ବାଲିକୁଦା(ସ୍ବ.ପ୍ର.)/ଭୁବନେଶ୍ୱର(ବ୍ୟୁରୋ),୨୫ା୧: ଜଗତ୍ସିଂହପୁର ଜିଲା ବାଲିକୁଦା ୨ନଂ. ଜୋନ୍ରେ ଜିଲା ପରିଷଦ ପଦବୀ ପାଇଁ ନାମାଙ୍କନ ପତ୍ର ଦାଖଲ ସମୟରେ ଜାଲ୍ ଜାତିଗତ ପ୍ରମାଣପତ୍ର ଦିଆଯାଇଛି। ଏଭଳି ଅଭିଯୋଗ ଆଣି ପ୍ରାର୍ଥୀ ଜଟାଧାରୀ ଦାସଙ୍କ ବିରୋଧରେ କଂଗ୍ରେସ ସୋମବାର ରାଜ୍ୟ ନିର୍ବାଚନ କମିଶନର ଆଦିତ୍ୟ ପ୍ରସାଦ ପାଢୀଙ୍କୁ ଭେଟିଛି। ଦଳର ଅଭିଯୋଗ ଅନୁଯାୟୀ, ଦାସ ବିଜେଡି ପକ୍ଷରୁ ପ୍ରାର୍ଥୀ ହୋଇଛନ୍ତି। ଏହି ଜୋନ୍ଟି ଅନୁସୂଚିତ ବର୍ଗର ଜାତି ପାଇଁ ଉଦ୍ଦିଷ୍ଟ ଥିବା ବେଳେ ଦାସ ସାଧାରଣ ବର୍ଗର। ମାତ୍ର ସେ ମିଥ୍ୟା ଜାତିଗତ ପ୍ରମାଣପତ୍ର ଆଧାରରେ ଅନୁସୂଚିତ ଜାତିର ବୋଲି ଦର୍ଶାଇ ନାମାଙ୍କନପତ୍ର ଦାଖଲ କରିଛନ୍ତି। ଏହାଛଡ଼ା ଦାସଙ୍କ ୨ଟି ସ୍ତ୍ରୀ ଥିବା ବେଳେ ସତ୍ୟପାଠରେ ଜଣେ ବୋଲି ଦର୍ଶାଯାଇଛି । ଏ ସମ୍ପର୍କରେ ରବିବାର ଜିଲା ରିଟର୍ନିଂ ଅଫିସରଙ୍କ ନିକଟରେ କଂଗ୍ରେସ ଫେରାଦ ହୋଇଥିଲା। ମାତ୍ର କୌଣସି କାର୍ଯ୍ୟାନୁଷ୍ଠାନ ନ ହେବାରୁ କଂଗ୍ରେସ ପ୍ରତିନିଧି ଦଳ ରାଜ୍ୟ ନିର୍ବାଚନ କମିଶନଙ୍କ ନିକଟରେ ସମ୍ପୃକ୍ତ ଅଫିସର ବିରୋଧରେ ଅଭିଯୋଗ କରିଛନ୍ତି। ଏଥିସହ ଉପରୋକ୍ତ ଅଭିଯୋଗର ତଦନ୍ତ କରି ସମ୍ପୃକ୍ତ ପ୍ରାର୍ଥୀଙ୍କ ନାମାଙ୍କନ ପତ୍ର ନାକଚ କରିବା ସହ ତାଙ୍କ ବିରୋଧରେ ଫୌଜଦାରି ମାମଲା ରୁଜୁ କରିବାକୁ କଂଗ୍ରେସ ପକ୍ଷରୁ ଦାବି କରାଯାଇଛି। ପ୍ରାର୍ଥୀ ଦାସ କହିଛନ୍ତି, ତାଙ୍କର ଜାତିଗତ ପ୍ରମାଣପତ୍ର ଠିକ୍ ରହିଛି। ସେ କୌଣସି ଭୁଲ୍ ଜାତି ପ୍ରମାଣପତ୍ର ସରକାରୀ ଅଫିସରୁ ବାହାର କରିନାହାନ୍ତି। ସେହିପରି ୨ ସ୍ତ୍ରୀ ଥିବା ସମ୍ପର୍କରେ ସେ କହିଛନ୍ତି, ପ୍ରଥମେ ସୁଲୋଚନା ସେନାପତିଙ୍କୁ ବିବାହ କରିଥିଲେ। ୨୦୧୨ରେ ତାଙ୍କ ମୃତ୍ୟୁ ପରେ ସେ ପ୍ରତିମା ବେହେରାଙ୍କୁ ବିବାହ କରିଥିଲେ।