ଦଶରଥପୁର,୨୦।୯(ମନୋଜ ପୃଷ୍ଟି): ପ୍ରେମ ବିବାହର ୬ ମାସ ହୋଇନାହିଁ, ହେଲେ ଯୁବତୀଙ୍କ ମୃତ୍ୟୁ ଘଟିବା ଘଟଣା ଯାଜପୁର ଜିଲା ମଙ୍ଗଳପୁର ଥାନା ଅଞ୍ଚଳର ଆଲୋଡ଼ନ ସୃଷ୍ଟି କରିଛି। ଏହା ଏକ ହତ୍ୟା ଘଟଣା ବୋଲି ସ୍ଥାନୀୟ ଲୋକମାନଙ୍କ ମଧ୍ୟରେ ଆଲୋଚନା ଚାଲିଛି। ହେଲେ ମୃତକଙ୍କ ଶ୍ୱଶୁର ଘର ପକ୍ଷରୁ ବୋହୂ ଆମତ୍ହତ୍ୟା କରିଥିବା କୁହାଯାଉଛି। ମଙ୍ଗଳପୁର ଥାନା ପୋଲିସ ମୃତଦେହ ଜବତ କରି ତଦନ୍ତ ଜାରି ରଖିଛି। ସାଇଣ୍ଟିଫିକ୍ ଟିମ୍ ତଦନ୍ତ କରିଛି। ପୋଲିସ ମୃତ ରଶ୍ମିତାଙ୍କ ସ୍ବାମୀ ମୃତ୍ୟୁଞ୍ଜୟ ପତିଙ୍କୁ ଥାନାକୁ ଆଣି ପଚରାଉଚରା ଜାରି ରଖିଛି। ମୃତ୍ୟୁଞ୍ଜୟଙ୍କୁ ଭଲପାଇ ଘରଛାଡି ପଳାଇ ଆସିଥିବା ରଶ୍ମିତାଙ୍କ ବାପା ମଧ୍ୟ ଝିଅର ଏପରି ସନ୍ଦେହଜନକ ମୃତ୍ୟୁରେ ମଙ୍ଗଳପୁର ଥାନାରେ କେବଳ ଝିଅ ମରିଥିବା ସମ୍ପର୍କରେ ଏତାଲା କରିଛନ୍ତି। ରଶ୍ମିତାଙ୍କ ମୁହଁରେ ମାଡ ଦାଗ ସ୍ପଷ୍ଟ ପରିଲକ୍ଷିତ ହୋଇଛି ା ହେଲେ ରଶ୍ମିତାଙ୍କ ବାପା ଝିଅର ମୃତ୍ୟୁ ପାଇଁ କାହାକୁ ଦାୟୀ କରି ନ ଥିବା ଥାନା ଆଇଆଇସି ପ୍ରକାଶ କରିଛନ୍ତି।
ସୂଚନାଯୋଗ୍ୟ, ମଙ୍ଗଳପୁର ଥାନା ଅଧୀନ ମଲିକାପୁର ପଞ୍ଚାୟତ ଦାଣ୍ଡିସାହି ଗ୍ରାମର ନାରାୟଣ ଚନ୍ଦ୍ର ପତିଙ୍କ ପୁଅ ମୃତ୍ୟୁଞ୍ଜୟ (ବବୁଲ୍) ସେହି ଗ୍ରାମର ଗୌତମ ପଣ୍ଡାଙ୍କ ଝିଅ ରଶ୍ମିତାଙ୍କୁ ଭଲପାଇ ମାତ୍ର ୬ ମାସ ତଳେ ବିବାହ କରିଥିଲେ। ମଙ୍ଗଳବାର ସକାଳେ ରଶ୍ମିତା ଘରେ ରଶି ଲଗାଇ ଆମତ୍ହତ୍ୟା କରିଛନ୍ତି ବୋଲି ଶ୍ୱଶୁର ଘର ପକ୍ଷରୁ ଥାନାକୁ ସୂଚନା ଦିଆଯାଇଥିଲା। ଏନେଇ ଥାନା ପକ୍ଷରୁ ଏକ ଅପମୃତ୍ୟୁ ମାମଲା(ନଂ.୨୧/୨୦୨୩) ରୁଜୁ ଯାଇଛି। ବ୍ୟବଛେଦ ରିପୋର୍ଟ ଆସିବା ପରେ ସବୁ ସ୍ପଷ୍ଟ ହେବ ବୋଲି ପୋଲିସ କହିଛି।