ପୁରୀ ଅଫିସ,୬ା୭: ଆଇନର କାଠଗଡ଼ା ଭିତରେ ଦୀର୍ଘଦିନ ଲଢେଇ ଚାଲିଲା। ପ୍ରଥମେ ନାଁ ଓ ପରେ ହଁ କହିଲେ ସୁପ୍ରିମକୋର୍ଟ। ଶେଷରେ ପୁରୀ ରଥଯାତ୍ରାକୁ ଦେଲେ ସର୍ତ୍ତମୂଳକ ଅନୁମତି। ବିନା ଭକ୍ତରେ ହେବ ରଥଯାତ୍ରା। କରୋନା ସଂକ୍ରମଣ ଯେପରି ନ ବ୍ୟାପିବ ଏବଂ କୋଭିଡ୍ ଟେଷ୍ଟ ନେଗେଟିଭ ଥିବା ସେବାୟତ ହିଁ କେବଳ ସାମିଲ ହେବେ ସେ ନେଇ ପଦକ୍ଷେପ ନେବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଲେ। ଶେଷ ମୁହୂର୍ତ୍ତରେ ଅନୁମତି ମିଳିବାରୁ ରଥଯାତ୍ରାର ସଫଳ ଆୟୋଜନ ସରକାରଙ୍କ ପାଇଁ ଏକ ଚ୍ୟାଲେଞ୍ଜ ଥିଲା। ଏଥିପାଇଁ ପୁରୀକୁ ମୁଖ୍ୟ ପ୍ରଶାସକ, ଡିଜିପିଙ୍କ ସମେତ ମନ୍ତ୍ରୀ ଓ ବରିଷ୍ଠ ପ୍ରଶାସନିକ ଅଧିକାରୀଙ୍କ ସୁଅ ଛୁଟିଲା। ୭୦ ପ୍ଲାଟୁନ ଫୋର୍ସ ଏବଂ ୪୦୦ରୁ ଊର୍ଦ୍ଧ୍ୱ ପୋଲିସ ଅଧିକାରୀ ମଧ୍ୟ ନିୟୋଜିତ ହେଲେ। ୩ ମନ୍ତ୍ରୀଙ୍କୁ ପୁରୀରେ ଡେରା ପକାଇବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଲେ। ହେଲେ ସବୁ ସୁରକ୍ଷା ବ୍ୟବସ୍ଥାକୁ କାଟି ଜଣେ ଅଣସେବକ ରଥଯାତ୍ରାରେ ସାମିଲ ହେବା ଏବଂ ରଥ ଉପରକୁ ଯିବା ଘଟଣା ପ୍ରଶାସନିକ ପ୍ରସ୍ତୁତିକୁ ପଦାରେ ପକାଇ ଦେଇଛି। ସମ୍ପୃକ୍ତ ଅଣସେବକଙ୍କ ଫଟୋ ସୋସିଆଲ ମିଡିଆରେ ଭାଇରାଲ ହେବା ପରେ ଏହାକୁ ନେଇ ଗଭୀର ଉଦ୍ବେଗ ପ୍ରକାଶ କରିବା ସହ ଏହାର ତଦନ୍ତ ଦାବି କରିଛନ୍ତି ସେବାୟତ।
ସୂଚନା ଅନୁଯାୟୀ, ବାହୁଡ଼ା, ସୁନାବେଶରେ ସାମିଲ ହୋଇଥିବା ଏହି ଅଣସେବକଙ୍କ ଘର ହେଉଛି ଖୋର୍ଦ୍ଧା ଜିଲା ଜଙ୍କିଆ ଅଞ୍ଚଳରେ। ସେ ସେବାୟତ ବେଶ ଧାରଣ କରିଛନ୍ତି ଓ ବେକରେ ପାସ୍ ମଧ୍ୟ ପକାଇଛନ୍ତି। ବାହୁଡ଼ା ଯାତ୍ରାରେ ସେବାୟତଙ୍କ ସହ ରଥ ଟାଣିଛନ୍ତି। ସୁନାବେଶରେ ସାମିଲ ହୋଇ ସେବାୟତଙ୍କ ସହ ଫଟୋ ଉଠାଇଛନ୍ତି। ଏପରି କି ରଥ ଉପରକୁ ଯାଇ ଫଟୋ ଉଠାଇଛନ୍ତି। ବହୁ ଫଟୋ ସେ ତାଙ୍କ ଫେସ୍ବୁକ ଆକାଉଣ୍ଟରେ ଅପ୍ଲୋଡ୍ କରିଛନ୍ତି। ଏହି ଫଟୋଗୁଡ଼ିକ ଏବେ ସୋସିଆଲ ମିଡିିଆରେ ଭାଇରାଲ ହୋଇଛି। ଚଳିତବର୍ଷ ଏତେ କଟକଣା ସତ୍ତ୍ବେ ସମ୍ପୃକ୍ତ ଯୁବକ କିପରି ରଥଯାତ୍ରାରେ ସାମିଲ ହେଲେ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ମହାମାରୀ କରୋନା ସଂକ୍ରମଣକୁ ଦେଖି ଏଥର ରଥଯାତ୍ରା ଦ୍ୱନ୍ଦ୍ୱରେ ରହିଥିଲା। ଆଇନଗତ ଲଢେଇ ପରେ କେବଳ ପୁରୀ ରଥଯାତ୍ରାକୁ ସର୍ତ୍ତମୂଳକ ଅନୁମତି ମିଳିଥିଲା। ବିନା ଭକ୍ତରେ ଏବଂ କରୋନା ସଂକ୍ରମଣ ଯେପରି ନ ବ୍ୟାପିବ ସେଥିପ୍ରତି ସବୁପ୍ରକାର ପଦକ୍ଷେପ ନେବାକୁ ସୁପ୍ରିମ୍କୋର୍ଟ କହିଥିଲେ। ରଥଯାତ୍ରାରେ ସାମିଲ ସମସ୍ତ ସେବାୟତଙ୍କ କୋଭିଡ୍ ଟେଷ୍ଟ କରାଯାଇଥିଲା। ମାତ୍ର ସମ୍ପୃକ୍ତ ଅଣସେବକ କିପରି ପାସ୍ ପାଇ ରଥଯାତ୍ରାରେ ସାମିଲ ହେଲେ ଏବଂ ତାଙ୍କର କୋଭଡ୍ଡ୍ ଟେଷ୍ଟ ହୋଇଛି ନା ନାହିଁ ତାକୁ ନେଇ ଏବେ ପ୍ରଶ୍ନ ଉଠିଛି। ବରିଷ୍ଠ ଦଇତାପତି ସେବକ ବିନାୟକ ଦାସମହାପାତ୍ର କହିଛନ୍ତି, କେତେଜଣ ଦଇତାପତି ସେବକ ଏବଂ ବିଭିନ୍ନ ନିଯୋଗ କର୍ମକର୍ତ୍ତାଙ୍କୁ ସହଯୋଗ କରିବା ପାଇଁ ସହାୟକ ପାସ୍ ମିଳିଥାଏ। ସମ୍ପୃକ୍ତ ସେବକମାନେ ଏହି ପାସ୍ ସେମାନଙ୍କୁ ସହଯୋଗ କରିବାକୁ ଥିବା ବ୍ୟକ୍ତିଙ୍କୁ ଦେଇଥାନ୍ତି। କିନ୍ତୁ ସେମାନେ କେବଳ ସହଯୋଗ କରିବାକୁ ଥାନ୍ତି। ଯେଉଁ ଅଣସେବକଙ୍କ ଫଟୋ ସୋସିଆଲ ମିଡିଆରେ ଭାଇରାଲ ହୋଇଛି ତାଙ୍କୁ କିଏ ପାସ୍ ଦେଇଥିଲା? ତାଙ୍କର କୋଭଡ୍ ଟେଷ୍ଟ କରାଯାଇଥିଲା ନା ନାହିଁ? ସେ ରଥ ଟାଣିବା ଏବଂ ଅନ୍ୟ କେତେକ ଫଟୋ ଉଠାଇ କିପରି ଭାଇରାଲ କିପରି କଲେ ଏ ସବୁର ତଦନ୍ତ ହେବା ଦରକାର ବୋଲି ଦାସମହାପାତ୍ର ପ୍ରକାଶ କରିଛନ୍ତି।