ଖୋର୍ଦ୍ଧା ଅଫିସ,୨୧ା୧୦: ଖୋର୍ଦ୍ଧା କେନ୍ଦ୍ର ସମବାୟ ବ୍ୟାଙ୍କ (କେସିସିବି) ପରିଚାଳନା ପରିଷଦ ଉପାଧ୍ୟକ୍ଷ ପଦବୀ ମହିଳାଙ୍କ ପାଇଁ ସଂରକ୍ଷିତ ରହିଛି। ଏହି ପଦବୀ ପାଇଁ ସୋମବାର ନାମାଙ୍କନ ଦାଖଲ ରହିଛି। ପୂର୍ବାହ୍ନ ୧୧ଟାଠାରୁ ଅପରାହ୍ନ ୧ଟା ପର୍ଯ୍ୟନ୍ତ ନାମାଙ୍କନ ଦାଖଲ, ଅପରାହ୍ନ ୧ଟା ଠାରୁ ୨ଟା ପର୍ଯ୍ୟନ୍ତ ଆପତ୍ତି ଅଭିଯୋଗ ଶୁଣାଣି କରାଯିବ। ୨୩ ତାରିଖରେ ପୂର୍ବାହ୍ନ ୧୧ଟା ଠାରୁ ଅପରାହ୍ନ ୧ଟା ମଧ୍ୟରେ ନାମାଙ୍କନ ପ୍ର୍ଯଯାହାର ଏବଂ ୨୮ତାରିଖରେ ବୋର୍ଡ ନିର୍ଦ୍ଦେଶକଙ୍କୁ ନେଇ ମତଦାନ କରାଯିବ ବୋଲି ନିର୍ବାଚନ ଅଧିକାରୀ ତଥା ଅତିରିକ୍ତ ଜିଲାପାଳ ମନୋଜ ପାଢୀ ସୂଚନା ଦେଇଛନ୍ତି। ୧୫ ବୋର୍ଡ ନିର୍ଦ୍ଦେଶକଙ୍କ ମଧ୍ୟରୁ ୧୨ଜଣ ଶାସକ ଦଳ ସମର୍ଥିତ ରହିଛନ୍ତି। ପୂର୍ବରୁ ପରିଚାଳାନ ପରିଷଦ ସଭାପତି ଭାବେ ୧୪ନଂ. ବୋର୍ଡ ନିର୍ଦ୍ଦେଶକ ଅଭିଷେକ ସିଂ ସାମନ୍ତ ଶାସକ ଦଳ ସମର୍ଥନରେ ନିର୍ଦ୍ୱନ୍ଦରେ ନିର୍ବାଚିତ ହୋଇଥିଲେ। ପୂର୍ବରୁ ଅଧ୍ୟକ୍ଷ ପଦବୀକୁ ନେଇ ଦଳରେ ଛକାପଞ୍ଝା ଲାଗି ରହିଥିଲା। ଶେଷରେ ବିଧାୟକଙ୍କ ନିଷ୍ପତ୍ତି କ୍ରମେ ଜିଲା ପର୍ଯ୍ୟବେକ୍ଷିକା ତଥା ରାଜସ୍ବ ଓ ବିପର୍ଯ୍ୟୟ ମନ୍ତ୍ରୀ ପ୍ରମିଳା ମଲ୍ଲିକ ଅଭିଷେକଙ୍କ ନାମ ଘୋଷଣା କରିଥିଲେ। ଏବେ ପଦ୍ମପୁର ନିର୍ବାଚନ ଲାଗି ଜିଲା ସଭାପତି ବିଭୂତି ବଳବନ୍ତରାୟ, ବେଗୁନିଆ ବିଧାୟକ ରାଜେନ୍ଦ୍ର ସାହୁ ଅନୁପସ୍ଥିତ ରହିଛନ୍ତି। ତେବେ ଦଳ କାହାକୁ ଉପାଧ୍ୟକ୍ଷା ଭାବେ ନାମ ଘୋଷଣା କରିବ, ତାହାକୁ ନେଇ ଚର୍ଚ୍ଚା ଜୋର ଧରିଛି।