କୁତ୍ରା,୪ା୩ (ଡି.ଏନ.ଏ.): ସୁନ୍ଦରଗଡ଼ ଜିଲା କୁତ୍ରା ବ୍ଲକ ଅନ୍ତର୍ଗତ ପଞ୍ଚରା ପଞ୍ଚାୟତରେ ଏମ୍ଜିଏନ୍ଆରଇଜିଏସ୍ କାମରେ ଅନିୟମିତତା ହୋଇଥିବା ଅଭିଯୋଗ ହୋଇଛି। ପଞ୍ଚାୟତର କୁସୁମଡେଗି ପାହାଡପଡ଼ା ଓ କୁସୁମଡେଗି ଗୋସେଇପଡା କାଜୁ ବଗିଚା ନିକଟରେ ଏହି ଯୋଜନାରେ ୨ଟି ପୋଖରୀ ଖୋଳା ହେବା କଥା। କିନ୍ତୁ ପୋଖରୀ ନ ଖୋଳି ଶ୍ରମିକ ପାଉଣା ବାବଦକୁ କୁସୁମଡେଗି ପାହାଡପଡ଼ା ପ୍ରକଳ୍ପ ପାଇଁ ୫୧୯୪୮ ଟଙ୍କା ଓ ଗୋସେଇପଡା ପ୍ରକଳ୍ପ ପାଇଁ ୬୨୧୬ ଟଙ୍କା ଉଠାଇ ନିଆଯାଇଛି। ପଞ୍ଚାୟତ ନିର୍ବାହୀ ଅଧିକାରୀ ମହାତ୍ମା ଗାନ୍ଧୀ ନିଶ୍ଚିତ କର୍ମ ନିଯୁକ୍ତି ଯୋଜନା କାର୍ଯ୍ୟ ତଦାରଖ କରିବା ସମୟରେ ଏହି ଅନିୟମିତତା ପଦାକୁ ଆସିଛି। ବିଡିଓ ରବୀନ୍ଦ୍ର କୁମାର ସେଠୀ ଏ ନେଇ ଅବଗତ ହେବା ପରେ ପଞ୍ଚରା ଗ୍ରାମ ରୋଜଗାର ସେବକ ଓ କୁସୁମଡେଗିର ୨ ଜଣ ଗ୍ରାମ ସଂଯୋଜକଙ୍କୁ ଅର୍ଥ ବାଟମାରଣା କରିବା ଅଭିଯୋଗରେ କାରଣ ଦର୍ଶାଅ ନୋଟିସ ଜାରି କରିଛନ୍ତି। ଆଗାମୀ ୨୪ ଘଣ୍ଟା ମଧ୍ୟରେ ଲିଖିତ ଉତ୍ତର ମାଗିଛନ୍ତି। ତେବେ ଏହି ଘଟଣା ଜଣାପଡିବା ପରେ ଶୁକ୍ରବାର ସକାଳେ ତରବରିଆ ଭାବେ ସେଠାରେ ଶ୍ରମିକ ଲଗାଇ କାମ ଆରମ୍ଭ କରାଯାଇଥିବା ଦେଖିବାକୁ ମିଳିଛି। ଅନିୟମିତତାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସାଧାରଣରେ ଦାବି ହେଉଛି।
