ପାଟନା, ୧୯।୮: ବିହାରର ଆର୍ଜେଡିର ମହିଳା ସାଧାରଣ ସମ୍ପାଦିକା ଗାୟତ୍ରୀ ଦେବୀ ସୋସିଆଲ ମିଡିଆରେ ଏକ ଫଟୋ ପୋଷ୍ଟ କରିଛନ୍ତିଏ ଯାହା ଏବେ ସୋସିଆଲ୍ ମିଡିଆରେ ବେଶ୍ ଭାଇରାଲ୍ ହେବାରେ ଲାଗିଛି। ଏହି ଫଟୋରେ କିଛି ଯୁବକ ସେମାନଙ୍କ ଦେହସାରା ମଦ ବୋତଲ ବାନ୍ଧି ରଖିଥିବାର ଦେଖିବାକୁ ମିଳିଛି। ଏହି ଫଟୋ ପୋଷ୍ଟ କରି ଗାୟତ୍ରୀ ଦେବୀ ବିହାରର ନୀତୀଶ କୁମାର ସରକାରଙ୍କୁ ଟାର୍ଗେଟ୍ କରିଛନ୍ତି। ସେ ଟୁଇଟ୍ କରି ଉଲ୍ଲେଖ କରିଛନ୍ତି, ନୀତୀଶ କୁମାର ଓ ସୁଶୀଲ ମୋଦିଙ୍କ ରାଜ୍ୟରେ ଘରେ ଘରେ ମଦ ଡେଲିଭରୀ କରୁଥିବା ଆତ୍ମନିର୍ଭର ବିହାରୀ ଯୁବକ। ଯେଉଁଠାରେ ବିହାର ସରକାର ଦାବି କରୁଥିଲେ କି ବିହାର ଆତ୍ମନିର୍ଭର ହେଉଛି ସେଠାରେ ଗାୟତ୍ରୀ ଦେବୀ ଏହି ଫଟୋ ପୋଷ୍ଟ କରି ଏହି ଦାବିକୁ ପ୍ରତ୍ୟାଖାନ କରିଛନ୍ତି।
ସେହିଭଳି ପାଟନା ଆର୍ଜେଡି ପକ୍ଷରୁ ମଧ୍ୟ ବିହାର ସରକାରଙ୍କୁ ଟାର୍ଗେଟ୍ କରି ଚୋରା ମଦ କାରବାର ଉପରେ ସେମାନେ ପ୍ରଶ୍ନବାଚୀ ଉଠାଇଛନ୍ତି। ଆର୍ଜେଡି ପକ୍ଷରୁ କୁହାଯାଇଛି ଯେ, ବର୍ତ୍ତମାନ ବିହାରରେ କୋରିଅର କମ୍ପାନୀ ସାନିଟାଇଜର ନାମରେ ମଦ ଚୋରା ଚାଲାଣ କରୁଛି। ଗୋଟିଏ ପଟେ ନୀତୀଶ କୁମାର ରାଜ୍ୟରେ ମଦ ନିଷେଧାଦେଶ ନାମରେ ମାନବଶୃଙ୍ଖଳ ସୃଷ୍ଟି କରୁଛନ୍ତି। କିନ୍ତୁ ଅପରପକ୍ଷରେ ଶାସକ ଦଳ, ମଦ ମାଫିଆ ଏବଂ ପୋଲିସର ସହଭାଗିତାରେ ଗ୍ୟାଲେନ ଗ୍ୟାଲେନ ମଦ ବିହାରରେ ପହଞ୍ଚୁଛି। ଏଠାରେ ଉଲ୍ଲେଖଯୋଗ୍ୟ, ୨୦୧୬ ଅପ୍ରିଲ ପରଠାରୁ ବିହାରରେ ମଦ ବିକ୍ରି ନିଷେଧାଦେଶ କରାଯାଇଛି।