ବ୍ରହ୍ମପୁର,୨୫ା୮(ସ୍ମୃତି ରଞ୍ଜନ ମହାଲିକ): ବ୍ରହ୍ମପୁର ମହାନଗର ନିଗମ (ବିଇଏମସି) ପକ୍ଷରୁ ବିଦ୍ୟୁତ ବିଲ ଦେୟ ହ୍ରାସ ଲକ୍ଷ୍ୟ ନେଇ ସହରର ପ୍ରତି ଅଞ୍ଚଳରେ ଏଲ୍ଇଡି ଷ୍ଟ୍ରିଟ ଲାଇଟ ଦ୍ୱାରା ଆଲୋକୀକରଣ ବ୍ୟବସ୍ଥା କରାଯାଇଛି। ୨୦୧୮ରେ ନିଗମ ପକ୍ଷରୁ ଏହି ବ୍ୟବସ୍ଥା ଆରମ୍ଭ ହୋଇଥିଲା। ସହରରେ ବର୍ତ୍ତମାନ ପ୍ରାୟ ୧୯ ହଜାର ଏଲ୍ଇଡି ଷ୍ଟ୍ରିଟଲାଇଟ ରହିଥିବା ବେଳେ ୩୦ଟି ହାଇମାଷ୍ଟ ଓ ୪୦ଟି ମିନି ମାଷ୍ଟ ରହିଛି। ଷ୍ଟ୍ରିଟ ଲାଇଟ ଓ ହାଇମାଷ୍ଟର ରକ୍ଷଣାବେକ୍ଷଣ ଦାୟିତ୍ୱ ଏନଇଇଏସଏଲ ନାମକ ଏକ ଘରୋଇ ସଂସ୍ଥାକୁ ଦିଆଯାଇଛି। ୭ ବର୍ଷ ପାଇଁ ଏହି ସଂସ୍ଥା ଦାୟିତ୍ୱ ନେବ ଚୁକ୍ତିନାମା ହୋଇଥିଲା। ହେଲେ ସହରରେ ଅଧିକାଂଶ ଷ୍ଟ୍ରିଟଲାଇଟ ଠିକ ସମୟରେ ଜଳୁ ନ ଥିବା ଦେଖାଯାଉଛି। ଅନ୍ୟପକ୍ଷରେ କେତେକ ସାହିରେ ଦିନରାତି ଷ୍ଟ୍ରିଟ ଲାଇଟ ଜଳି ରହୁଛି। ଯଦ୍ୱାରା ବିଇଏମସି ବିଦ୍ୟୁତ ଦେୟ ହ୍ରାସ ଲକ୍ଷ୍ୟ ନେଇ ଗ୍ରହଣ କରାଯାଇଥିବା ପଦକ୍ଷେପ ବିଫଳ ହୋଇଥିବା କୁହାଯାଉଛି।
ସହରରେ କୌଣସି ସାହିରେ ଷ୍ଟିଟ ଲାଇଟ ଖରାପ ହେଲେ ବିଇଏମ୍ସିକୁ ଅଭିଯୋଗ କରାଗଲେ ମଧ୍ୟ ମରାମତି କରାଯାଉ ନ ଥିବା ଅଭିଯୋଗ ହୋଇଛି। ୪୦ ନଂ ୱାର୍ଡର ଆନନ୍ଦ ନଗରଠାରେ ଥିବା ଏକ ଷ୍ଟ୍ରିଟ ଲାଇଟ ମାସେ ହେଲା ଅଚଳ ଥିବା ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି। ଏହାର ମରାମତି ପାଇଁ ବିଇଏମସିକୁ ଅଭିଯୋଗ କରାଯାଇଥିଲା। ହେଲେ ଏ ଯାଏ ସୁଫଳ ମିଳୁନି। ଫଳରେ ସନ୍ଧ୍ୟା ହେଲେ ଉକ୍ତ ଅଞ୍ଚଳର ରାସ୍ତା ଅନ୍ଧାର ରହୁଛି। ଉକ୍ତ ଅଞ୍ଚଳର ଷ୍ଟ୍ରିଟ ଲାଇଟ ତୁରନ୍ତ ମରାମତି କରିବା ପାଇଁ ସ୍ଥାନୀୟ ବାସିନ୍ଦା ଦାବି କରିଛନ୍ତି। ଏ ନେଇ ବିଇଏମସି ସହକାରୀ ଯନ୍ତ୍ରୀ ରଞ୍ଜନ କୁମାର ମିଶ୍ରଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ବର୍ଷା ଋତରେ ଷ୍ଟ୍ରିଟ ଲାଇଟ ଗୁଡିକର ତାରରେ କାର୍ବନ ହୋଇଯାଉଛି। ତେଣୁ ଷ୍ଟ୍ରିଟ ଲାଇଟ ଗୁଡିକ ଜଳୁନି। ସେଗୁଡିକର ମରାମତି ପାଇଁ ପଦକ୍ଷେପ ଗ୍ରହଣ କରାଯାଉଥିବା ସହାକାରୀ ଯନ୍ତ୍ରୀ କହିଛନ୍ତି।