବା ପାଇଁ ବିଜ୍ଞପ୍ତିରେ ଉଲ୍ଲେଖ ଅଛି। ତେବେ ଅଗଷ୍ଟ ମାସରେ ବନ୍ୟା ଓ ବର୍ଷା ପାଇଁ ରାଜ୍ୟରେ ତନଖି ସମୟକୁ ଅକ୍ଟୋବର ପର୍ଯ୍ୟନ୍ତ ଘଞ୍ଚାଇ ଦିଆଯାଇଛି। ଏହି ବିଜ୍ଞପ୍ତିର କେତେକ ତ୍ରୁଟି ଯୋଗୁ ଗାଡି ମାଲିକ ସମୟ ଅବଧି ପୂର୍ବରୁ ସଚେତନ ହୋଇପାରିନାହାନ୍ତି। ପ୍ଲେଟ ପାଇଁ କେତେ ଟଙ୍କା ପଡିବ, ପରିବହନଯୋଗ୍ୟ ମାତ୍ର ବର୍ଷେ ଅଥବା ୨ ବର୍ଷ ଥିବା ପୁରୁଣା ଗାଡିର ନମ୍ବର ପ୍ଲେଟରେ ରିହାତି ବ୍ୟବସ୍ଥା ଆଦି ସମ୍ପର୍କରେ କୌଣସି ତଥ୍ୟ ଉଲ୍ଲେଖ ନାହିଁ। ସେହିପରି ପ୍ଲେଟ ପ୍ରସ୍ତୁତ କର୍ତ୍ତା ଓ ବିତରଣକାରୀଙ୍କ ସମ୍ପର୍କରେ ତଥ୍ୟ ସାର୍ବଜନୀନ ହୋଇ ନ ଥିବାରୁ ଗାଡି ମାଲିକ ଏଥିପ୍ରତି ବୀତସ୍ପୃହ ଥିଲେ। ଏବେ ଅକ୍ଟୋବରଠାରୁ ନିୟମ କଡାକଡି ହେଉଥିବାରୁ ଗାଡି ମାଲିକ ନମ୍ବର ପ୍ଲେଟ ଲଗାଇବାକୁ ବିଚଳିତ ହୋଇଉଠିଛନ୍ତି। ପରିବହନ ବିଭାଗର ଆକଳନ ଅନୁଯାୟୀ ପ୍ରତ୍ୟେକ ଦିନ ରାଜ୍ୟରେ ୫୦ ହଜାରରୁ ଅଧିକ ଆବେଦନପତ୍ର ଦିଆଯାଉଛି। ବର୍ତ୍ତମାନ ସୁଦ୍ଧା ରାଜ୍ୟରେ ୧୨ ଲକ୍ଷ ୬୦ ହଜାରରୁ ଅଧିକ ଆବେଦନପତ୍ର ମିଳିଥିବା ବେଳେ ୬ ଲକ୍ଷ ୫୧ ହଜାର ହାଇ ସିକ୍ୟୁରିଟି ପ୍ଲେଟ ଲଗାଯାଇଛି। ଅପରପକ୍ଷରେ ଗ୍ରାମାଞ୍ଚଳରେ ଅଦ୍ୟାବଧି ଇଣ୍ଟରନେଟ ସମସ୍ୟାରେ ସୁଧାର ଆସିନି। ଏଥିପାଇଁ ସ୍ଲଟ ବୁକିଂ ହୋଇପାରୁନାହିଁ। ସ୍ଲଟ ବୁକିଂ ପାଇଁ ବିଭିନ୍ନ ଜନସେବା କେନ୍ଦ୍ରରେ ଠେଲାପେଲା ଲାଗୁଛି। ଏଥିରୁ ବର୍ତ୍ତିବା ପାଇଁ ଗାଡି ମାଲିକମାନେ କମ୍ପାନୀ ଦଲାଲଙ୍କ ହାବୁଡରେ ପଡୁଛନ୍ତି। ହାତଗୁଞ୍ଜା ଦେଇ କୌଣସି ପ୍ରକାର ନମ୍ବର ପ୍ଲେଟ ଲଗାଇବା ଚେଷ୍ଟାରେ ଅଛନ୍ତି। ସାଧାରଣ ଲୋକଙ୍କ ଏହି ବିକଳ ଅବସ୍ଥା ଏବେ କିମ୍ଭୂତକିମାକାର ପରିସ୍ଥିତି ସୃଷ୍ଟି କରିଛି। ଆସନ୍ତା ମାସଗୁଡିକରେ ପୂଜା, ପାର୍ବଣ ପାଇଁ ଛୁଟି ସଂଖ୍ୟା ଅଧିକ। ଦଶହରା, ଗଜଲକ୍ଷ୍ମୀ ପୂଜା, କାଳୀପୂଜା ଆଦି ପୂଜା ଉତ୍ସବ ହେବ। ତନଖିରେ ଜରିମାନା ଭୟ ଥିବାରୁ ଆସନ୍ତା ମାର୍ଚ୍ଚ ୨୩ ପର୍ଯ୍ୟନ୍ତ ସମୟ ଦେବାକୁ ସେମାନେ ନିବେଦନ କରିଛନ୍ତି। ଏ ସମ୍ପର୍କରେ କେନ୍ଦ୍ରାପଡ଼ା ଆରଟିଓ ବୀରେନ୍ଦ୍ର କୁମାର ନାୟକ କହିଛନ୍ତି, କେଉଁ ଡିଲର କେତେ ଟଙ୍କା ନେଉଛନ୍ତି, ତାହା ୱେବ୍ସାଇଟରେ ଉଲ୍ଲେଖ ଅଛି। ତନଖି ସମୟ ଅବଧି ସରକାରଙ୍କ ଆଦେଶ ଅନୁଯାୟୀ କାର୍ଯ୍ୟକାରୀ ହେବ ବୋଲି ସେ କହିଛନ୍ତି।