ସୁନାବେଡା/ସେମିଳିଗୁଡା,୧୧ା୩ (କୃତ୍ତିବାସ ପ୍ରଧାନ/ବାସୁଦେବ ବରାଡ): ଶିକ୍ଷା ବ୍ୟବସ୍ଥାରେ ସୁଧାର ଆଣିବାକୁ ସରକାର ୫-ଟି ମାଧ୍ୟମରେ ବିଭିନ୍ନ ଯୋଜନା କାର୍ଯ୍ୟକାରୀ କରୁଛନ୍ତି। ମାତ୍ର କେତେକ କଲେଜର ଭିତ୍ତିଭୂମି ଥାଇ ସୁଦ୍ଧା ଛାତ୍ରୀଛାତ୍ରମାନେ ଉନ୍ନତ ଶିକ୍ଷା ପ୍ରଣାଳୀରୁ ଲାଭ ପାଇପାରୁନାହାନ୍ତି। ଏପରି ଅଭିଯୋଗ ଆଣିଛନ୍ତି ସେମିଳିଗୁଡା ମହାବିଦ୍ୟାଳୟର ଛାତ୍ରୀଛାତ୍ର ଓ ଅଧ୍ୟାପିକା ଅଧ୍ୟାପକମାନେ। ସେମାନଙ୍କ କହିବା ମୁତାବକ ସରକାର ଯୁକ୍ତ୨ ବିଜ୍ଞାନ ଶେଷ ବର୍ଷର ଛାତ୍ରୀଛାତ୍ରଙ୍କ ପାଇଁ ଗତ ଜାନୁୟାରୀ ୮ରେ ମାଗଣା ଓଜେଇ ଓ ନିଟ୍ ଅନ୍ ଲାଇନ୍ କୋଚିଂ ପାଇଁ ଘୋଷଣା କରିଥିଲେ। ଫଳରେ ଏଥିରୁ ପ୍ରତ୍ୟହ ଦୁଇଟି ପର୍ଯ୍ୟାୟରେ ଛାତ୍ରୀଛାତ୍ର ଉପକୃତ ହୋଇପାରିଥାନ୍ତେ। ମାତ୍ର ମହାବିଦ୍ୟାଳୟଗୁଡିକରେ ଏଥିପାଇଁ ଆବଶ୍ୟକ ଭିତ୍ତିଭୂମି ନ ଥିବାରୁ ଛାତ୍ରୀଛାତ୍ରମାନେ ଏହି ସୁଯୋଗର ସଦବ୍ୟବହାରରୁ ବଞ୍ଚତ୍ତ ହେଲେ। ସେମିଳିଗୁଡା ମହାବିଦ୍ୟାଳୟରେ ସ୍ମାର୍ଟ କ୍ଲାସ ନ ଥିବାରୁ ଛାତ୍ରୀଛାତ୍ର ନିଟ୍ ଏବଂ ଓଜେଇ ପଢି ପାରୁନାହାନ୍ତି। ଏହାବ୍ୟତୀତ ମହାବିଦ୍ୟାଳୟରେ ଆହୁରି ଅନେକ ସମସ୍ୟା ରହିଛି। ପିଲାଙ୍କ ଖେଳକୁଦ ପାଇଁ ଖେଳ ପଡିଆ, ଇ-ଲାଇବ୍ରେରୀ, ଅଡିଟୋରିୟମ୍, ହଷ୍ଟେଲ ବ୍ୟବସ୍ଥା, କନଫରେନ୍ସ ହଲ୍ ଆଦି ନାହିଁ। ଏନେଇ ବିଭିନ୍ନ ସମୟରେ ଦାବି କରାଯାଇଥିଲେ ମଧ୍ୟ କିଛି ସୁଫଳ ମିଳିନାହିଁ। ସୂଚନାଯୋଗ୍ୟ ଏହି କଲେଜରେ ପଟାଙ୍ଗି, ନନ୍ଦପୁର, ଦାମନଯୋଡି, ସେମିଳିଗୁଡା,ସୁନାବେଡା ଅଞ୍ଚଳର ପ୍ରାୟ ୨୫ ଶହରୁ ଅଧିକ ଛାତ୍ରୀଛାତ୍ର ପାଠ ପଢନ୍ତି। ଯୁକ୍ତ୨ ବିଜ୍ଞାନରେ ପ୍ରାୟ ଦେଢ଼ ଶହରୁ ଊଦ୍ଧର୍ବ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ଏ ସମ୍ପର୍କରେ ମହାବିଦ୍ୟାଳୟ ଅଧ୍ୟକ୍ଷ ଡ. ରମା ରଞ୍ଜନ ପଟ୍ଟନାୟକଙ୍କୁ ପଚାରିବାରୁ ସେ କହିଲେ, ଆମର ଯଥେଷ୍ଟ କ୍ଲାସ ରୁମ ରହିଛି। କିନ୍ତୁ ସ୍ମାର୍ଟ କ୍ଲାସ ନାହିଁ। ଏଥିଯୋଗୁ ବିଜ୍ଞାନ ଛାତ୍ରୀଛାତ୍ରମାନେ ଅନ୍ଲାଇନ୍ କୋଚିଂରୁ ବଞ୍ଚତ୍ତ ହେଉଛନ୍ତି। ଏସମ୍ପର୍କରେ ପୂର୍ବତନ ଜିଲାପାଳ ଅବଦଲ୍ ଏମ୍ ଅଖତର୍ ବର୍ତ୍ତମାନର ଜିଲାପାଳ ଭି.କିର୍ତ୍ତୀ ଭାସନ, ୫-ଟି ଅଧ୍ୟକ୍ଷ ଓ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବଙ୍କ ଦୃଷ୍ଟି ଆକର୍ଷଣ କରାଯାଇଛି। ପାଣ୍ଠି ସଂଗ୍ରହ କରି ଉନ୍ନୟନମୂଳକ କାର୍ଯ୍ୟ କରାଯିବାକୁ ପଦକ୍ଷେପ ନିଆଯାଉଛି ବୋଲି ଜିଲାପାଳ ଭି.କିର୍ତ୍ତୀ ଭାସନ କହିଛନ୍ତି।