ମୁମ୍ବାଇ, ୧୬ା୪- ଓ୍ବାଙ୍ଖଡେ ଷ୍ଟାଡିୟମରେ ଗୁରୁବାର ଖେଳାଯାଇଥିବା ମ୍ୟାଚ୍ରେ ରାଜସ୍ଥାନ ରୟାଲ୍ସ ୩ ଉଇକେଟରେ ଦିଲ୍ଲୀ କ୍ୟାପିଟାଲ୍ସକୁ ହରାଇ ଦେଇଛି। ମ୍ୟାଚ୍ରେ ଦିଲ୍ଲୀ ୧୪୮ ରନ୍ର ଛୋଟିଆ ଟାର୍ଗେଟ ଛିଡ଼ା କରିଥିଲେ ମଧ୍ୟ ଦଳୀୟ ବୋଲରଙ୍କ ଯୋଗୁ ରାଜସ୍ଥାନ ପାଇଁ ବିଜୟ ଲକ୍ଷ୍ୟ ହାସଲ କରିବା କଷ୍ଟକର ହୋଇପଡ଼ିଥିଲା। ତେବେ ଏହି ପରାଜୟ ପରେ ଦଳୀୟ କୋଚ୍ ରିକି ପଣ୍ଟିଂ କହିଛନ୍ତି, ଅଭିଜ୍ଞ ସ୍ପିନର ରବିଚନ୍ଦ୍ରନ ଅଶ୍ୱିନଙ୍କ କୋଟା ଶେଷ ନ କରିବା ବୋଧହୁଏ ଭୁଲ ଥିଲା।
ଅଶ୍ୱିନ ପାଓ୍ବରପ୍ଲେ ପରେ ୩ ଓଭର ବୋଲିଂ କରି ୧୪ ରନ୍ ଦେଇଥିଲେ। ତା’ଠାରୁ ଗୁରୁତ୍ୱପୂର୍ଣ୍ଣ କଥା ହେଲା ତାଙ୍କ ଓଭରରେ କୌଣସି ଚୌକା କିମ୍ବା ଛକା ହୋଇ ନ ଥିଲା। ରାଜସ୍ଥାନ ମଧ୍ୟକ୍ରମରେ ଦୁଇ ବାମହାତୀ ବ୍ୟାଟ୍ସମ୍ୟାନ (ଡେଭିଡ୍ ମିଲର ଓ ରାହୁଲ ତଓ୍ବେତିଆ ) ଖେଳୁଥିଲେ। ଏଭଳି ପରିସ୍ଥିତିରେ ନୂଆ ଅଧିନାୟକ ଅଶ୍ୱିନଙ୍କ ବଦଳରେ ବୋଲିଂ ଦେଇଥିଲେ ମାର୍କସ ଷ୍ଟୋଇନିସଙ୍କୁ। ସେ ଏହି ଓଭରରେ ଖର୍ଚ୍ଚ କରିଥିଲେ ୧୫ ରନ୍। ଏହିଠାରୁ ବଦଳି ଯାଇଥିଲା ମ୍ୟାଚ୍ର ଦିଗ।
ପୂର୍ବ ମ୍ୟାଚ୍ରେ ଅଶ୍ୱିନଙ୍କ ପ୍ରଦର୍ଶନ ଭଲ ନ ଥିଲା। ତା’ ପରେ ବଲକୁ ଠିକ୍ ସ୍ଥାନରେ ପକାଇବା ପାଇଁ ସେ ଖୁବ୍ ଅଭ୍ୟାସ କରିଥିଲେ। ଯାହାର ଫଳ ରାଜସ୍ଥାନ ବିପକ୍ଷ ମ୍ୟାଚ୍ରେ ଦେଖିବାକୁ ମିଳିଥିଲା। ୩ ଓଭରରେ କୌଣସି ଉଇକେଟ ନେଇ ନ ଥିଲେ। ମାତ୍ର ଖୁବ କମ୍ ହାରରେ ଦେଇଥିଲେ ରନ୍। ସମ୍ଭବତଃ ଭୁଲ ଆମ ଆଡ଼ୁ ହୋଇଛି। ଆମେ ଏ ସମ୍ପର୍କରେ ପରେ କଥା ହେବୁ। ଆଉ କ୍ରିସ ମୋରିସଙ୍କୁ ଆମେ କିଛି ସହଜ ବଲ ଦେଇଥିଲୁ। ତାଙ୍କୁ ରୋକିବା ପାଇଁ ଯେଉଁଠାରେ ବୋଲିଂ କରାଯିବା ଦରକାର ଥିଲା, ତାହା ବୋଲରମାନେ କରି ନ ଥିଲେ ବୋଲି ପଣ୍ଟିଂ କହିଛନ୍ତି।