ଭୁବନେଶ୍ୱର,୧୦।୭(ଅଭିଜିତ ଦାସ): ରାଜ୍ୟର ଅନ୍ୟତମ ପ୍ରମୁଖ ଚିକିତ୍ସାଳୟ କ୍ୟାପିଟାଲ ହସ୍ପିଟାଲରେ ଉନ୍ନତ ରୋଗୀସେବା ପ୍ରଦାନ ସହ ହସ୍ପିଟାଲକୁ ଜାତୀୟ ମାନ୍ୟତା ଦେବାକୁ ପ୍ରୟାସ ଚାଲିଛି। ଇତିମଧ୍ୟରେ ଏଠାରେ ମେଡିକାଲ କଲେଜ ଖୋଲାଯିବା ସହ ରୂପ ବଦଳିବାରେ ଲାଗିଛି। ସେହିପରି ରୋଗୀଙ୍କ ପାଇଁ ସୁପରସ୍ପେଶାଲିଟି ବିଭାଗ ଖୋଲାଯାଇଛି। କିନ୍ତୁ ଆବଶ୍ୟକ ଡାକ୍ତର ଓ କର୍ମଚାରୀ ନ ଥିବାରୁ ରୋଗୀଙ୍କୁ ସେପରି ସେବା ମିଳିପାରୁନାହିଁ। ସପ୍ତାହକୁ ମାତ୍ର ୩ଦିନ ଖୋଲା ରହୁଥିବାବେଳେ ରୋଗୀମାନେ ବହୁ ସମୟ ଧରି ଡାକ୍ତରଙ୍କୁ ଅପେକ୍ଷା କରି ଅସନ୍ତୋଷରେ ଫେରୁଥିବା ଦେଖିବାକୁ ମିଳୁଛି।
ହସ୍ପିଟାଲ ପରିସରରେ ଥିବା ଉପଔଷଧ ଭଣ୍ଡାର ନିକଟରେ ନିର୍ମିତ ସ୍ବତନ୍ତ୍ର କୋଠାରେ ଏହି ସୁପର ସ୍ପେଶାଲିଟି ବିଭାଗ ଖୋଲାଯାଇଛି। ଏଠାରେ ବର୍ତ୍ତମାନ ୬ଟି ବିଭାଗ ଏଣ୍ଡୋକ୍ରାଇନୋଲୋଜି, ନେଫ୍ରୋଲୋଜି, ୟୁରୋଲୋଜି, ନ୍ୟୁରୋଲୋଜି, ନ୍ୟୁରୋସର୍ଜରି ଓ ପ୍ଲାଷ୍ଟିକ ସର୍ଜରିରେ ସୁପର ସ୍ପେଶାଲିଟି ଚିକିତ୍ସା ଯୋଗାଇ ଦିଆଯାଉଛି। ପୂର୍ବରୁ ୮ଜଣ ଡାକ୍ତର ଥିବାବେଳେ ଏବେ ଏହି ସଂଖ୍ୟା ୧୨କୁ ବୃଦ୍ଧି କରାଯାଇଛି। ହେଲେ ଏହି ସେବା ଲାଗି କଟକ ଡାକ୍ତରଙ୍କ ଉପରେ ନିର୍ଭର କରିବାକୁ ପଡୁଛି। ପୁଣି ସପ୍ତାହରେ ୩ଦିନ ସେବା ମିଳୁଥିବାରୁ ରୋଗୀଙ୍କ ପ୍ରବଳ ଭିଡ଼ ହେଉଛି। ଟିକେଟ କାଟିବାଠାରୁ ଡାକ୍ତରଙ୍କ ପରାମର୍ଶ ନେବା ପର୍ଯ୍ୟନ୍ତ ସବୁ ସ୍ଥାନରେ ବହୁ ସମୟ ଧରି ଅପେକ୍ଷା କରିବାକୁ ପଡୁଛି। ପୁଣି ଡାକ୍ତର ଅଭାବ ଥିବାରୁ ଏକ ନିର୍ଦ୍ଦିଷ୍ଟ ସଂଖ୍ୟକ ରୋଗୀଙ୍କୁ ଚିକିତ୍ସା ମିଳୁଛି। କ୍ୟାପିଟାଲ ହସ୍ପିଟାଲର ନିର୍ଦ୍ଦେଶକ ଡ. ଲକ୍ଷ୍ମୀଧର ସାହୁ କହିଛନ୍ତି, ସୁପର ସ୍ପେଶାଲିଟି ବିଭାଗରେ ଏବେ ୧୨ଜଣ ଡାକ୍ତର ରହିଛନ୍ତି। ସପ୍ତାହର