ଭୁବନେଶ୍ୱର,୨୬ା୬(ଅନିଲ ଦାସ): ରାଜ୍ୟରେ ଅନେକ ବସ୍, ଟ୍ରକ୍ ସମେତ ବିଭିନ୍ନ କିସମର ଗାଡ଼ି ବିନା ଫିଟନେସ୍, ପରମିଟ ଓ ବୀମାରେ ଗଡ଼ୁଛି। ଯାତ୍ରୀଙ୍କୁ ନେଉଥିବା ଘରୋଇ ବସ୍ଗୁଡିକରେ ମଧ୍ୟ ଅନୁରୂପ ଅବସ୍ଥା, ଯାହାକି ଯାତ୍ରୀଙ୍କ ପାଇଁ ପ୍ରାଣଘାତକ ହେଉଛି। ରାଜ୍ୟରେ ଏଭଳି ବେଆଇନ ଯାତ୍ରୀ ପରିବହନ ଜାରି ରହିଥିଲେ ମଧ୍ୟ ପରିବହନ ବିଭାଗ ପକ୍ଷରୁ ଯାଞ୍ଚ ଠିକ୍ ଭାବେ ହେଉନାହିଁ। ମିଳିଥିବା ସୂଚନା ଅନୁଯାୟୀ ରାଜ୍ୟରେ ୫୦୦ରୁ ଊର୍ଦ୍ଧ୍ୱ ସରକାରୀ ଏବଂ ପ୍ରାୟ ୧୪ ହଜାର ଘରୋଇ ବସ୍ ବିଭିନ୍ନ ରୁଟ୍ରେ ଚଳାଚଳ କରୁଛି। ଏଥିସହିତ ୧୫ ବର୍ଷରୁ ଊର୍ଦ୍ଧ୍ୱ ପ୍ରାୟ ୮ ହଜାର ବସ୍ ଚଳାଚଳ କରୁଛି। ୧୫ ବର୍ଷ ପରେ ଗାଡ଼ିଗୁଡିକ ଦୁର୍ବଳ ହେବା ସହ ପ୍ରଦୂଷଣ ମାତ୍ରାକୁ ବଢ଼ାଇଥାଏ। ମାତ୍ର ସେହି ବସ୍ଗୁଡ଼ିକର ଫିଟ୍ନେସକୁ ଭଲଭାବେ ଯାଞ୍ଚ କରା ନ ଯାଇ ବର୍ଷକ ପାଇଁ ପରମିଟ୍ ଦିଆଯାଉଛି। ଯେଉଁ ଛୋଟ ଓ ବଡ଼ ବସ୍ଗୁଡିକ ପାଇଁ ବର୍ଷିକିଆ ଫିଟ୍ନେସ ସାର୍ଟିଫିକେଟ୍ ଦିଆଯାଉଛି ତାହା ନିୟମିତ ଯାଞ୍ଚ ହେଉନି। ଫଳରେ ବହୁ ପୁରୁଣା ବସ୍ ବିନା ଫିଟ୍ନେସ ଓ ପରିମିଟ୍ରେ ଅବାଧରେ ଚଳାଚଳ କରୁଛି।
ମୋଟର ଯାନ ଆଇନ-୧୯୮୮ ଅନୁଯାୟୀ ବସ୍ ଚଳାଚଳ କରିବା ପୂର୍ବରୁ ପ୍ରତ୍ୟେକ ବର୍ଷ ଫିଟ୍ନେସକୁ ଭଲ ଭାବେ ଯାଞ୍ଚ କରି ପରମିଟ୍ ଦିଆଯିବ। ସ୍ଥାନୀୟ ଆଞ୍ଚଳିକ ପରିବହନ ଅଧିକାରୀ(ଆରଟିଓ) ଜିଲା ଭିତରେ ଯାତାୟାତ କରିବାକୁ ଥିବା ବସ୍ଗୁଡ଼ିକୁ ପରମିଟ୍ ଦେଉଥିବାବେଳେ ରାଜ୍ୟ ପରିବହନ କର୍ତ୍ତୃପକ୍ଷ (ଏସ୍ଟିଏ) ଗୋଟିଏ ଜିଲାରୁ ଅନ୍ୟ ଜିଲାକୁ ଯାତାୟାତ କରିବାକୁ ଅନୁମତି ଦେଇଥାଆନ୍ତି। ନୂଆ ବସ୍ ପାଇଁ ୫ ବର୍ଷ ସକାଶେ ପରମିଟ୍ ଦିଆଯଉଥିବାବେଳେ ୧୫ ବର୍ଷ ପର୍ଯ୍ୟନ୍ତ ତାହା ନବୀକରଣ କରାଯାଇଥାଏ। ୧୫ ବର୍ଷ ପରେ ଏସ୍ଟିଏ ଏବଂ ଆର୍ଟିଓ ବର୍ଷିକିଆ ପରମିଟ୍ ଦେଉଛନ୍ତି। ୧୫ ବର୍ଷର ଊର୍ଦ୍ଧ୍ୱ ଗାଡ଼ିକୁ ପ୍ରତ୍ୟେକ ବର୍ଷ ଆରଟିଓ ପକ୍ଷରୁ କଡ଼ାକଡ଼ି ଭାବେ ଯାଞ୍ଚ ହେବା କଥା। ମାତ୍ର ତାହା ନିୟମିତ ଭାବେ କରାଯାଉ ନ ଥିବାରୁ ପୁରୁଣା ବସ୍ଗୁଡିକ ଯାତ୍ରୀଙ୍କ ପାଇଁ ବିପଦର କାରଣ ହେଉଛି।
