ଅଲ୍ ଏନ୍ (ୟୁଏଇ), ୨୪ା୩ (ପି.ଟି.)-ଏଠାରେ ଚାଲିଥିବା ପାରା ଶୁଟିଂ ବିଶ୍ୱକପ୍ରେ ପି୪ ମିକ୍ସଡ ୫୦ମିଟର ପିସ୍ତଲ ଏସ୍ଏଚ୍୧ ଇଭେଣ୍ଟରେ ସ୍ବର୍ଣ୍ଣ ପଦକ ହାସଲ ସହ ନୂଆ ବିଶ୍ୱ ରେକର୍ଡ କରିଛନ୍ତି ଉଦୀୟମାନ ଶୁଟର ମନୀଷ ନରଓ୍ବାଲ। ଇଭେଣ୍ଟରେ ଭାରତର ଏହା ହେଉଛି ଦ୍ୱିତୀୟ ସ୍ବର୍ଣ୍ଣ ପଦକ। ପୂର୍ବରୁ ସିଂଘରାଜ ପି-୧ ପୁରୁଷ ୧୦ ମିଟର ପିସ୍ତଲ ଏସ୍ଏଚ୍ ୧ ଇଭେଣ୍ଟରେ ସ୍ବର୍ଣ୍ଣ ଜିତିଥିଲେ। ୨୦୧୯ ବିଶ୍ୱଚାମ୍ପିୟନଶିପ୍ ବ୍ରୋଞ୍ଜ ବିଜେତା ପ୍ରତିଯୋଗିତାରେ ଇରାନର ସାରେ ଜାଭାନମାର୍ଦ୍ଦି ଓ ୟୁକ୍ରେନର ଓଲେକ୍ସି ଡେନୁସୁଇକ୍ଙ୍କ ସମେତ ପାରାଅଲିମ୍ପିକ ଓ ବିଶ୍ୱ ଚାମ୍ପିୟନମାନଙ୍କୁ ପଛରେ ପକାଇ ୨୨୯.୧ ପଏଣ୍ଟ ସହ ପ୍ରଥମ ସ୍ଥାନ ଅଧିକାର କରିଥିଲେ। ଏଥିସହ ସେ ସର୍ବିୟାର ରାସ୍ତକୋ ଜୋକିକ (୨୨୮.୬)ଙ୍କ ଦ୍ୱାରା ପ୍ରତିଷ୍ଠା ହୋଇଥିବା ବିଶ୍ୱ ରେକର୍ଡକୁ ଭଙ୍ଗ କରିଦେଇଥିଲେ। ୧୯ ବର୍ଷୀୟ ନରଓ୍ବାଲ ତାଙ୍କ ନିକଟତମ ପ୍ରତିଦ୍ୱନ୍ଦ୍ୱୀ ଜାଭାନମାର୍ଦ୍ଦିଙ୍କଠାରୁ ୫.୭ ପଏଣ୍ଟ ଆଗରେ ରହିଥିଲେ।