ଭୁବନେଶ୍ୱର,୧୫।୧(ବ୍ୟୁରୋ):ଚଳିତ ବର୍ଷ ଶୀତ ଉଭେଇଗଲା। ଅଳ୍ପ କେଇ ଦିନ ଟିକେ ଝଟକା ଦେଖାଇ ଗାଏବ ହୋଇଯାଇଛି। ଆଗାମୀ ଦିନରେ ମଧ୍ୟ ଶୀତ ବଢ଼ିବା ନେଇ କୌଣସି ସୂଚନା ନାହିଁ। ଆସନ୍ତା ୨୪ ତାରିଖ ଯାଏ ରାଜ୍ୟରେ ପାଗରେ କୌଣସି ପରିବର୍ତ୍ତନ ହେବ ନାହିଁ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି। ମାର୍ଚ୍ଚ, ଏପ୍ରିଲରେ ଅସମ୍ଭାଳ ତାତି ହେବା ନେଇ ପାଣିପାଗ ବିଶେଷଜ୍ଞ ଆଶଙ୍କା କଲେଣି। ଚଳିତ ବର୍ଷ ଜାନୁୟାରୀ ପ୍ରଥମ ସପ୍ତାହରେ ଦୁଇ ଦିନ ପାଇଁ ପାଣିପାଗ ବିଭାଗ ପକ୍ଷରୁ ଶୀତ ଲହରି ନେଇ ସତର୍କ କରାଯାଇଥିଲା। ଏହାର ପରଠାରୁ ତାତି ବଢ଼ିବା ଆରମ୍ଭ କରିଛି। ଜଳବାୟୁ ପରିବର୍ତ୍ତନ ଶୀତ ଉପରେ ପ୍ରଭାବ ପକାଇଥିବା ପାଣିପାଗ ବିଶେଷଜ୍ଞ କହିଛନ୍ତି। ଚଳିତ ବର୍ଷ ରାଜ୍ୟକୁ ପଶ୍ଚିମାବାୟୁ ପ୍ରବାହ ନ ହେବାରୁ ଶୀତ ବଢ଼ିଲା ନାହିଁ। ଏଥିସହିତ ନଭେମ୍ବରରୁ ଜାନୁୟାରୀ ୧୫ ଯାଏ ରାଜ୍ୟରେ ବର୍ଷାର ନାଁଗନ୍ଧ ନାହିଁ। ଏହି ସମୟରେ ହାଲୁକା ବର୍ଷା ସାଙ୍ଗକୁ ଉତ୍ତର ଦିଗରୁ ଥଣ୍ଡା ବାୟୁ ରାଜ୍ୟକୁ ବହିଥାଏ। ଫଳରେ ଶୀତ ବଢ଼ିଥାଏ। କେବଳ ସେତିକି ନୁହେଁ, ଜଳବାୟୁ ପରିବର୍ତ୍ତନ ପ୍ରଭାବ ଯୋଗୁ ତାମିଲନାଡୁ ଉପକୂଳରେ ମଧ୍ୟ ଆଶାନୁରୂପ ଲଘଚାପ ସୃଷ୍ଟି ହୋଇ ନାହିଁ। ବିଗତ ବର୍ଷଗୁଡ଼ିକରେ ଉପକୂଳରେ ୪ରୁ ୫ଟି ଲଘୁଚାପ କ୍ଷେତ୍ର ସୃଷ୍ଟି ହେଉଥିବା ବେଳେ ଚଳିତ ବର୍ଷ ଡିସେମ୍ବରରେ ମାତ୍ର ଗୋଟିଏ ଲଘୁଚାପ ହୋଇଛି। ଗତ ୩ ମାସ ହେବ ବର୍ଷା ନ ଥିବାରୁ ବାୟୁମଣ୍ଡଳରେ ଧୂଳିକଣା ପୂର୍ଣ୍ଣ ହୋଇ ରହିବାରୁ ଭୂପୃଷ୍ଠର ତାତି ବିକିରଣ ହୋଇପାରୁ ନାହିଁ। ଏସବୁ କାରଣ ଶୀତ କମିବା ପାଇଁ ଦାୟୀ ହୋଇପାରେ ବୋଲି ଭୁବନେଶ୍ୱର ଆଞ୍ଚଳିକ ପାଣିପାଗ କାର୍ଯ୍ୟାଳୟର ପୂର୍ବତନ ନିର୍ଦ୍ଦେଶକ ତଥା ପାଣିପାଗ ବିଶେଷଜ୍ଞ ଶରତ ସାହୁ କହିଛନ୍ତି।
ଅନ୍ୟପକ୍ଷରେ ଶନିବାର ରାଜ୍ୟର ସବୁ ସ୍ଥାନରେ ପାରଦ ଉପରମୁହାଁ ରହିଛି। କେବଳ କୋରାପୁଟରେ ୭.୫ ଓ ଦାରିଙ୍ଗବାଡ଼ିରେ ସର୍ବନିମ୍ନ ତାପମାତ୍ରା ୮.୭ ଡିଗ୍ରୀ ସେଲ୍ସିୟସ ରେକର୍ଡ କରାଯାଇଥିବା ବେଳେ ରାଜ୍ୟର ଅନ୍ୟ ସମସ୍ତ ସ୍ଥାନରେ ପାରଦ ୧୦ରୁ ୨୧ ଡିଗ୍ରୀ ମଧ୍ୟରେ ରହିଛି। ସେହିପରି ଦିନର ସର୍ବୋଚ୍ଚ ତାପମାତ୍ରା ସୋନପୁରରେ ୩୨.୪ ଡିଗ୍ରୀ ସେଲସିୟସ ରେକର୍ଡ କରାଯାଇଥିବା ବେଳେ ବରଗଡ଼ ଓ ଭବାନୀପାଟଣାରେ ୩୨ ଡିଗ୍ରୀ ସେଲ୍ସିୟସ ରହିଛି। ଆସନ୍ତା ୨ ଦିନ ରାଜ୍ୟରେ ପ୍ରବଳ କୁହୁଡ଼ି ହେବାର ସମ୍ଭାବନା ରହିଛି। ରବିବାର ଭଦ୍ରକ, ବାଲେଶ୍ୱର, ମୟୂରଭଞ୍ଜ, ଯାଜପୁର, କଟକ, କେନ୍ଦ୍ରାପଡ଼ା, ପୁରୀ, ଜଗତ୍ସିିଂହପୁର, ଖୋର୍ଦ୍ଧା, ଢେଙ୍କାନାଳ ଆଦି ଜିଲାର କେତେକ ସ୍ଥାନରେ ପ୍ରବଳ କୁହୁଡ଼ି ହେବାର ସମ୍ଭାବନା ରହିଛି।