ଚେନ୍ନାଇ,୯।୩: ଆଇପିଏଲର ଡିଫେଣ୍ଡିଂ ଚାମ୍ପିୟନ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ)କୁ ବୁଧବାର ବଡ଼ ଆଶ୍ୱସନା ମିଳିଛି। ଦଳର ପ୍ରମୁଖ ଅଲରାଉଣ୍ଡର ଦୀପକ ଚହର ଚଳିତ ସିଜନରେ ଖେଳିବା ପାଇଁ ଉପଲବ୍ଧ ରହିବେ। ମିଳିଥିବା ସୂଚନା ମୁତାବକ, ଏହି ପେସରଙ୍କ ଏବେ ଅସ୍ତ୍ରୋପଚାର କରାଯିବ ନାହିଁ। ସମ୍ପୂର୍ଣ୍ଣ ଫିଟ୍ନେସ ପାଇଁ ତାଙ୍କୁ ଆହୁରି କିଛି ସପ୍ତାହ ବିଶ୍ରାମ କରିବାକୁ ଡାକ୍ତର ପରାମର୍ଶ ଦେଇଛନ୍ତି। ଉଲ୍ଲେଖଯୋଗ୍ୟ, ଓ୍ବେଷ୍ଟଇଣ୍ଡିଜ ବିପକ୍ଷ ଟି୨୦ ସିରିଜ୍ ବେଳେ ଚହରଙ୍କ ମାଂସପେଶୀରେ ଆଘାତ ଲାଗିଥିଲା।
ପ୍ରାରମ୍ଭିକ ଏମ୍ଆରଆଇ ସ୍କାନର ରିପୋର୍ଟ ଆଧାରରେ ଚହରଙ୍କୁ ଅସ୍ତ୍ରୋପଚରା କରାଇବାକୁ ଡାକ୍ତର ପରାମର୍ଶ ଦେଇଥିଲେ। କିନ୍ତୁ ଚଳିତ ବର୍ଷ ଅକ୍ଟୋବରରେ ଅଷ୍ଟ୍ରେଲିଆରେ ହେବାକୁ ଥିବା ଟି୨୦ ବିଶ୍ୱକପ୍ ପାଇଁ ସେ ଅସ୍ତ୍ରୋପଚରାକୁ ମନା କରି ଦେଇଛନ୍ତି।
ତେବେ ଆହତ ସମସ୍ୟା କାରଣରୁ ଅପ୍ରିଲ ମଧ୍ୟାନ୍ତର ପର୍ଯ୍ୟନ୍ତ ସେ ଖେଳିପାରିବେ ନାହିଁ। ସେ ଏବେ ବାଙ୍ଗାଲୋର ଏନ୍ସିଏରେ ୮ ସପ୍ତାହ ପାଇଁ ରିହାବରେ ଅଛନ୍ତି। ଅନ୍ୟପକ୍ଷରେ ଚଳିତ ମାସ ୨୬ ତାରିଖରୁ ଆରମ୍ଭ ହେବାକୁ ଯାଉଥିବା ଆଇପିଏଲ-୧୫ ପୂର୍ବରୁ ସୁରଟରେ ସିଏସ୍କେର ଟ୍ରେନିଂ କ୍ୟାମ୍ପ ଆରମ୍ଭ ହୋଇଯାଇଛି। ଆସନ୍ତା ଦୁଇ ସପ୍ତାହ ମଧ୍ୟରେ ଦୀପକଙ୍କୁ ଏହି କ୍ୟାମ୍ପରେ ଯୋଗ ଦେବାକୁ କୁହାଯାଇଛି। ଫ୍ରାଞ୍ଚାଇଜ ତାଙ୍କ ଫିଟ୍ନେସକୁ ମନିଟର କରିବା ସହ ଯଥାଶୀଘ୍ର ତାଙ୍କୁ ଦଳରେ ସାମିଲ କରିବାକୁ ଚାହୁଁଛି।
