ନୂଆଦିଲ୍ଲୀ, ୩୦।୫: କୋଭିଡ୍ ଟିକା ନ ନେଲେ ଦରମା ନାହଁି। ଉଜେନ ମ୍ୟୁସିନିପାଲଟି କର୍ପୋରେଶନ ପକ୍ଷରୁ ରବିବାର ଏହାର କର୍ମଚାରୀଙ୍କୁ ଏଭଳି ନିର୍ଦ୍ଦେଶ ଦିଆଯାଇଛି। ଏଥିଯୋଗୁ କିଛି ଅଫିସରଙ୍କ ସମେତ ୩୦ ପ୍ରତିଶତ କର୍ମଚାରୀଙ୍କୁ ଦରମା ପାଇଁ ଟିକା ନେବା ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ିବ। ତେବେ ଏଭଳି ନିର୍ଦ୍ଦେଶ କେନ୍ଦ୍ର ସରକାରଙ୍କ ଆଭିମୁଖ୍ୟକୁ ବିରୋଧ କରୁଛି। ମହାମାରୀକୁ ରୋକିବା ପାଇଁ ଟିକାକରଣ ସମ୍ପୂର୍ଣ୍ଣ ସ୍ବଚ୍ଛାକୃତ ବୋଲି କହି ଆସୁଛନ୍ତି କେନ୍ଦ୍ର ସରକାର।
ଦ୍ୱିତୀୟ ଲହରରେ କେନ୍ଦ୍ର ଓ ରାଜ୍ୟ ସରକାର ମ୍ୟୁନିସିପାଲିଟି କର୍ମଚାରୀଙ୍କୁ କରୋନା ଯୋଦ୍ଧା ମାନ୍ୟତା ଦେଇଛନ୍ତି। କୌଣସି ଅଘଟଣକୁ ରୋକିବା ପାଇଁ ସେମାନଙ୍କୁ ଟିକାକରଣ ପାଇଁ ନିର୍ଦ୍ଦେଶ ଦିଆଯାଇଛି। କାରଣ ସେମାନେ ସମ୍ମୁଖରେ ରହୁଛନ୍ତି। ଏଣୁ ସେମାନେ ଯେପରି ସଂକ୍ରମଣର ମାଧ୍ୟମ ନ ହୁଅନ୍ତୁ ବୋଲି ଉଜେନ ମ୍ୟୁନିସିପାଲ କମିଶନର କ୍ଷତିଜ ସିଙ୍ଘାଲ କହିଛନ୍ତି। ଏପର୍ଯ୍ୟନ୍ତ କର୍ପୋରେଶନର ୧୬୦୦ କର୍ମଚାରୀଙ୍କ ମଧ୍ୟରୁ ୭୦ ପ୍ରତିଶତ ଟିକା ନେଇଥିବାବେଳେ ଅନ୍ୟମାନେ ଟିକାକରଣ ପ୍ରତି ବେପରୁଆ ମନଭାବ ଦେଖାଉଛନ୍ତି।
