ସିନାପାଲି,୨୬।୯(ଡି.ଏନ.ଏ.): ନୂଆପଡା ଜିଲା ସିନାପାଲି ବ୍ଲକର ବିଭିନ୍ନ ପଞ୍ଚାୟତରେ କିଛି ମାସ ହେବ ବ୍ୟାଙ୍କ ଜମାଖାତା ଜରିଆରେ ବୃଦ୍ଧାବୃଦ୍ଧ ଓ ଭିନ୍ନକ୍ଷମମାନଙ୍କୁ ଭତ୍ତା ପ୍ରଦାନ କରାଯାଉଛି। ଫଳରେ ଏହି ଅଞ୍ଚଳର ୮୦ ବର୍ଷରୁ ଊର୍ଦ୍ଧ୍ୱ ବୃଦ୍ଧାବୃଦ୍ଧ ଓ ଭିନ୍ନକ୍ଷମମାନେ ଭତ୍ତା ପାଇବାକୁ ଅନେକ ଅସୁବିଧାର ସମ୍ମୁଖିନ ହେଉଛନ୍ତି। ଏଭଳିସ୍ଥିତିରେ ଝାରବନ୍ଦ ଗ୍ରାମପଞ୍ଚାୟତ ତିଲେଇମାଲ ଗ୍ରାମର ମାଲତି ଚଣ୍ତି, ଦିପତେଜି, ପଦ ହଂସ, ରୁକମଣି ଚିନ୍ଦା, ବିଜମନ ଚିନ୍ଦା, ତିଲେ ଚିନ୍ଦା, ପୁସ୍ତମ ଚିନ୍ଦା, ହିରାନି ତେଜି, ଭଜନ୍ତି ନାଗ ୨ ମାସ ହେଲା ଭତ୍ତା ପାଇ ନ ଥିବା ଅଭିଯୋଗ କରିଛନ୍ତି। ସୂଚନାଯୋଗ୍ୟ ଯେ, ସିନାପାଲି ବ୍ଲକର ୨୭ଟି ପଞ୍ଚାୟତ ଅନେକ ଗ୍ରାମ ଅଛି ଯେଉଁ ଗ୍ରାମରେ ବ୍ୟାଙ୍କ ସୁବିଧା ନ ଥିବା ବେଳେ ଯାତାୟାତ ତଥା ଲୋକଙ୍କ ବିଭିନ୍ନ ଅସୁବିଧା ରହିଛି। ଅନେକ ପଞ୍ଚାୟତରେ ଗ୍ରାହକ ସେବା ଥିଲେ ମଧ୍ୟ ଲୋକ ସବୁ ସମୟରେ ସେବା ପାଇପାରୁ ନାହାନ୍ତି। ଏଭଳି ସ୍ଥିତିରେ ବାର୍ଦ୍ଧକ୍ୟ ଓ ଭିନ୍ନକ୍ଷମ ଭତ୍ତା ବ୍ୟାଙ୍କ ଯୋଗେ ପ୍ରଦାନ କରାଯାଉଥିବା ଯୋଗୁ ଅନେକାଂଶରେ ଶଯ୍ୟାଶାୟୀ ତଥା ୮୦ ବର୍ଷ ପର ବୃଦ୍ଧାବୃଦ୍ଧ ଓ ଭିନ୍ନକ୍ଷମମାନେ ଭତ୍ତା ପାଇବାରେ ହନ୍ତସନ୍ତ ହେଉଥିବା ଅଭିଯୋଗ ହେଉଛି। ବ୍ୟାଙ୍କଜନିତ ତ୍ରୁଟି ହେଉ କିମ୍ବା ବିଭାଗୀୟ ତ୍ରୁଟି ହେଉ ଅନେକ ହିତାଧିକାରୀ ଭତ୍ତା ପାଇବାରୁ ବଞ୍ଚିତ ହେଉଥିବା ଅଭିଯୋଗ ହେଉଛି। ଏ ନେଇ ବ୍ଲକ ତଥା ଜିଲା ପ୍ରଶାସନ ଦୁଷ୍ଟି ଦେଇ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି।