ମହାମାରୀ କରୋନାର ଟିକା ବାହାରିବା ପରେ ଲୋକେ ସାମାନ୍ୟ ଆଶ୍ୱସ୍ତ ଅନୁଭବ କରିଥିଲେ। ହେଲେ ଏବେ ପୁଣି ଲେଉଟିଛି କରୋନା। ଦିନକୁ ଦିନ ସଂକ୍ରମଣ ବଢ଼ୁଥିବାରୁ ମାସ୍କର ବ୍ୟବହାର ଏବଂ ସାମାଜିକ ଦୂରତ୍ୱ ରକ୍ଷା କରିବା ଆବଶ୍ୟକ ହୋଇପଡ଼ିଛି। ହେଲେ ମାସ୍କ ପିନ୍ଧିବା ଯୋଗୁ କାନରେ ଯନ୍ତ୍ରଣା ସାଙ୍ଗକୁ ନାକରେ ଦାଗ ହୋଇଥାଏ। ଏପରିକି ଖାଇବା ସମୟରେ ଏହାକୁ ବାହାର କରିବାକୁ ପଡ଼ୁଥିବା ଯୋଗୁ କେହି କେହି ଅସହଜ ମନେ କରନ୍ତି। ଏଭଳି ଅସୁବିଧାକୁ ଦୃଷ୍ଟିରେ ରଖି ମେକ୍ସିକୋର ଗବେଷକମାନେ ଏକ ସୁବିଧାଜନକ ମାସ୍କର ଉଦ୍ଭାବନ କରିଛନ୍ତି, ଯାହାର ନାମ ରହିଛି ‘ନୋଜ୍ ଓନ୍ଲି ମାସ୍କ(କେବଳ ନାକର ମାସ୍କ)’। ଏହାକୁ ପିନ୍ଧି ଆରାମରେ ଖାଇହେବ। ଏହାଛଡ଼ା କରୋନା ସଂକ୍ରମଣରୁ କିଛି ମାତ୍ରାରେ ଏହା ରକ୍ଷା କରିବ।
ନୋଜ୍ ଓନ୍ଲି ମାସ୍କ ଦ୍ୱାରା କେବଳ ନାକ ଘୋଡାଇ ହୋଇ ରହିଥାଏ। ଏଣୁ ଏହା କେତେ ମାତ୍ରାରେ ସୁରକ୍ଷିତ ତାହାକୁ ନେଇ ସନ୍ଦେହ ଉପୁଜୁଛି। ଅତିରିକ୍ତ ସୁରକ୍ଷା ପାଇଁ ଏହି ମାସ୍କ ଉପରେ ଆଉ ଏକ ସାଧାରଣ ମାସ୍କ ପିନ୍ଧି ହେବ। ଏକ ସମ୍ବାଦ ଏଜେନ୍ସି ପକ୍ଷରୁ ଜାରି କରାଯାଇଥିବା ଭିଡିଓରେ ଜଣେ ମହିଳା ଏବଂ ପୁରୁଷଙ୍କୁ ମାସ୍କ ଲଗାଇ ଖାଉଥିବା ଦେଖାଯାଇଛି। ସେମାନେ ପ୍ରଥମେ ପିନ୍ଧିଥିବା ସାଧାରଣ ମାସ୍କଟିକୁ ଓହ୍ଲାଇବା ପରେ ନାକର ମାସ୍କ ଲଗାଇ ସୁବିଧାରେ ଖାଉଛନ୍ତି।
କରୋନା ଏକ ଶ୍ୱାସକ୍ରିୟା ସମ୍ପର୍କିତ ରୋଗ। ଏହାର ଭୂତାଣୁ ନିଃଶ୍ୱାସରେ ନାକ ବାଟ ଦେଇ ଫୁସଫୁସ୍ରେ ପହଞ୍ଚିଥାଏ। ଏଣୁ ଯଦି କେହି ସଂକ୍ରମିତ କାଶି ଥାଏ ନଚେତ ଛିଙ୍କିଦିଏ ତେବେ ଅନେକ ଲୋକ ସଂକ୍ରମିତ ହୋଇପାରନ୍ତି। ଏହାକୁ ନେଇ ସମସ୍ତେ ମାସ୍କ ପିନ୍ଧିବା ଜରୁରୀ। ସଂକ୍ରମିତ ହେବାର ସମ୍ଭାବନା ଥିବାରୁ ନାକ ଢ଼ାଙ୍କି ହୋଇ ରହିବା ଉଚିତ ବୋଲି କୁହାଯାଉଛି। ଏଣୁ ନୋଜ୍ ଓନ୍ଲି ମାସ୍କ ସେ ଦିଗରେ ଭଲ ରହିବ ବୋଲି ଚର୍ଚ୍ଚା ହେଉଛି। ହେଲେ କେହି କେହି ଏଥିରେ ନୂତନତ୍ୱ ନାହିଁ ବୋଲି କହୁଛନ୍ତି। ଆଗକାଳରେ ଜୋକରମାନେ ନାକରେ ଏଭଳି ପିନ୍ଧିଥାନ୍ତି ବୋଲି ମଧ୍ୟ ସେମାନେ ଯୁକ୍ତି ରଖୁଛନ୍ତି। ଅପରପକ୍ଷେ ଆଉ କିଛି ଲୋକ ଖାଇବା ସମୟରେ ନାକ ବାଟ ଦେଇ ଭୂତାଣୁ ପ୍ରବେଶ କରିବାର ସମ୍ଭାବନା ଥିବାରୁ ଏହି ମାସ୍କ ଭଲ ରହିବ ବୋଲି କହୁଛନ୍ତି।
ପୂର୍ବରୁ ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଥିଲା। ସେଥିରେ କରୋନା ସଂକ୍ରମଣରୁ ରକ୍ଷା ପାଇବାକୁ ହେଲେ ନାକ, ମୁହଁ ଆଦି ଭଲଭାବେ ଘୋଡାଇ ହୋଇ ରହୁଥିବା ମାସ୍କ ପିନ୍ଧିବାକୁ କୁହାଯାଇଛି।