ଭଦ୍ରକ ଅଫିସ,୧୮।୧: ଦିନ ଥିଲା ସେ ତାଙ୍କ କଣ୍ଠର ଯାଦୁରେ ସମସ୍ତଙ୍କ ମନ ମୋହୁଥିଲେ। ବିଭିନ୍ନ କାର୍ଯ୍ୟକ୍ରମରେ ଷ୍ଟେଜ୍ରେ ଗୀତ ଗାଇ ଦର୍ଶକଙ୍କୁ ବାନ୍ଧି ରଖୁଥିଲେ ଭଦ୍ରକ ବାଇପାସ୍ ସାଇବିହାର ଜଗନ୍ନାଥ ମନ୍ଦିର ନିକଟରେ ବସବାସ କରୁଥିବା ଆନନ୍ଦ ପାତ୍ରଙ୍କ ପୁଅ ଅକ୍ଷୟ (୩୮)। ଗୀତ ଗାଇବା ତାଙ୍କର ନିଶା ହୋଇଥିଲେ ହେଁ ପରିବାର ଚଳାଇବା ପାଇଁ ରୋଜଗାର ପନ୍ଥା ମଧ୍ୟ ଥିଲା। ହେଲେ ରୋଗ ତାଙ୍କୁ ଆଉ ଗୀତ ଗାଇବାକୁ ଦେଲାନି। ସେ ଏବେ ଫୁସ୍ଫୁସ୍ ସଂକ୍ରମଣ ରୋଗରେ ପୀଡ଼ିତ ଯୋଗୁ ଗୀତ ଗାଇପାରୁ ନାହାନ୍ତି। ରୋଜଗାର ବାଟ ବନ୍ଦ ହୋଇଯାଇଥିବା ବେଳେ ତାଙ୍କ ଚିକିତ୍ସା ପାଇଁ ଅର୍ଥ ବାଧକ ସାଜିଛି।
ସ୍ତ୍ରୀ ଓ ୩ ଝିଅଙ୍କୁ ନେଇ ତାଙ୍କର ପରିବାର। ସେ ଜଣେ କଣ୍ଠଶିଳ୍ପୀ ସହ ପାନ, ଚା’ ଦୋକାନ କରି ଜୀବିକା ନିର୍ବାହ କରିଆସୁଥିଲେ। ୩ ବର୍ଷ ହେଲା ସେ ଏହି ରୋଗରେ ପୀଡ଼ିତ। ଡାକ୍ତର ଗୀତ ନ ଗାଇବାକୁ ପରାମର୍ଶ ଦେବା ପରେ ତାଙ୍କ ଗୁଜୁରାଣ ମେଣ୍ଟାଇବାର ବାଟ ବନ୍ଦ ହୋଇଯାଇଛି। ତା’ ସାଙ୍ଗକୁ ତାଙ୍କ ପାନ ଦୋକାନରେ ମଧ୍ୟ ତାଲା ପଡ଼ିଛି। ଚିକିତ୍ସା ପାଇଁ ବାରମ୍ବାର କଟକ, ଭୁବନେଶ୍ୱର ଯାଇ ତାଙ୍କର ସମସ୍ତ ସମ୍ବଳ ଶେଷ ହୋଇଯାଇଛି। ସହକର୍ମୀମାନଙ୍କ ଆର୍ଥିକ ସହଯୋଗରେ ସେ ଚିକିତ୍ସିତ ହେଉଥିବା ବେଳେ ପରିବାର ଚଳାଇବା ଓ ନିଜର ଚିକିତ୍ସା କରାଇବା ତାଙ୍କ ପାଇଁ ବଡ଼ ସମସ୍ୟା ହେଉଛି। ଏ ବାବଦରେ ଜାଣିବା ପରେ ଜିଲାପାଳ ତାଙ୍କୁ ସାହାଯ୍ୟ କରିବେ ବୋଲି ପ୍ରତିଶ୍ରୁତି ଦେଇଛନ୍ତି। ତେବେ ଚିକିତ୍ସା ଓ ପରିବାର ପ୍ରତିପୋଷଣ ଲାଗି ଅର୍ଥର ଘୋର ଅଭାବ ଲାଗି ରହିଥିବାରୁ ସହଯୋଗ ପାଇଁ ଅକ୍ଷୟ ନିବେଦନ କରିଛନ୍ତି।