କୋଲକାତା,୨୧।୨: ଦକ୍ଷିଣ ଆଫ୍ରିକା ସିରିଜ୍ ପରେ ବ୍ୟକ୍ତିଗତ ଭାବେ ଭାରତୀୟ ଦଳର ମୁଖ୍ୟ କୋଚ୍ ରାହୁଲ ଡ୍ରାଭିଡ୍ ମୋତେ ସନ୍ନ୍ୟାସ ସମ୍ପର୍କରେ ଚିନ୍ତା କରିବାକୁ ପରାମର୍ଶ ଦେଇଥିଲେ। ଭେଟେରାନ ଉଇକେଟକିପର ରିଦ୍ଧିମାନ ଶାହାଙ୍କ ଏଭଳି ବୟାନ ପରେ କୋଚ୍ ଡ୍ରାଭିଡ୍ ସୋମବାର ନିଜ ପକ୍ଷ ରଖିଛନ୍ତି।
“ଶାହାଙ୍କ ମନ୍ତବ୍ୟ ମୋତେ ଆଘାତ ଦେଇ ନାହିଁ। ରିଦ୍ଧିମାନ, ତାଙ୍କ ସଫଳତା ଓ ଦଳ ପ୍ରତି ତାଙ୍କ ଯୋଗଦାନକୁ ମୁଁ ଯଥେଷ୍ଟ ସମ୍ମାନ ଦିଏ। ମୋ ମତରେ ସେ ସଚ୍ଚୋଟତା ଏବଂ ସ୍ବଚ୍ଛତାର ହକ୍ଦାର। ଦଳରେ ତାଙ୍କର ପୋଜିଶନ ସମ୍ପର୍କରେ ତାଙ୍କୁ ଜଣାଇବା ମୋ କର୍ତ୍ତବ୍ୟ। ମୁଁ ପ୍ରତ୍ୟେକ ମ୍ୟାଚ୍ ଲାଗି ଦଳୀୟ ଏକାଦଶ ଘୋଷଣା ହେବା ପୂର୍ବରୁ ଖେଳାଳିଙ୍କ ସହ କଥା ହୁଏ” ବୋଲି ପୂର୍ବତନ ଅଧିନାୟକ କହିଛନ୍ତି।
ଦଳୀୟ ଏକାଦଶ ଘୋଷଣା କରାଯିବା ପୂର୍ବରୁ ଖେଳାଳିଙ୍କ ସହ କଥା ହେବା ପଛର କାରଣ ସମ୍ପର୍କରେ ମୁଖ୍ୟ କୋଚ୍ କହିଛନ୍ତି, “କଥା ହେବା ଦ୍ୱାରା ଖେଳାଳିମାନେ କିଛି ପ୍ରଶ୍ନ ଉତ୍ତର ପାଇଥାନ୍ତି। ଯେମିତି କି ମୁଁ କାହିଁକି ଖେଳୁ ନାହିଁ। ସ୍ଥାନ ନ ପାଇବାରୁ ଖେଳାଳିମାନେ ଦୁଃଖିତ ହେବା ସ୍ବାଭାବିକ। ଶାହାଙ୍କୁ ଅବସର ନେବାକୁ ପରାମର୍ଶ ଦେବା ପଛରେ କାରଣ ହେଉଛି ରିଷଭ ପନ୍ତ ଉଇକେଟକିପର ଭାବେ ଦଳରେ ସ୍ଥାନ ନିଶ୍ଚିତ କରି ସାରିଛନ୍ତି। ଏଣୁ ଆମେ ଯୁବ ଉଇକେଟକିପର(ଶିକର ଭରତ)ଙ୍କୁ ସୁଯୋଗ ଦେବାକୁ ଚାହୁଁଛୁ। ଏଥିଯୋଗୁ ରିଦ୍ଦିମାନଙ୍କ ପ୍ରତି ଥିବା ମୋ ସମ୍ମାନ ବଦଳି ଯିବ ନାହିଁ”।