ସିଓଲ,୨୦ ।୨: ଆମେରିକା-ଦକ୍ଷିଣ କୋରିଆ ମିଳିତ ଭାବେ ଆକାଶମାର୍ଗରେ ଯୁଦ୍ଧାଭ୍ୟାସ କରିବାର ଗୋଟିଏ ଦିନ ପରେ ଉତ୍ତର କୋରିଆ ପୁଣିଥରେ ସ୍ୱଳ୍ପ କ୍ଷମତା ସମ୍ପନ୍ନ ଦୁଇଟି ବାଲେଷ୍ଟିକ ମିଶାଇଲ ପରୀକ୍ଷା କରିଛି । ଗଣ ମାଧ୍ୟମ ରିପୋର୍ଟରେ ଏହି ସୂଚନା ଦିଆଯାଇଛି । ୪୮ ଘଣ୍ଟା ଭିତରେ ଉତ୍ତର କୋରିଆ ଦ୍ୱିତୀୟ ଥର ଲାଗି ଏହି ବାଲେଷ୍ଟିକ ମିଶାଇଲ ପରୀକ୍ଷା କରିଛି ।
ଦକ୍ଷିଣ କୋରିଆର ସେନା(ଜେସିଏସ) କହିଛି ଯେ ସେ ଉତ୍ତର କୋରିଆର ସୁଖୋନ ଅଞ୍ଚଳରୁ ସକାଳ ୭ଟାରୁ ୭ଟା ୧୧ ମଧ୍ୟରେ ଦୁଇଟି ବାଲେଷ୍ଟିକ ମିଶାଇଲ ପରୀକ୍ଷା ହେବା ସୂଚନା ପାଇଛି । ଜେସିଏସ ଏକ ବୟାନରେ କହିଛି, ଦେଶର ସୁରକ୍ଷାକୁ ମଜଭୁତ କରିବାକୁ ଦକ୍ଷିଣ କୋରିଆର ସେନା ଆମେରିକା ସହ ସହଯୋଗ ପାଇଁ ସମ୍ପୂର୍ଣ୍ଣ ରୁପେ ପ୍ରସ୍ତୁତ ।
ଦକ୍ଷିଣ କୋରିଆର ସେନା କହିଛି, ଆମେରିକା ଓ ଦକ୍ଷିଣ କୋରିଆ ଦ୍ୱାରା ରବିବାର ବୋମା ବର୍ଷଣ କରିବାର ମିଳିତ ସମରାଭ୍ୟାସର ଗୋଟିଏ ଦିନ ପରେ ଉତ୍ତର କୋରିଆ ଏହି ବାଲେଷ୍ଟିକ ମିଶାଇଲ ପରୀକ୍ଷା କରିଛି । ଜଏଣ୍ଟ ଚିଫ ଅଫ ଷ୍ଟାଫ(ଜେସିଏସ) ଅନୁଯାୟୀ, ଯୁଦ୍ଧାଭ୍ୟାସ ସମୟରେ ଦକ୍ଷିଣ କୋରିଆର ଏଫ-୩୫ଏ ଷ୍ଟିଲ୍ଥ ଯୁଦ୍ଧ ବିମାନ ଓ ଏଫ-୧୫କେ ଜେଟ ବିମାନ ଆମେରିକାର ଏଫ-୧୬ ଯୁଦ୍ଧ ବିମାନ ସହ ଉଡାଣ ଆରମ୍ଭ କରିଥିଲା ।
