ଭୁବନେଶ୍ୱର,୫।୧(ବ୍ୟୁରୋ): ଆସନ୍ତା ୮ ତାରିଖରୁ ଦଶମ ଓ ଦ୍ୱାଦଶ ଶ୍ରେଣୀ ଛାତ୍ରୀଛାତ୍ରଙ୍କ ପାଇଁ ସ୍କୁଲ ଖୋଲିବ। ମେ’ ୩ ତାରିଖରୁ ମାଟ୍ରିକ୍ ପରୀକ୍ଷା ଆରମ୍ଭ ହେବ। ଏଥିପାଇଁ ସରକାରଙ୍କ ପକ୍ଷରୁ ଏସ୍ଓପି ଜାରି କରାଯାଇଛି। କିନ୍ତୁ ଏସ୍ଓପି ଅନୁସାରେ ପାଠପଢ଼ା ହେଲେ ସ୍କୁଲରେ ଶିକ୍ଷକ ଅଭାବଜନିତ ସମସ୍ୟା ଉପୁଜିବ। ଆବଶ୍ୟକ ସଂଖ୍ୟକ ଶିକ୍ଷକ ନ ଥିବାବେଳେ ପାଠପଢ଼ା କିପରି ହେବ, ତାହାକୁ ନେଇ ଓଡ଼ିଶା ମାଧ୍ୟମିକ ସ୍କୁଲ ଶିକ୍ଷକ ସଂଘ (ଓଷ୍ଟା) ଚିନ୍ତା ପ୍ରକଟ କରିଛି।
ଗୋଟିଏ ଶ୍ରେଣୀ ଗୃହରେ ୨୦ରୁ ୨୫ଜଣ ଛାତ୍ରୀଛାତ୍ରଙ୍କୁ ନେଇ ଶିକ୍ଷାଦାନ କରିବା ପାଇଁ ଏସ୍ଓପିରେ ଦର୍ଶାଯାଇଛି। ଏହାକୁ ଓଷ୍ଟା ବିରୋଧ କରିଛି। ଓଷ୍ଟା ସାଧାରଣ ସମ୍ପାଦକ ପ୍ରକାଶ ଚନ୍ଦ୍ର ମହାନ୍ତି କହିଛନ୍ତି, ଯଦି ବିଦ୍ୟାଳୟରେ ସାଧାରଣ ଭାବରେ ୫୦ରୁ ଊର୍ଦ୍ଧ୍ୱ କିମ୍ବା ୧୦୦ରୁ ଊର୍ଦ୍ଧ୍ୱ ଛାତ୍ରୀଛାତ୍ର ଥାଆନ୍ତି ତେବେ ପାଠ ପଢ଼ାଇବା ୪ କିମ୍ବା ୫ଟି ଶ୍ରେଣୀ କକ୍ଷର ଆବଶ୍ୟକତା ପଡ଼ିବ। ରାଜ୍ୟରେ ସରକାରୀ, ଅନୁଦାନପ୍ରାପ୍ତ ଓ ନୂତନ ଅନୁଦାନପ୍ରାପ୍ତ ବିଦ୍ୟାଳୟଗୁଡ଼ିକରେ ଶିକ୍ଷକଙ୍କର ଘୋର ଅଭାବ ରହିଛି। ଏପରି କି ଅନେକ ବିଦ୍ୟାଳୟରେ ଗଣିତ, ବିଜ୍ଞାନ ଓ ଇଂଲିଶ ଶିକ୍ଷକ ନାହାନ୍ତି ବା ଜଣେ ଶିକ୍ଷକରେ ସ୍କୁଲ ଚାଲିଛି। ସେ କ୍ଷେତ୍ରରେ ଗୋଟିଏ ଶ୍ରେଣୀର ପିଲାଙ୍କୁ ୪ ଶ୍ରେଣୀ ଗୃହରେ ବସାଇ ପାଠ ପଢ଼ାଇବା କିପରି ସମ୍ଭବ ହେବ? ତେଣୁ ସରକାର ୮ତାରିଖ ପୂର୍ବରୁ ଖାଲିଥିବା ଶିକ୍ଷକ ପଦବୀ ତୁରନ୍ତ ପୂରଣ କରିବା ପାଇଁ ପଦକ୍ଷେପ ନିଅନ୍ତୁ କିମ୍ବା ବର୍ତ୍ତମାନ ଶିକ୍ଷାଦାନକୁ ସାମୟିକ ଭାବରେ ଚଳନକ୍ଷମ କରିବା ପାଇଁ ସବୁ ବର୍ଗର ବିଦ୍ୟାଳୟରେ ଅବସରପ୍ରାପ୍ତ ଶିକ୍ଷକଙ୍କୁ ନିଯୁକ୍ତି ଦେଇ ୧୦୦ ଦିନର ପାଠପଢ଼ାକୁ ତ୍ୱରିତ ଓ ଶୁନିଶ୍ଚିତ କରିବା ପାଇଁ ନିଷ୍ପତ୍ତି ଗ୍ରହଣ କରନ୍ତୁ। ସେହିପରି ରବିବାର ଦିନ କ୍ଲାସ ହେବା ନିଷ୍ପତ୍ତିକୁ ମଧ୍ୟ ବିରୋଧ କରିଛି ଓଷ୍ଟା। ଶିକ୍ଷକ ଓ ଛାତ୍ରୀଛାତ୍ରଙ୍କ ମାନସିକ ସନ୍ତୁଳନ ପାଇଁ ଛୁଟିର ଆବଶ୍ୟକତା ରହିଛି। ତେଣୁ ରବିବାର ଦିନଟି ଶିକ୍ଷାଦାନ ଦିବସରୁ ମୁକ୍ତ କରିବା ପାଇଁ ଓଷ୍ଟା ପକ୍ଷରୁ ସରକାରଙ୍କୁ ଅନୁରୋଧ କରାଯାଇଛି।