ଧୂଷୁରୀ, ୧୮।୯: ଭଦ୍ରକ ଜିଲା ଧାମନଗର ବ୍ଲକର ଧୂଷୁରୀ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ବା ଏରିଆ ହସ୍ପିଟାଲରେ ରୋଗୀସେବା ବିପର୍ଯ୍ୟସ୍ତ ହୋଇପଡ଼ିଛି। ଆବଶ୍ୟକ ଅନୁଯାୟୀ ଡାକ୍ତର ନ ଥିବା ବେଳେ ଏଠାରେ ରାତ୍ରକାଳୀନ ରୋଗୀସେବା ମିଳୁ ନ ଥିବା ନେଇ ସାଧାରଣରେ ଅସନ୍ତୋଷ ପ୍ରକାଶ ପାଉଛି।
ଏହି ବ୍ଲକର ଧୂଷୁରୀ, ବ୍ରାହ୍ମଣପାଳ, ହସନାବାଦ, ନଦୀଗଁା, ଭାଟ୍ଟସାହି, ସାହସପୁର, ଖଡ଼ିମାହାରା, ପାଳସାହି, ରଇପୁର, ବମକୋରା ଏବଂ ତିହିଡ଼ି ବ୍ଲକ ଓ ପଡ଼ୋଶୀ ଯାଜପୁର ଜିଲାର କେତୋଟି ପଞ୍ଚାୟତ ଜରୁରିକାଳୀନ ଚିକିତ୍ସା ପାଇଁ ଏହି ସ୍ବାସ୍ଥ୍ୟକେନ୍ଦ୍ର ଉପରେ ନିର୍ଭର କରନ୍ତି। ଭଦ୍ରକ-ଆଖଣ୍ଡଳମଣି ରାଜ୍ୟ ରାଜପଥର ମଧ୍ୟସ୍ଥଳରେ ମେଡିକାଲ ଅବସ୍ଥିତ ହୋଇଥିବାରୁ ଦୁର୍ଘଟଣାରେ ଆହତମାନେ ଚିକିତ୍ସା ନିମନ୍ତେ ଏଠାକୁ ଆସିଥାନ୍ତି। କିଛିଦିନ ପୂର୍ବରୁ ଜଣେ ମହିଳା ଡାକ୍ତର ଅବସର ନେବା ପରେ ଏବେ ଜଣେ ଡାକ୍ତରଙ୍କୁ ନେଇ ରୋଗୀସେବା ଚାଲିଛି। ସେ ମଧ୍ୟ ଡେପୁଟେଶନରେ ଏହି ବ୍ଲକର ଦିହୁଡ଼ି ଆନନ୍ଦପୁର ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଡ୍ୟୁଟି କରୁଛନ୍ତି। ଅନ୍ୟ ଜଣେ ଫାର୍ମାସିଷ୍ଟ ନାମକୁ ମାତ୍ର ଚିକିତ୍ସା କରୁଛନ୍ତି। ସ୍ତ୍ରୀ ଓ ପ୍ରସୂତି ବିଭାଗରେ କେହି ବିଶେଷଜ୍ଞ ଡାକ୍ତର ନ ଥିବାରୁ ରୋଗୀମାନଙ୍କୁ ଭଦ୍ରକ କିମ୍ବା ଧାମନଗର ଯିବାକୁ ପଡ଼ୁଛି। ଏହାବ୍ୟତୀତ ରାତ୍ରକାଳୀନ ଚିକିତ୍ସା ସମ୍ପୂର୍ଣ୍ଣ ବନ୍ଦ ରହିଛି। ଡାକ୍ତରଖାନାରେ ରାତିରେ ରହିବା ବ୍ୟବସ୍ଥା ଥିବାବେଳେ ଫାର୍ମାସିଷ୍ଟ ରୁହନ୍ତି ନାହିଁ। ସନ୍ଧ୍ୟା ପରେ ଆସୁଥିବା ରୋଗୀମାନେ ଚିକିତ୍ସା ନ ପାଇ ନିରାଶ ହୋଇ ଫେରୁଛନ୍ତି। ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେଇ ଡାକ୍ତରଖାନାରେ ୨୪ ଘଣ୍ଟିଆ ସ୍ବାସ୍ଥ୍ୟସେବା ଯୋଗାଇ ଦେବାର ବ୍ୟବସ୍ଥା କରିବା ପାଇଁ ଦାବି ହେଉଛି। ଏ ସମ୍ପର୍କରେ ସ୍ବାସ୍ଥ୍ୟକେନ୍ଦ୍ରର ଭାରପ୍ରାପ୍ତ ଅଧିକାରୀ ଡା. ପ୍ରିୟ ରଞ୍ଜନ ପୃଷ୍ଟିଙ୍କୁ ପଚାରିବାରୁ ଡେପୁଟେଶନରେ ଅନ୍ୟ ଏକ ମେଡିକାଲରେ ଡ୍ୟୁଟି କରିବାକୁ ପଡୁଥିବାରୁ ଏଠାରେ ୨୪ ଘଣ୍ଟିଆ ସେବା ଯୋଗାଇବା ସମ୍ଭବ ହେଉନାହିଁ ବୋଲି କହିଛନ୍ତି।