ସୋମବାର ଦିଗପହଣ୍ଡିରେ ଦୁର୍ଘଟଣାଗ୍ରସ୍ତ ହୋଇଥିବା ବସ୍ ୨୫ ବର୍ଷର ପୁରୁଣା ବୋଲି ଜଣାପଡିଛି। ସେହି ବସ୍ର ପରମିଟ କିମ୍ବା ଇନ୍ସ୍ୟୁରାନ୍ସ ନ ଥିବା କୁହାଯାଉଛି। ବାହାଘର ପାଇଁ ଯାତ୍ରୀ ପରିବହନ ସକାଶେ କଣ୍ଟ୍ରାକ୍ଟ ପରମିଟ୍ ମଧ୍ୟ ନ ଥିଲା। ଏହି ପରମିଟ୍ ନ ଥିବାରୁ ମୃତାହତ ଯାତ୍ରୀମାନଙ୍କ ପରିବାର ସମ୍ପୃକ୍ତ ବସ୍ଠାରୁ ବୀମା ରାଶି ପାଇପାରିବେ ନାହିଁ। ବାହାଘର କିମ୍ବା ଅନ୍ୟ କୌଣସି କାରଣରୁ ରାତ୍ରିରେ ଯାତ୍ରୀ ପରିବହନ ସକାଶେ ସ୍ଥାନୀୟ ଆର୍ଟିଓଙ୍କଠାରୁ କଣ୍ଟ୍ରାକ୍ଟ ପରମିଟ୍ ନେବାକୁ ଆଇନରେ ବ୍ୟବସ୍ଥା ରହିଛି। ତେବେ ବଡ଼ ବସ୍କୁ ଛାଡ଼ିଦେଲେ ପ୍ରାୟ ଅନେକ ବସ୍ ଅନୁମତି ନେଉନାହାନ୍ତି। ସେସବୁକୁ ମଧ୍ୟ କଡ଼ାକଡ଼ି ଯାଞ୍ଚ କରାଯାଉନାହିଁ। ବ୍ରହ୍ମପୁରରୁ ଭୁବନେଶ୍ୱର ଯାତାୟାତ କରୁଥିବା ଯାତ୍ରୀ ବିଶ୍ୱ ରଞ୍ଜନ ସାହୁ କହିଛନ୍ତି, ଅନେକ ଗାଡ଼ି ନିୟମ ପାଳନ କରୁ ନ ଥିବାରୁ ଅଧିକାଂଶ ସମୟରେ ଦୁର୍ଘଟଣା ଘଟୁଛି। ପରିବହନ ବିଭାଗ ଅଧିକାରୀମାନେ ଗାଡ଼ିଗୁଡ଼ିକୁ ଭଲଭାବେ ଯାଞ୍ଚ କରିବା ଆବଶ୍ୟକ। ନଚେତ ଏଭଳି ଦୁର୍ଘଟଣା ବଢ଼ିଚାଲିବ।
ରାଜ୍ୟ ପରିବହନ ବିଭାଗର ଜଣେ ବରିଷ୍ଠ ଅଧିକାରୀ ନିଜ ନାମ ଗୋପନ ରଖିବା ସର୍ତ୍ତରେ କହିଛନ୍ତି, ରାଜ୍ୟରେ ଅନେକ ପୁରୁଣା ଗାଡ଼ି ଚାଲୁଛି। ସେଥିରୁ କେତେକ ଆର୍ଟିଓ କିମ୍ବା ଏସ୍ଟିଏଙ୍କ ପାଖରୁ କୌଣସି ପରମିଟ୍ କିମ୍ବା ଫିଟନେସ୍ ସାର୍ଟିଫିକେଟ ନେଉନାହାନ୍ତି। ଆଞ୍ଚଳିକ ପରିବହନ ଅଧିକାରୀ ମଧ୍ୟ ସେହି ଗାଡ଼ିଗୁଡ଼ିକୁ ଠିକ୍ ଭାବେ ଯାଞ୍ଚ କରୁନାହାନ୍ତି। ପରବର୍ତ୍ତୀ ସମୟରେ ଯାତ୍ରୀମାନଙ୍କ ଜୀବନ ବିପନ୍ନ ହେଉଛି।