ନୋଜ୍ ରିଂ କେବଳ ମହିଳାଙ୍କ ସୌନ୍ଦର୍ଯ୍ୟ ବୃଦ୍ଧି କରେ ସେକଥା ନୁହେଁ, ସ୍ବାସ୍ଥ୍ୟ ସହିତ ଜଡ଼ିତ ଅନେକ ସମସ୍ୟାରୁ ବି ଏହା ମୁକ୍ତି ଦେଇଥାଏ ବୋଲି ହୁଏତ ଅନେକଙ୍କୁ ଜଣା ନଥିବ। ତା’ହେଲେ ଜାଣନ୍ତୁ ନୋଜ୍ ରିଂକୁ ନେଇ କ’ଣ ସବୁ ରହିଛି ରୋଚକ କଥା।
ହିନ୍ଦୁ ଧର୍ମରେ ଆଜକୁ ବହୁ ବର୍ଷ ତଳୁ ମହିଳାମାନେ ନୋଜ ରିଂ ବା ନାକଫୁଲ ଅଥବା ନୋଥ ପିନ୍ଧିବାର ପ୍ରଥା ଚାଲି ଆସିଛି। କିନ୍ତୁ ଏବେ ଏହାର ଓଲଟା ଦେଖିବାକୁ ମିଳୁଛି। ଆଉ ପ୍ରଥା ପାଇଁ ନୁହେଁ ବରଂ ଫ୍ୟାଶନ ପାଇଁ ଅନେକ ମହିଳା ତଥା ଯୁବତୀ ବିଭିନ୍ନ ଅକେଜନ୍ରେ ଲାଟେଷ୍ଟ ଡିଜାଇନର୍ ନୋଜ୍ ରିଂ ପିନ୍ଧିବାକୁ ପସନ୍ଦ କରୁଛନ୍ତି। ତେବେ ସେ ପ୍ରଥା ହେଉ ଅବା ଫ୍ୟାଶନ ହେଉ, ନୋଜ୍ ରିଂ ପିନ୍ଧିବା ଦ୍ୱାରା ମହିଳାଙ୍କର କ’ଣ ସବୁ ଉପକାର ହୋଇଥାଏ ଜାଣନ୍ତୁ ସେ ସମ୍ପର୍କରେ…
ଖରାପ ନଜରରୁ ରକ୍ଷା କରେ
ମହିଳାଙ୍କର ଷୋହଳ ଶୃଙ୍ଗାର ମଧ୍ୟରୁ ନୋଜ୍ ରିଂ ବା ନୋଥ ହେଉଛି ଗୋଟିଏ। ଏହାକୁ ସୌଭାଗ୍ୟର ପ୍ରତୀକ ବୋଲି ବି କୁହାଯାଇଥାଏ। ଖାସ୍କରି ନବବଧୂ ପାଇଁ ଏହାକୁ ପିନ୍ଧିବା ଅତ୍ୟନ୍ତ ଶୁଭ ହୋଇଥାଏ। ଏହା କେବଳ ତା’ର ରୂପକୁ ସୁନ୍ଦର କରିଥାଏ ତାହା ନୁହେଁ ବରଂ ଅନେକ ଖରାପ ନଜରରୁ ତାକୁ ରକ୍ଷା କରିଥାଏ ବୋଲି ବିଶ୍ୱାସ ରହିଛି।
ପୀଡ଼ାରୁ ମୁକ୍ତି ଦିଏ
ମାସିକ ଋତୁସ୍ରାବବେଳେ ମହିଳାଙ୍କୁ ଅନେକ କଷ୍ଟ ସହିବାକୁ ପଡିଥାଏ। କିନ୍ତୁ ଆୟୂର୍ବେଦ ବିଜ୍ଞାନର ମାନ୍ୟତା ଅନୁସାରେ, ଯେଉଁ ମହିଳା ନାକର ଗୋଟିଏ ପୁଡ଼ାରେ ଛେଦ କରି ନୋଜ୍ ରିଂ ବା ନାକଫୁଲ ପିନ୍ଧିଥାନ୍ତି, ସେମାନଙ୍କୁ ଅନ୍ୟ ମହିଳାଙ୍କ ତୁଳନାରେ ଋତୁସ୍ରାବ ସମୟରେ କମ୍ କଷ୍ଟ ହୋଇଥାଏ। ସେହିପରି ଆୟୁର୍ବେଦ ବିଜ୍ଞାନ କହେ, ମହିଳାଙ୍କର ନାକରେ ହୋଇଥିବା ଛେଦ ସେମାନଙ୍କର ପ୍ରଜନନ ଅଙ୍ଗ ସହିତ ଜୋଡ଼ି ହୋଇ ରହିଥାଏ। ଯଦ୍ଦ୍ବାରା ନାକଫୁଲ ପିନ୍ଧୁଥିବା ମହିଳାମାନଙ୍କୁ ପ୍ରସବ ସମୟରେ ବି କମ୍ କଷ୍ଟ ସହିବାକୁ ପଡିଥାଏ। ତେବେ ଏହା ପଛରେ କେତେ ସତ୍ୟତା ରହିଛି ତାହା ତ ଜଣାନାହିଁ। ଏହା କେବଳ ଲୋକଙ୍କ ବିଶ୍ୱାସ ଓ ଅବିଶ୍ୱାସ ଉପରେ ହିଁ ନିର୍ଭର କରେ।
ସୌନ୍ଦର୍ଯ୍ୟ ବୃଦ୍ଧି କରେ
କୁହାଯାଏ, ନୋଜ୍ ରିଂ ପିନ୍ଧିବା ଦ୍ୱାରା ମହିଳାଙ୍କର ସୌନ୍ଦର୍ଯ୍ୟ ଦ୍ୱିଗୁଣିତ ହୋଇଥାଏ। ସେଥିପାଇଁ ମାର୍କେଟ୍ରେ ଏହାର ବିଭିନ୍ନ ଭେରାଇଟି ଦେଖିବାକୁ ମିଳେ। କିନ୍ତୁ ସବୁ ଭେରାଇଟି ସବୁ ମହିଳାଙ୍କୁ ମାନେ ନାହିଁ। ଯେମିତିକି: ଯେଉଁ ମହିଳାଙ୍କର ନାକ ଲମ୍ବା ଓ ଶାର୍ପ, ସେମାନଙ୍କୁ ରିଂ ଷ୍ଟାଇଲ୍ର ନୋଜ୍ ରିଂ ମାନୁଥିବାବେଳେ ଯେଉଁ ମହିଳାଙ୍କର ନାକ ଟିକେ ଚଉଡ଼ା, ସେମାନଙ୍କୁ ଷ୍ଟଡ୍ ଷ୍ଟାଇଲ୍ ନୋଜ୍ ରିଂ ଭଲ ଦେଖାଯାଇଥାଏ। ସେହିପରି ହାର୍ଟ ଶେପ୍ ଫେସ୍ ଥିବା ମହିଳାଙ୍କୁ ଟିକେ ହେଭି ଷ୍ଟାଇଲ୍ର ନୋଜ୍ ରିଂ, ଡାଇମଣ୍ଡ ଶେପ୍ ଫେସ୍କୁ ଫ୍ଲୋରାଲ୍ ଡିଜାଇନ୍ ନୋଜ୍ ରିଂ, ରାଉଣ୍ଡ ଶେପ୍ ଫେସ୍କୁ ବିଡେଡ୍ ନୋଜ୍ ରିଂ ଏବଂ ଟିକେ ଚଉଡ଼ା ଫେସ୍ ଥିବା ମହିଳାଙ୍କୁ ହାଫ୍ ମୁନ୍ ଷ୍ଟାଇଲ୍ ନୋଜ୍ ରିଂ ଆଟ୍ରାକ୍ଟିଭ୍ ଲୁକ୍ ଦେଇଥାଏ। ଆଉ ଯଦି ପରଫେକ୍ଟ ବ୍ରାଇଡାଲ୍ ଲୁକ୍ ପାଇଁ ନୋଜ୍ ରିଂ ଚୟନର କଥା ଉଠେ, ତା’ହେଲେ ତ ଏହାର ଅନେକ ଅପ୍ସନ ଆପଣଙ୍କ ହାତରେ ରହିଛି। କେବଳ ନିଜ ଲୁକ୍କୁ ମାନିଲା ଭଳି ନୋଜ୍ ରିଂ ଚୟନ କରିବା ଆବଶ୍ୟକ।