ନାଉଗଁା,୧୩ା୯(ସ୍ବ.ପ୍ର.):ସମସ୍ତଙ୍କ ପାଖରେ ଉନ୍ନତମାନର ସ୍ବାସ୍ଥ୍ୟ ସେବା ଯୋଗାଇବା ଉପରେ ସରକାର ଗୁରୁତ୍ୱାରୋପ କରୁଛନ୍ତି। ଏନେଇ ୫ ହଜାର ଜନସଂଖ୍ୟା ଥିବା ସ୍ଥାନରେ ଉପସ୍ବାସ୍ଥ୍ୟ କେନ୍ଦ୍ର ଖୋଲାଯାଇଛି। ମାତ୍ର କିଛି ସ୍ଥାନରେ ଏନେଇ ଆସୁଥିବା ସରକାରୀ ଟଙ୍କାର ଦୁରୁପଯୋଗ ହେଉଥିବା ଅଭିଯୋଗ ହୋଇଛି। ନାଉଗଁା ବ୍ଲକ ଜାମୁଗଁା ପଞ୍ଚାୟତ ଅନ୍ତର୍ଗତ କଂଟୁଣିଆହାଟରେ ଥିବା ଉପସ୍ବାସ୍ଥ୍ୟ କେନ୍ଦ୍ରରେ ଏହାର ଉଦାହରଣ ଦେଖିବାକୁ ମିଳିଛି। ଏହି ସ୍ବାସ୍ଥ୍ୟକେନ୍ଦ୍ରକୁ ବିପଦପୂର୍ଣ୍ଣ ବୋଲି ଦର୍ଶାଯାଇ ନୂତନ ନିର୍ମାଣ କରିବାକୁ ଗ୍ରାମ ଉନ୍ନୟନ ବିଭାଗ ପକ୍ଷରୁ ଟେଣ୍ଡର କାର୍ଯ୍ୟ ଶେଷ ହୋଇଛି। ମାତ୍ର ଏହି ବିପଦପୂର୍ଣ୍ଣ ସ୍ବାସ୍ଥ୍ୟକେନ୍ଦ୍ରକୁ ବାରମ୍ବାର ମରାମତି କରାଯାଉଥିବା ଅଭିଯୋଗ ହୋଇଛି। ସୂଚନା ଅଧିକାର ଆଇନବଳରେ ନାଉଗଁା ସ୍ବାସ୍ଥ୍ୟକେନ୍ଦ୍ର ପକ୍ଷରୁ ମିଳିଥିବା ଚିଠି (ନଂ. ୧୦୪୭/୨୯-୭-୨୨) ଅନୁସାରେ ଜାମୁଗଁା ଉପସ୍ବାସ୍ଥ୍ୟ କେନ୍ଦ୍ରଟି ବିପଦସଙ୍କୁଳ ହୋଇଯାଇଛି। କେନ୍ଦ୍ରଟି ଦୀର୍ଘ ୫ ବର୍ଷରୁ ଊର୍ଦ୍ଧ୍ୱ ହେବ ବିପଦସଙ୍କୁଳ ଅବସ୍ଥାରେ ଥିବାରୁ ବିଭାଗ ପକ୍ଷରୁ ସ୍ବାସ୍ଥ୍ୟକେନ୍ଦ୍ର ଚଲାଇବା ପାଇଁ ଏକ ଭଡା ଗୃହ ନିଆଯାଇଛି। ମାତ୍ର କାହା ଇଙ୍ଗିତରେ ଉକ୍ତ ବିପଦପୂର୍ଣ୍ଣ ଗୃହକୁ ବାରମ୍ବାର ମରାମତି କରାଯାଉଛି,ସେନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
ଉପସ୍ବାସ୍ଥ୍ୟ କେନ୍ଦ୍ରର ଏହି ବିପଦପୂର୍ଣ୍ଣ ଗୃହ ପାଇଁ ୨୦୧୮-୧୯ ଆର୍ଥିକ ବର୍ଷରେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ୧ ଲକ୍ଷ ୫୦ ହଜାର ଟଙ୍କା ବ୍ୟୟ କରାଯାଇ ମରାମତି କରାଯାଇଛି। ୨୦୨୦-୨୧ ଆର୍ଥିକ ବର୍ଷରେ ପଞ୍ଚାୟତ ତରଫରୁ ୨ ଲକ୍ଷ ଟଙ୍କା ବ୍ୟୟ କରାଯାଇ ମରାମତି କରାଯାଇଛି। ମରାମତି ଆଳରେ କେନ୍ଦ୍ର ପାଇଁ ଲକ୍ଷାଧିକ ଟଙ୍କା ଖର୍ଚ୍ଚ ହେଉଥିବା ବେଳେ ତାହା ତାଲା ପଡି ରହିଛି। ଅପରପକ୍ଷେ ଭଡା ଗୃହରେ ଉପସ୍ବାସ୍ଥ୍ୟକେନ୍ଦ୍ର ଚଲାଇବା ନିମନ୍ତେ ଅର୍ଥ ବ୍ୟୟ ହେଉଥିବା ଜଣାଯାଇଛି। ଗୃହ ମରାମତି ସମ୍ପର୍କରେ ଜାମୁଗଁା ପଞ୍ଚାୟତର ତତ୍କାଳୀନ କନିଷ୍ଠଯନ୍ତ୍ରୀ ସ୍ମୃତି ରଞ୍ଜନ ସ୍ବାଇଁ କୁହନ୍ତି, ପଞ୍ଚାୟତର ରିଜୋଲ୍ୟୁଶନକୁ ଭିତ୍ତି କରି ଉପକେନ୍ଦ୍ରର ମରାମତି କାର୍ଯ୍ୟ କରାଯାଇଛି। ତେବେ କେନ୍ଦ୍ରଟି ଡ୍ୟାମେଜ ଅବସ୍ଥାରେ ଥିବା ବିଷୟରେ କିଛି ଜାଣିନାହାନ୍ତି ବୋଲି ସେ କହିଛନ୍ତି।