ସୋନପୁର,୨୯।୫(ନି.ପ୍ର.): ସୁବର୍ଣ୍ଣପୁର ଜିଲାର ସର୍ବପୁରାତନ ଉଚ୍ଚ ଶିକ୍ଷାନୁଷ୍ଠାନ ସୋନପୁର କଲେଜ। ୧୯୬୪ ମସିହାରେ ମହାନଦୀ କୂଳରେ ସ୍ଥାପିତ ହୋଇଥିଲା ଏହି କଲେଜ । କଲେଜ ପ୍ରତିଷ୍ଠା ହେବାର ଇତିମଧ୍ୟରେ ୫୯ ବର୍ଷ ବିତିଯାଇଛି। ହେଲେ ପଶ୍ଚିମ ଓଡିଶାର ଏହି ପୁରାତନ କଲେଜକୁ ପୂର୍ଣ୍ଣ ସରକାରୀ ମାନ୍ୟତା ମିଳିନାହିଁ ା ଏପଟେ ସ୍ବୟଂଶାସିତ କଲେଜ ମାନ୍ୟତା ପାଇଁ ଜିଲାବାସୀଙ୍କ ପକ୍ଷରୁ ବାରମ୍ବାର ଦାବି ହେଉଥିଲେ ମଧ୍ୟ ରାଜ୍ୟ ସରକାର ଅଣଦେଖା କରି ଆସୁଛନ୍ତି। ଶିକ୍ଷାଦାନ କ୍ଷେତ୍ରରେ ସମଗ୍ର ପଶ୍ଚିମ ଓଡିଶରେ ଏହି ପୁରାତନ କଲେଜର ସ୍ବତନ୍ତ୍ର ନାଁ ରହିଛି। କଲେଜର ଆବଶ୍ୟକ ଜମି ଓ ଭିତ୍ତିଭୂମି ରହିଛି। କଲେଜରେ ଯୁକ୍ତ ଦୁଇ ଓ ଯୁକ୍ତ ତିନି କଳା, ବିଜ୍ଞାନ ଏବଂ ବାଣିଜ୍ୟ ବିଭାଗ ରହିଛି। ୨ ହଜାରରୁ ଊର୍ଦ୍ଧ୍ୱ ଛାତ୍ରୀଛାତ୍ର ଏଠାରେ ଅଧ୍ୟୟନ କରୁଛନ୍ତି। ତେବେ ପୂର୍ଣ୍ଣ ସରକାରୀ ତଥା ସ୍ବୟଂଶାସିତ ମାନ୍ୟତା ପାଇ ନ ଥିବାରୁ କଲେଜର ଆବଶ୍ୟକ ଅଧ୍ୟାପିକା ଅଧ୍ୟାପକ ଓ କର୍ମଚାରୀ ପଦ ପୂରଣ ହୋଇପାରୁନି। ସବୁ ଦୃଷ୍ଟିରୁ ସୋନପୁର କଲେଜ ପୂର୍ଣ୍ଣ ସରକାରୀ ତଥା ସ୍ବୟଂଶାସିତ ମାନ୍ୟତା ପାଇବାକୁ ଯୋଗ୍ୟ। ଇତିମଧ୍ୟରେ ବିଶ୍ୱବ୍ୟାଙ୍କ ସହାୟତାରେ ୪ କୋଟି ଟଙ୍କା ବ୍ୟୟରେ ନୂତନ ଏକାଡେମିକ ବ୍ଲକ ନିର୍ମାଣ ହୋଇଛି। ଏହି କୋଠା କଲେଜକୁ ହସ୍ତାନ୍ତର ହୋଇଥିବା ବେଳେ ଆନୁସଙ୍ଗିକ ବ୍ୟବସ୍ଥାର ଉନ୍ନତି ପାଇଁ କଲେଜକୁ ପୁଣି ୧ କୋଟି ଟଙ୍କା ମିଳିଛି। ଅନ୍ୟପକ୍ଷେ ଜିଲାର ଏହି ପୁରାତନ କଲେଜରେ ଏ ପର୍ଯ୍ୟନ୍ତ କୌଣସି ବିଷୟରେ ସ୍ନାତକୋତ୍ତର ପାଠ୍ୟକ୍ରମ ଖୋଲିପାରିନି। କଲେଜକୁ ସରକାର ଅଣଦେଖା କରି ଆସୁଥିବା ବୁଦ୍ଧିଜୀବୀ ଅଭିଯୋଗ କରିଛନ୍ତି । ତେଣୁ ସରକାର ଜିଲାର ସ୍ବାର୍ଥ ଦୃଷ୍ଟିରୁ ସୋନପୁର କଲେଜକୁ ଯଥାଶିଘ୍ର ପୂର୍ଣ୍ଣ ସରକାରୀ ମାନ୍ୟତା ତଥା ସ୍ବୟଂଶାସିତ କଲେଜର ମାନ୍ୟତା ପ୍ରଦାନ ପାଇଁ ସାଧାରଣରେ ଦାବି ହେଉଛି ।