ସୋମବାର, ବୁଧବାର ଓ ଶୁକ୍ରବାର ଦିନ ଡାକ୍ତରମାନେ ରୋଗୀ ଦେଖୁଛନ୍ତି। ପିଜିଆଇଏମ୍ଇଆର୍ ଆଣ୍ଡ୍ କ୍ୟାପିଟାଲ ହସ୍ପିଟାଲ ମେଡିକାଲ କଲେଜରେ ମଧ୍ୟ ଛାତ୍ରୀଛାତ୍ର ପାଠ ପଢ଼ିବା ସହ ରୋଗୀଙ୍କ ଚିକିତ୍ସା ଉପରେ ଦୃଷ୍ଟି ରଖୁଛନ୍ତି। ଖୁବ୍ଶୀଘ୍ର କିଛି ସ୍ବତନ୍ତ୍ର ବିଭାଗରେ ଅଧିକ ସଂଖ୍ୟକ ଡାକ୍ତର ନିଯୁକ୍ତି କରାଯିବାର ପ୍ରସ୍ତାବ ଦିଆଯାଇଥିବା ଡ. ସାହୁ କହିଛନ୍ତି।
ରୋଗ ଯନ୍ତ୍ରଣାଠୁ ବଳିପଡୁଛି ଅପେକ୍ଷା କଷ୍ଟ
କ୍ୟାପିଟାଲ ହସ୍ପିଟାଲରେ ସରକାରଙ୍କ ପକ୍ଷରୁ ଉନ୍ନତ ଚିକିତ୍ସା ଯୋଗାଇ ଦିଆଯାଉଥିବା ଆଶାରେ ରାଜଧାନୀ ଭୁବନେଶ୍ୱର ସମେତ ସାରା ରାଜ୍ୟ ତଥା ବାହାରୁ ମଧ୍ୟ ରୋଗୀ ଆସୁଛନ୍ତି। ରୋଗୀ ସଂଖ୍ୟା ଅନୁସାରେ ସେପରି ବ୍ୟବସ୍ଥା ରହି ନ ଥିବାରୁ ଆଶାନୁରୂପ ଚିକିତ୍ସା ସେବା ମିଳିପାରୁନାହିଁ। ବିଶେଷକରି ଟିକେଟ କାଉଣ୍ଟର, ମେଡିସିନ ଷ୍ଟୋର୍, ଡାକ୍ତର ପରାମର୍ଶ ଓ ପରୀକ୍ଷା ପାଇଁ ରୋଗୀଙ୍କୁ ଘଣ୍ଟା ଘଣ୍ଟା ଅପେକ୍ଷା କରିବାକୁ ପଡୁଛି। ଏଥିପାଇଁ ଟିକେଟ କାଉଣ୍ଟରରେ ରାତିରୁ ଲୋକେ ଧାଡ଼ି ଲଗାଉଥିବା ଦେଖିବାକୁ ମିଳୁଛି। ଅନ୍ୟପକ୍ଷରେ ହସ୍ପିଟାଲର ସମ୍ମୁଖ ପାର୍ଶ୍ୱରେ ୫ଟି ମେଡିସିନ କାଉଣ୍ଟର ଥିବାବେଳେ ପଛ ପାର୍ଶ୍ୱରେ ମଧ୍ୟ ୫ଟି କାଉଣ୍ଟର ରହିଛି। ତଥାପି ରୋଗୀମାନେ ଡାକ୍ତରଙ୍କ ସହ ପରାମର୍ଶ ପରେ ଅନେକ ସମୟ ଧରି ମେଡିସିନ ଲାଗି ଅପେକ୍ଷା କରୁଛନ୍ତି। ତେବେ କର୍ତ୍ତୃପକ୍ଷଙ୍କ ସୂଚନା ଅନୁଯାୟୀ, ପ୍ରତ୍ୟେକ ଦିନ କ୍ୟାପିଟାଲ ହସ୍ପିଟାଲକୁ ହଜାର ହଜାର ସଂଖ୍ୟକ ରୋଗୀ ଆସୁଥିବା ବେଳେ କିଛି ମାସ ପୂର୍ବରୁ ଆଉ ଏକ ମେଡିସିନ କାଉଣ୍ଟର ଖୋଲିବାକୁ ହସ୍ପିଟାଲ କର୍ତ୍ତୃପକ୍ଷ ନିଷ୍ପତ୍ତି ନେଇଥିଲେ। ମେଡିସିନ କାଉଣ୍ଟର ନିର୍ମାଣ କାମ ସରିବାକୁ ବସିଲାଣି। ଖୁବ୍ଶୀଘ୍ର ନୂଆ କାଉଣ୍ଟର ଖୋଲାଯିବ।