ନୂଆଦିଲ୍ଲୀ, ୧୬ା୫: ଦୁଇଥର ଅଲିମ୍ପିକ ପଦକ ବିଜୟୀ ରେସ୍ଲର ସୁଶୀଲ କୁମାରଙ୍କ ବିରୋଧରେ ଦିଲ୍ଲୀର ଏକ କୋର୍ଟ ଜାମିନବିହୀନ ଗିରଫ ପରଓ୍ବାନା ଜାରି କରିଛନ୍ତି। କେବଳ ସୁଶୀଲ ନୁହନ୍ତି ପୂର୍ବତନ ଜାତୀୟ ଜୁନିୟର ରେସ୍ଲିଂ ଚାମ୍ପିୟନ ୨୩ ବର୍ଷୀୟ ସାଗର ରାଣାଙ୍କୁ ହତ୍ୟା ମାମଲାରେ ଅନ୍ୟ ୯ଜଣଙ୍କୁ ମଧ୍ୟ ଜାମିନବିହୀନ ଗିରଫ ପରଓ୍ବାନା ଜାରି କରାଯାଇଛି। ସୁଶୀଲ କୁମାର ନିଖୋଜ ହୋଇଯିବା ପରେ ପୂର୍ବରୁ ଦିଲ୍ଲୀ ପୋଲିସ ତାଙ୍କ ବିରୋଧରେ ଏକ ଲୁକ୍ଆଉଟ ନୋଟିସ ଜାରି କରିଥିଲା। ପୋଲିସ ଶୁକ୍ରବାର ଦିଲ୍ଲୀ ସରକାରଙ୍କ ନିକଟକୁ ଏକ ଚିଠି ଲେଖିଛି। ଏକ ହତ୍ୟା ମାମଲାରେ ଅଭିଯୁକ୍ତ ହୋଇଥିଲେ ମଧ୍ୟ ସୁଶୀଲ କୁମାର ଏବେ ସୁଦ୍ଧା ଅଫିସର ଅନ୍ ସ୍ପେଶାଲ ଡ୍ୟୁଟି(ଓଏସ୍ଡି) ପଦବୀରେ ରହିଛନ୍ତି ବୋଲି ଏଥିରେ ଉଲ୍ଲେଖ କରିଛି। ତାଙ୍କ ବିରୋଧରେ ବିଭାଗୀୟ କାର୍ଯ୍ୟାନୁଷ୍ଠାନ ପାଇଁ ନିବେଦନ କରିଛି। ପୋଲିସ ମଧ୍ୟ ସୁଶୀଲଙ୍କୁ ଧରିବା ଲାଗି ପୁରସ୍କାର ଘୋଷଣା କରିବା ଲାଗି ବିଚାର କରି ଦେଖୁଛି। ଛତ୍ରସାଲ ଷ୍ଟାଡିୟମରେ ଗଣ୍ଡଗୋଳ ଘଟଣାର ଅନ୍ୟତମ ଅଭିଯୁକ୍ତ ସୁଶୀଲ ନିଜକୁ ନିର୍ଦ୍ଦୋଷ ବୋଲି କହୁଛନ୍ତି। ଖବର ଅନୁସାରେ ଦୁଇ ଗୋଷ୍ଠୀ ରେସ୍ଲରଙ୍କ ମଧ୍ୟରେ ଝଗଡ଼ା ହୋଇଥିଲା। କ୍ରମେ ଉତ୍ତେଜନା ବୃଦ୍ଧିପାଇବାରୁ ଉଭୟ ପକ୍ଷ ପରସ୍ପରକୁ ଗୁଳିଚାଳନା କରିଥିଲେ। ଗୁଳିମାଡ଼ରେ ପୂର୍ବତନ ଜାତୀୟ ଜୁନିୟର ରେସଲିଂ ଚାମ୍ପିୟନ ସାଗରଙ୍କର ମୃତ୍ୟୁ ଘଟିଥିଲା। ସେହିଦିନଠାରୁ ସୁଶୀଲ ନିଖୋଜ ଅଛନ୍ତି। କିନ୍ତୁ ସେ କହୁଛନ୍ତି ଏହି ଗଣ୍ଡଗୋଳ ସହ ସେ କିମ୍ବା ତାଙ୍କ ରେସ୍ଲରମାନଙ୍କ ସମ୍ପୃକ୍ତି ନାହିଁି। କେତେଜଣ ଅଜଣା ବ୍ୟକ୍ତି ଷ୍ଟାଡିୟମ ପରିସରରେ ପ୍ରବେଶ କରି ଏହି କାଣ୍ଡ ଭିଆଇଛନ୍ତି।
